വാഷിംഗ്ടൺ: യുഎസ് പ്രസിഡന്‍റായി തെരഞ്ഞെടുക്കപ്പെട്ട ജോ ബൈഡൻ രാജ്യത്തെ ആരോഗ്യ മേഖലയിലെ ചില നിയമനങ്ങൾ പ്രഖ്യാപിച്ചു. കാലിഫോർണിയ അറ്റോർണി ജനറലായ സേവ്യർ ബെക്രയെ ആരോഗ്യ-മനുഷ്യ വകുപ്പ് സെക്രട്ടറിയായി നാമനിർദേശം ചെയ്തതായി ബൈഡൻ തിങ്കളാഴ്ച പ്രസ്താവനയിൽ പറഞ്ഞു. കാലിഫോർണിയയിൽ നിന്നുള്ള ബെക്ര, ആരോഗ്യ-മനുഷ്യ സേവന വകുപ്പിനെ നയിക്കുന്ന ആദ്യത്തെ ലാറ്റിനോ ആയിരിക്കും. ഇവർ കൊവിഡ് വാക്സിനുകളുടെ വിതരണത്തിന് മേൽനോട്ടം വഹിക്കും.
അതേസമയം, യുഎസ് സർജൻ ജനറലായി ഗവേഷണ ശാസ്ത്രജ്ഞൻ വിവേക് മൂർത്തിയെയും രോഗ നിയന്ത്രണത്തിനും പ്രതിരോധത്തിനുമുള്ള കേന്ദ്രങ്ങളെ നയിക്കുന്നതിനായി മസാച്യുസെറ്റ്സ് ജനറൽ ആശുപത്രിയി തലവനും ഹാർവാർഡ് മെഡിക്കൽ സ്കൂളിലെ മെഡിസിൻ പ്രൊഫസറുമായ റോച്ചൽ വലൻസ്‌കിയെയും തെരഞ്ഞെടുത്തതായും ബൈഡൻ വ്യക്തമാക്കി.
കൊവിഡ് -19 ഇക്വിറ്റി ടാസ്‌ക് ഫോഴ്‌സ് ചെയർ ആയി സേവനമനുഷ്ഠിക്കാൻ ആരോഗ്യസംരക്ഷണ വിദഗ്ദ്ധനായ മാർസെല്ല ന്യൂനെസ്-സ്മിത്തിനെ നിയമിച്ചു. ദേശീയ സാമ്പത്തിക കൗൺസിലിന്‍റെ മുൻ ഡയറക്ടറും കൊവിഡിന്‍റെ കോർഡിനേറ്ററുമായ ജെഫ് സിയന്റ്സിനെ പ്രസിഡൻഷ്യൽ കൗൺസിലറായും നാമനിർദേശം ചെയ്തു.
യുഎസിൽ 14,933,847 പേരെ ബാധിച്ചതും 283,631 പേരുടെ മരണത്തിന് കാരണമാകുകയും ചെയ്ത കൊവിഡ് പ്രതിരോധം ബൈഡൻ ഭരണകൂടത്തിന്‍റെ മുൻഗണന പട്ടികയിൽ പെടുന്നതാണെന്നും അദ്ദേഹം അറിയിച്ചു.
