തെഹ്‌റാന്‍: തെഹ്‌റാനില്‍ തകര്‍ന്ന് വീണ ഉക്രൈയിന്‍ വിമാനത്തിന്‍റെ ബ്ലാക്ക്ബോക്‌സ്‌ തിരികെ നല്‍കുന്ന കാര്യത്തില്‍ തീരുമാനമായിട്ടില്ലെന്ന് സിവില്‍ ഏവിയേഷന്‍ ഉദ്യോഗസ്ഥന്‍ വ്യക്തമാക്കി. തകര്‍ന്ന വിമാനത്തിന്‍റെ ബ്ലാക്ക് ബോക്‌സ് പരിശോധിച്ച് വരികയാണെന്ന് ഇറാന്‍റെ സിവില്‍ ഏവിയേഷന്‍ ഡയറക്‌ടര്‍ ജനറല്‍ ഹസ്സന്‍ റെസെയ്‌ഫര്‍ പറഞ്ഞു. എന്നാല്‍ മറ്റൊരു രാജ്യത്തേക്ക് വിമാനത്തിന്‍റെ ബ്ലാക്ക് ബോക്‌സ് അയക്കുന്നതിനെപ്പറ്റി തീരുമാനിച്ചിട്ടില്ലെന്നും അദ്ദേഹം കൂട്ടിച്ചേര്‍ത്തു.
167 യാത്രക്കാരും ഒമ്പത്‌ ജീവനക്കാരുമായി ഉക്രൈനിലേക്ക് പറക്കവേയാണ് പിഎസ്‌ 752 വിമാനം ഇറാന്‍റെ തലസ്ഥാനമായ തെഹ്‌റാനിലെ ഇമാം ഖൊമെയ്‌നി വിമാനതാവളത്തിന് പുറത്ത് തകര്‍ന്ന് വീണത്‌. ഖാസിം സുലൈമാനിയെ കൊലപ്പെടുത്തിയതിന്‍റെ തിരിച്ചടിയായി യുഎസ്‌ സേനയുടെ ഇറാഖിലുള്ള സൈനിക താവളങ്ങളില്‍ ഇറാന്‍ മിസൈലുകൾ ആക്രമിച്ച അതേ ദിവസമാണ് വിമാനം തകര്‍ന്നത്‌.
