മോസ്‌കോ: ആണവായുധങ്ങൾ സജ്ജമാക്കാൻ റഷ്യൻ പ്രസിഡന്‍റ് വ്‌ളാഡിമിർ പുടിന്‍റെ നിർദേശം. റഷ്യക്കുമേൽ യുഎസ്, യുകെ, യുറോപ്യൻ യൂണിയൻ സാമ്പത്തിക പ്രതിരോധം ഉൾപ്പടെ ശക്തമാക്കുന്ന സാഹചര്യത്തിലാണ് റഷ്യയുടെ ഭീതിവിതക്കുന്ന തീരുമാനം. റഷ്യൻ പ്രതിരോധ മന്ത്രിക്കും മിലിട്ടറി ഡിഫൻസ് സ്റ്റാഫ്‌ മേധാവിക്കുമാണ് ഇതു സംബന്ധിച്ച് നിർദേശം നൽകിയതെന്നാണ് പുറത്തു വരുന്ന റിപ്പോർട്ടുകൾ.
അതേ സമയം ബെലാറസിൽ ചർച്ചയാകാമെന്ന റഷ്യയുടെ ആവശ്യം യുക്രൈൻ അംഗീകരിച്ചതായി റിപ്പോർട്ടുകൾ വന്നു. യുക്രൈൻ പ്രസിഡന്‍റ് സെലൻസ്‌കി ബെലാറസ് പ്രസിഡന്‍റുമായി ചർച്ച നടത്തി. ഈ ചർച്ചക്ക് ശേഷമാണ് ബെലാറസിൽ ചർച്ചയാകാമെന്ന തീരുമാനത്തിലെത്തിയത്.
ബെലാറൂസിൽ ചർച്ചയാകാമെന്ന റഷ്യൻ വാഗ്‌ദാനത്തെ യുക്രൈൻ ആദ്യം നിരസിക്കുകയായിരുന്നു. പകരം നാറ്റോ രാജ്യങ്ങളിൽ ചർച്ചയാകാമെന്നായിരുന്നു യുക്രൈന്‍റെ നിലപാട്. റഷ്യയുമായി സമാധാന ചർച്ചകൾക്ക് തന്‍റെ രാജ്യം തയ്യാറാണെന്നും എന്നാൽ റഷ്യന്‍ അധിനിവേശത്തിന് കളമൊരുക്കിയ ബെലാറസിൽ വച്ച് ചർച്ചക്ക് തയ്യാറല്ലെന്നുമായിരുന്നു യുക്രൈൻ ആദ്യം നിലപാട് സ്വീകരിച്ചത്.
അതേ സമയം റഷ്യൻ അധിനിവേശത്തിന്‍റെ നാലാം ദിനത്തിൽ യുക്രൈനിലെ നഗരങ്ങളിലേക്ക് കയറി റഷ്യൻ സേന പോരാട്ടം ശക്തമാക്കിയിരുന്നു. റഷ്യൻ സേന ഖാര്‍കിവിൽ പ്രവേശിച്ചതിനെ തുടർന്ന് ജനങ്ങൾക്ക് ജാഗ്രത നിർദേശം പുറപ്പടുവിച്ചിരുന്നു. കീവിന് ശേഷം യുക്രൈനിലെ രണ്ടാമത്തെ വലിയ നഗരമാണ് ഖാര്‍കിവ്.
നഗരത്തിൽ പോരാട്ടം നടക്കുകയാണെന്നും ആളുകൾ ബങ്കറുകളിൽ നിന്നും വീടുകളിൽ നിന്നും പുറത്തിറങ്ങരുതെന്നും റീജിയണൽ അഡ്‌മിനിസ്‌ട്രേഷൻ മേധാവി ഒലേ സിൻഹബ്‌ ജാഗ്രത നിർദേശം നൽകിയിരുന്നു. ഖാര്‍കിവിലെ വാതക പൈപ്പ് ലൈന്‍ റഷ്യ തകര്‍ത്തു. റഷ്യന്‍ സൈന്യം വാതക പൈപ്പ് ലൈന്‍ തകര്‍ത്ത വിവരം യുക്രൈന്‍ പ്രസിഡന്‍റിന്‍റെ ഓഫിസാണ് അറിയിച്ചത്. വാസിൽകീവിലെ എണ്ണ സംഭരണ ശാലയ്ക്ക് നേരെയും റഷ്യ മിസൈൽ ആക്രമണം നടത്തിയിരുന്നു.
READ MORE: റഷ്യൻ സൈനികരുടെ ചിത്രങ്ങളും വീഡിയോയും വെബ്‌സൈറ്റില്‍ പ്രസിദ്ധീകരിച്ച് യുക്രൈൻ
