വിഷ്‌ണു ഉണ്ണികൃഷ്‌ണന്‍-ബിബിന്‍ ജോര്‍ജ് കൂട്ടുകെട്ട് ആദ്യമായി സംവിധാനം ചെയ്‌ത വെടിക്കെട്ട് സിനിമയുടെ ട്രെയിലര്‍ പുറത്തിറങ്ങി. നാടന്‍ പശ്ചാത്തലത്തിലുളള കഥ പറയുന്ന ചിത്രത്തിന്‍റെ ട്രെയിലറില്‍ വിഷ്‌ണുവും ബിബിനും തന്നെയാണ് മുഖ്യ ആകര്‍ഷണം. കറുംങ്കോട്ട, മഞ്ഞപ്ര എന്നിങ്ങനെ അടുത്തടുത്തുളള രണ്ട് നാട്ടിലെ ചെറുപ്പക്കാര്‍ തമ്മിലുളള അടിയും തിരിച്ചടിയും വെല്ലുവിളികളുമാണ് ട്രെയിലറില്‍ കാണിക്കുന്നത്.
ചായക്കടകാരനായി ബിബിന്‍ ജോര്‍ജ് എത്തുന്ന ചിത്രത്തില്‍ തല പറ്റയടിച്ച് താടി വളര്‍ത്തി പുതിയ മേക്കോവറിലാണ് വിഷ്‌ണു ഉണ്ണികൃഷ്‌ണന്‍ പ്രത്യക്ഷപ്പെടുന്നത്. ഇരുനൂറോളം പുതുമുഖ താരങ്ങള്‍ അണിനിരക്കുന്ന ചിത്രത്തില്‍ ഐശ്വര്യ അനില്‍കുമാര്‍, ശ്രദ്ധ ജോസഫ് എന്നിവരാണ് നായികമാര്‍. സംവിധാനത്തിന് പുറമെ സിനിമയ്‌ക്ക് രചന നിര്‍വഹിച്ചിരിക്കുന്നതും വിഷ്‌ണു-ബിബിന്‍ കൂട്ടുകെട്ട് തന്നെയാണ്.
- " class="align-text-top noRightClick twitterSection" data="">
അമര്‍ അക്‌ബര്‍ അന്തോണി, കട്ടപ്പനയിലെ ഹൃത്വിക്ക് റോഷന്‍, ഒരു യമണ്ടന്‍ പ്രേമകഥ എന്നീ ചിത്രങ്ങള്‍ക്ക് ശേഷം ഇരുവരും തിരക്കഥ എഴുതിയ സിനിമ കൂടിയാണിത്. ബാദുഷ സിനിമാസിന്‍റെയും പെന്‍ ആന്‍ഡ് പെപ്പറിന്‍റെയും ബാനറില്‍ എന്‍ എം ബാദുഷ, ഷിനോയ് മാത്യൂ എന്നിവര്‍ ചേര്‍ന്നാണ് നിര്‍മാണം. നേരത്തെ വെടിക്കെട്ടിന്‍റെതായി പുറത്തിറങ്ങിയ പാട്ടുകളും പ്രൊമോഷന്‍ വീഡിയോസുമെല്ലാം ശ്രദ്ധിക്കപ്പെട്ടിരുന്നു.
രതീഷ് റാം ഛായാഗ്രഹണം നിര്‍വഹിച്ച ചിത്രത്തിന്‍റെ എഡിറ്റര്‍ ജോണ്‍കുട്ടിയാണ്. ബിബിന്‍ ജോര്‍ജ്, ഷിബു പുലര്‍കാഴ്‌ച, വിപിന്‍ ജെഫ്രിന്‍, ജിതിന്‍ ദേവസി, അന്‍സാജ് ഗോപി എന്നിവരുടെ വരികള്‍ക്ക് ശ്യാം പ്രസാദ്, ഷിബു പുലര്‍കാഴ്‌ച, അര്‍ജുന്‍ വി അക്ഷയ ചേര്‍ന്നാണ് സംഗീതം ഒരുക്കിയത്. പശ്ചാത്തല സംഗീതം ജേക്ക്‌സ് ബിജോയ്. ഫെബ്രുവരി മൂന്നിനാണ് വെടിക്കെട്ട് തിയേറ്ററുകളിലേക്ക് എത്തുക.
