Vijay in Shah Rukh Khan Atlee movie: ബോളിവുഡ്‌ കിംഗ്‌ ഖാന്‍ ഷാരൂഖ്‌ ഖാനൊപ്പം സ്‌ക്രീന്‍ പങ്കിടാനൊരുങ്ങി ദളപതി വിജയും. നാളേറെയായി ഷാരൂഖ്‌ ഖാനും തമിഴകത്തെ സൂപ്പര്‍ ഹിറ്റ്‌ സംവിധായകന്‍ അറ്റ്‌ലിയും ഒന്നിച്ചുള്ള ബോളിവുഡ്‌ ചിത്രം 'ലയണി'നായുള്ള കാത്തിരിപ്പിലാണ് ആരാധകര്‍. പ്രഖ്യാപനം മുതല്‍ തന്നെ മാധ്യമശ്രദ്ധ നേടിയിരുന്ന ചിത്രത്തിന്‍റെ ഓരോ പുതിയ വിശേഷങ്ങളും ആരാധകര്‍ ഏറ്റെടുക്കാറുണ്ട്‌.
Vijay as guest role in Shah Rukh movie: ഇപ്പോഴിതാ ചിത്രവുമായി ബന്ധപ്പെട്ട്‌ പുതിയ വാര്‍ത്തയാണ് പ്രചരിക്കുന്നത്‌. ലയണില്‍ വിജയും വേഷമിടുമെന്നാണ് റിപ്പോര്‍ട്ടുകള്‍. ചിത്രത്തില്‍ അതിഥി വേഷത്തിലാകും വിജയ്‌ പ്രത്യക്ഷപ്പെടുന്നതെന്നാണ് സൂചന. ഒരു ഓണ്‍ലൈന്‍ മാധ്യമമാണ് ഇക്കാര്യം റിപ്പോര്‍ട്ടു ചെയ്‌തിരിക്കുന്നത്‌. അതേസമയം ഇക്കാര്യത്തില്‍ ഔദ്യോഗിക സ്ഥിരീകരണം ഉണ്ടായിട്ടില്ല.
Vijay Atlee movies: വിജയുടെ വന്‍ ഹിറ്റുകളായ 'തെറി', 'മെര്‍സല്‍', 'ബിഗില്‍' എന്നീ ചിത്രങ്ങള്‍ സംവിധാനം ചെയ്‌തത്‌ അറ്റ്‌ലി ആയിരുന്നു. 'ബീസ്‌റ്റാ'ണ് ഏറ്റവും ഒടുവിലായി വിജയുടേതായി തിയേറ്ററുകളിലെത്തിയ ചിത്രം. റോ ഏജന്‍റ്‌ വീര രാഘവന്‍ എന്ന കഥാപാത്രത്തെയാണ് ചിത്രത്തില്‍ വിജയ്‌ അവതരിപ്പിച്ചത്‌. നെല്‍സണ്‍ ദിലീപ്‌ കുമാര്‍ സംവിധാനം ചെയ്‌ത ചിത്രത്തിന് സമ്മിശ്ര പ്രതികരണങ്ങളായിരുന്നു ലഭിച്ചത്‌. ഏപ്രില്‍ 13നാണ്‌ ചിത്രം തിയേറ്ററുകളിലെത്തിയത്‌.
Nayanthara in Shah Rukh movie: 'ലയണി'ല്‍ ഷാരൂഖിന്‍റെ നായികയായെത്തുന്നത്‌ തെന്നിന്ത്യന്‍ ലേഡി സൂപ്പര്‍ സ്‌റ്റാര്‍ നയന്‍താരയാണ്. കഴിഞ്ഞ സെപ്‌റ്റംബറിലാണ് ലയണിന്‍റെ ചിത്രീകരണം ആരംഭിച്ചത്‌. ചിത്രീകരണവുമായി ബന്ധപ്പെട്ട്‌ നയന്‍താര മുംബൈയില്‍ എത്തിയത്‌ വാര്‍ത്തയില്‍ ഇടംപിടിച്ചിരുന്നു.
Shah Rukh as Raw agent: അറ്റ്‌ലിയുടെ ബോളിവുഡ്‌ അരങ്ങേറ്റം കൂടിയാണ്‌ 'ലയണ്‍'. ഒരു റോ (റിസര്‍ച്ച്‌ ആന്‍ഡ്‌ അനാലിസിസ്‌ വിംഗ്‌) ഉദ്യോഗസ്ഥനെയാണ് ചിത്രത്തില്‍ ഷാരൂഖ്‌ അവതരിപ്പിക്കുന്നതെന്നാണ് റിപ്പോര്‍ട്ടുകള്‍. ഷാരൂഖിന്‍റെ കഥാപാത്രത്തിന് ഒന്നിലധികം അപ്പിയറന്‍സുകള്‍ ഉണ്ടാകുമെന്നും സൂചനയുണ്ട്‌. എന്നാല്‍ അച്ഛനും മകനുമായി ഷാരൂഖ്‌ ഡബിള്‍ റോളില്‍ എത്തുമെന്നും റിപ്പോര്‍ട്ടുണ്ട്‌.
സാന്യ മല്‍ഹോത്ര, സുനില്‍ ഗ്രോവര്‍, പ്രിയാമണി എന്നിവരും ചിത്രത്തില്‍ മറ്റു സുപ്രധാന വേഷങ്ങളിലെത്തും. ഒരു പാന്‍ ഇന്ത്യന്‍ ചിത്രമായിരിക്കും ഇതെന്നാണ്‌ പ്രേക്ഷകരുടെ കണക്കുക്കൂട്ടല്‍. 'പത്താന്‍' ആണ് ഷാരൂഖ്‌ ഖാന്‍റെ മറ്റൊരു പുതിയ പ്രോജക്‌ട്‌. 'പത്താന്‍' ചിത്രീകരണം പൂര്‍ത്തിയാക്കിയ ശേഷമാകും ഷാരൂഖ്‌ അറ്റ്‌ലി ചിത്രത്തിലേക്ക്‌ കടക്കുക.
Shah Rukh Khan latest movies: 'പത്താനി'ല്‍ ദീപിക പദുകോണ്‍ ആണ് ഷാരൂഖിന്‍റെ നായികയായെത്തുന്നത്‌. ജോണ്‍ എബ്രഹാമും ചിത്രത്തില്‍ സുപ്രധാന വേഷത്തിലെത്തും. 2018ല്‍ പുറത്തിറങ്ങിയ 'സീറോ' ആണ് ഷാരൂഖിന്‍റേതായി ഏറ്റവും ഒടുവില്‍ തിയേറ്ററുകളിലെത്തിയ ചിത്രം. 'നെട്രിക്കണ്‍' ആണ് നയന്‍താരയുടേതായി ഏറ്റവും ഒടുവില്‍ റിലീസിനെത്തിയ ചിത്രം. ഡിസ്‌നി പ്ലസ്‌ ഹോട്ട്‌സ്‌റ്റാറിലൂടെ ഡയറക്‌ട്‌ ഒടിടി റിലീസായാണ് ചിത്രം പ്രേക്ഷകര്‍ക്ക്‌ മുമ്പിലെത്തിയത്‌.
Also Read: ബീസ്റ്റിലെ മാള്‍ സെറ്റിട്ടത്! മേക്കിങ് വിഡിയോയുടെ പ്രമൊ പുറത്ത്
