ബെയ്‌ജിങ്: അമേരിക്ക ശീതയുദ്ധ മാനസികാവസ്ഥയും പക്ഷപാതപരമായ സമീപനവും ഉപേക്ഷിക്കണമെന്ന് ചൈന ആവശ്യപ്പെട്ടു. ചൈനയുടെ ആഭ്യന്തര കാര്യങ്ങളിലെ യുഎസ് ഇടപെടൽ ഉടൻ അവസാനിപ്പിക്കണം. ഇല്ലെങ്കിൽ അത് ചൈനയുടെ താൽപര്യങ്ങളെ ബാധിക്കുകയും അമേരിക്ക-ചൈന ബന്ധം ദുർബലപ്പെടുത്തുകയും ചെയ്യുമെന്ന് ചൈനീസ് വിദേശകാര്യ വക്താവ് ഷാവോ ലിജിയാന്‍ പറഞ്ഞു. ട്രംപ് ഭരണകൂടത്തിന്‍റെ പുതിയ ചൈന യുദ്ധതന്ത്ര റിപ്പോർട്ടിന് മറുപടിയായാണ് ഷാവോ ഇക്കാര്യം വ്യക്തമാക്കിയത്.
2017 ൽ പുറത്തിറക്കിയ യുഎസ് ദേശീയ സുരക്ഷാ തന്ത്ര റിപ്പോർട്ടിന് സമാനമാണ് പുതിയ റിപ്പോർട്ട്. ചൈനയുടെ രാഷ്‌ട്രീയ വ്യവസ്ഥയെ വളച്ചൊടിക്കുകയാണ് റിപ്പോർട്ടിന്‍റെ ലക്ഷ്യം. ചൈനക്കെതിരെയുള്ള അമേരിക്കയുടെ കടുത്ത നയത്തിന്‍റെ മുന്നോടിയാണിത്. കഴിഞ്ഞ രണ്ട് വർഷത്തിനിടയിൽ ചൈനയുടെ ആഭ്യന്തര കാര്യങ്ങളിൽ ഇടപെടുകയും, രാജ്യത്തിന്‍റെ താൽപര്യങ്ങൾ തടയുകയും ചെയ്യുന്ന അമേരിക്കയുടെ തെറ്റായ സമീപനത്തിന് ചൈനീസ് സർക്കാർ ആവർത്തിച്ച് തങ്ങളുടെ നിലപാട് വ്യക്തമാക്കുകയും, ശക്തമായി പ്രതികരിക്കുകയും ചെയ്‌തിട്ടുണ്ടെന്ന് ഷാവോ അറിയിച്ചു.
കമ്മ്യൂണിസ്റ്റ് പാർട്ടി ഓഫ് ചൈന(സിപിസി) യുടെ ശക്തമായ നേതൃത്വത്തിൽ ചൈനയുടെ ദേശീയ സാഹചര്യങ്ങൾക്ക് അനുയോജ്യമായി ചൈനീസ് ജനത വികസന പാതയിലേക്ക് നീങ്ങി മികച്ച നേട്ടങ്ങൾ കൈവരിച്ചു. ഇതിലൂടെ ലോകസമാധാനത്തിനും സ്ഥിരതയ്ക്കും വികസനത്തിനും ക്രിയാത്മക സംഭാവന നൽകാൻ സാധിച്ചു. ചൈന സോഷ്യലിസത്തിന്‍റെ പാതയിലൂടെ മുന്നേറുകയും കൂടുതൽ വിജയങ്ങൾ നേടുകയും ചെയ്യും. ചൈനയുടെ വികസനവും വളർച്ചയും തടയാൻ ആർക്കും കഴിയില്ലെന്നും അദ്ദേഹം പറഞ്ഞു.
അമേരിക്കയോടുള്ള ചൈനയുടെ നയം വ്യക്തമാണ്. സംഘർഷരഹിതവും പരസ്‌പര ബഹുമാനവും ഉൾക്കൊള്ളുന്ന ചൈന-യുഎസ് ബന്ധം വികസിപ്പിക്കുന്നതിൽ ഞങ്ങൾ സന്തുഷ്‌ടരാണ്. അതേസമയം, ചൈനയുടെ പരമാധികാരം, സുരക്ഷ, വികസന താൽപര്യങ്ങൾ എന്നിവ ഞങ്ങൾ ശക്തമായി സംരക്ഷിക്കും. രാജ്യങ്ങൾ തമ്മിലുള്ള ഉഭയകക്ഷി ബന്ധം ശരിയായ പാതയിലേക്ക് കൊണ്ടുവരാൻ ചൈനയുമായി പ്രവർത്തിക്കണമെന്നും ഷാവോ അമേരിക്കയോട് അഭ്യർഥിച്ചു.
