ആ കണ്ണുകൾ വിജയ് സേതുപതിയുടേത് തന്നെ; കിങ് ഖാനോട് പോരടിക്കാൻ 'മരണത്തിന്‍റെ വ്യാപാരി'

'മരണത്തിന്‍റെ വ്യാപാരി' വരുന്നു, കയ്യടി നേടി വിജയ് സേതുപതിയുടെ ജവാൻ ക്യാരക്‌ടർ പോസ്റ്റർ.

ബോളിവുഡും തെന്നിന്ത്യയും ഒരുപോലെ കാത്തിരിക്കുന്ന ചിത്രമാണ് ഷാരൂഖ് ഖാൻ (Shah Rukh Khan) നായകനാകുന്ന 'ജവാൻ' (Jawan). അറ്റ്ലി (Atlee) സംവിധാനം ചെയ്യുന്ന ചിത്രത്തിലെ പുതിയ പോസ്റ്റർ കഴിഞ്ഞ ദിവസം നിർമാതാക്കൾ പുറത്ത് വിട്ടിരുന്നു. 'ജവാന്‍റെ' നിർമാതാക്കളായ റെഡ് ചില്ലീസ് എന്‍റര്‍ടെയ്ന്‍മെന്‍റ് (Red Chillies Entertainment) സോഷ്യല്‍ മീഡിയയിലൂടെ പങ്കുവച്ച ഈ ചിത്രം സിനിമ പ്രേമികള്‍ക്കിടയില്‍ ചൂടൻ ചര്‍ച്ചകൾക്കും വഴിവച്ചിരുന്നു.

• " class="align-text-top noRightClick twitterSection" data="">

ഒരു കഥാപാത്രത്തിന്‍റെ കണ്ണുകളുടെ ചിത്രമാണ് റെഡ് ചില്ലീസ് എന്‍റര്‍ടെയ്ന്‍മെന്‍റ് പങ്കുവച്ചത്. 'അയാള്‍ നിങ്ങളെ സൂക്ഷ്‌മമായി നിരീക്ഷിക്കുകയാണ്, അയാള്‍ക്ക് വേണ്ടി കാത്തിരിക്കുക', എന്ന് മാത്രമാണ് 'ജവാന്‍' എന്ന ഹാഷ് ടാഗിനൊപ്പം നിർമാതാക്കൾ കുറിച്ചത്. ഇതിന് പിന്നാലെ ആ കണ്ണുകൾ ആരുടേതാണെന്ന് കണ്ടെത്താനുള്ള ശ്രമവും ആരാധകർ ആരംഭിച്ചിരുന്നു.

ചിലർ വിജയ് സേതുപതിയാണ് (Vijay Sethupathi) ഇതെന്ന കണ്ടെത്തലുകളിലേക്കും എത്തി. ഇപ്പോഴിതാ പ്രേക്ഷകരുടെ ഊഹം ശരിയാണെന്ന് തെളിഞ്ഞിരിക്കുകയാണ്. രൗദ്രമേറിയ കണ്ണുകൾക്ക് പിന്നിലെ തമിഴകത്തിന്‍റെ മക്കൾ സെൽവൻ വിജയ് സേതുപതിയുടെ മുഖം നിർമാതാക്കൾ പുറത്തുവിട്ടു. കൂളിം​ഗ് ​ഗ്ലാസ് വച്ച് തീർത്തും മാസ് ലുക്കിലാണ് വിജയ് സേതുപതി പോസ്റ്ററില്‍ ഉള്ളത്.

'മരണത്തിന്‍റെ വ്യാപാരി' ടാഗ്‌ലൈനോടെ എത്തിയ സേതുപതിയുടെ ക്യാരക്‌ടർ പോസ്റ്റർ മികച്ച പ്രതികരണമാണ് നേടുന്നത്. ഷാരൂഖ് ഖാനും പോസ്റ്റർ പങ്കുവച്ചിട്ടുണ്ട്. 'അവനെ തടയാൻ ഒന്നുമില്ല... അതോ ഉണ്ടോ?', എന്ന് കുറിച്ചുകൊണ്ടാണ് കിങ് ഖാൻ പോസ്റ്റർ പങ്കുവച്ചത്. ഏതായാലും ഷാരൂഖ് ഖാനുമായി കൊമ്പുകോർക്കുന്ന കഥാപാത്രമാകും വിജയ് സേതുപതിയുടേതെന്ന് ഇതിലൂടെ വ്യക്തമായിരിക്കുകയാണ്.

തെന്നിന്ത്യയുടെ പ്രിയ താരം നയൻതാരയാണ് (Nayanthara) 'ജവാനി'ൽ നായികയായി എത്തുന്നത്. താരത്തിന്‍റെ ഫസ്റ്റ് ലുക്ക് അണിയറക്കാർ നേരത്തെ പുറത്ത് വിട്ടിരുന്നു. ഒരു അന്വേഷണ ഉദ്യോഗസ്ഥയുടെ വേഷമാണ് ജവാനിൽ നയന്‍താര അവതരിപ്പിക്കുന്നത്.

അതേസമയം ചിത്രത്തില്‍ ഷാരൂഖ് ഇരട്ട വേഷത്തിലാണ് എത്തുന്നതെന്നാണ് പുറത്തുവരുന്ന റിപ്പോർട്ടുകൾ. 'റോ'യിലെ (റിസര്‍ച്ച് ആന്‍ഡ് അനാലിസിസ് വിംഗ്) ഒരു മുതിര്‍ന്ന ഉദ്യോഗസ്ഥനായ അച്ഛനെയും ഗ്യാങ്സ്റ്ററായ മകനെയുമാകും താരം അവതരിപ്പിക്കുക എന്നാണ് റിപ്പോര്‍ട്ടുകള്‍ വ്യക്തമാക്കുന്നത്.

സെപ്റ്റംബർ 7നാണ് 'ജവാൻ' സിനിമയുടെ റിലീസ്. ഹിന്ദി, തമിഴ്, തെലുഗു ഭാഷകളിലാണ് ചിത്രം ഒരേസമയം റിലീസ് ചെയ്യുക. ദീപിക പദുക്കോൺ (Deepika Padukone), സഞ്ജയ് ദത്ത് (Sanjay Dutt) എന്നിവർ 'ജവാനി'ൽ അതിഥി വേഷങ്ങളിൽ എത്തുന്നുണ്ട്. പ്രിയാമണി, സന്യ മൽഹോത്ര, യോഗി ബാബു, സുനിൽ ഗ്രോവർ, റിധി ദ്രോഗ എന്നിവരാണ് ചിത്രത്തിൽ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.

റെഡ് ചില്ലീസ് എന്‍റര്‍ടെയ്ന്‍‍മെന്‍റിന്‍റെ ബാനറില്‍ ഗൗരി ഖാന്‍ ആണ് ചിത്രത്തിന്‍റെ നിര്‍മാണം. 'ഫാസ്റ്റ് ആന്‍ഡ് ഫ്യൂരിയസ്' എന്ന ഹോളിവുഡ് ചിത്രത്തിന്‍റെ ആക്ഷന്‍ കൊറിയോഗ്രഫറാണ് 'ജവാനി'ലെ സംഘട്ടന രംഗങ്ങള്‍ക്ക് പിന്നിൽ. അനിരുദ്ധ് (Anirudh) ആണ് ചിത്രത്തിന്‍റെ സംഗീത സംവിധാനം നിര്‍വഹിക്കുന്നത്.