മലയാള സിനിമയിലെ ആക്ഷൻ കിങ് സുരേഷ് ഗോപി (Suresh Gopi) നായകനായി പുതിയ ചിത്രം വരുന്നു. നവാഗതനായ അരുൺ വർമ്മ സംവിധാനം ചെയ്യുന്ന 'ഗരുഡൻ' (Garudan) എന്ന ചിത്രത്തിന്‍റെ ടീസർ ആവേശത്തോടെ ഏറ്റെടുത്തിരിക്കുകയാണ് ആരാധകർ. സുരേഷ് ഗോപിയുടെ പിറന്നാളിനോട് അനുബന്ധിച്ചാണ് കഴിഞ്ഞ ദിവസം (ജൂൺ 26) അണിയറ പ്രവർത്തകർ ടീസർ പുറത്തുവിട്ടത്.
മാജിക് ഫ്രെയിംസ് ഫിലിംസിന്‍റെ ബാനറിൽ ലിസ്റ്റിൻ സ്റ്റീഫൻ (Listin Stephen) ആണ് ചിത്രം നിർമിക്കുന്നത്. സുരേഷ് ഗോപിയോടൊപ്പം ബിജു മേനോനും (Biju Menon) ചിത്രത്തില്‍ പ്രധാന വേഷത്തിലുണ്ട്. സംവിധായകൻ കൂടിയായ മിഥുൻ മാനുവൽ തോമസ് (Midhun Manuel Thomas) ആണ് ക്രൈം ത്രില്ലർ ശൈലിയിൽ ഒരുങ്ങുന്ന ഈ ചിത്രത്തിന്‍റെ തിരക്കഥ.
ബോക്‌സോഫിസിൽ മികച്ച നേട്ടം കൊയ്‌ത, കുഞ്ചാക്കോ ബോബൻ നായകനായി എത്തിയ 'അഞ്ചാം പാതിര' എന്ന ക്രൈം ത്രില്ലർ ചിത്രത്തിന് ശേഷം മിഥുൻ മാനുവൽ തോമസ് തിരക്കഥ എഴുതിയ ചിത്രം കൂടിയാണ് 'ഗരുഡൻ'. മാജിക് ഫ്രെയിംസും മിഥുൻ മാനുവൽ തോമസും ആദ്യമായി കൈകോർക്കുന്നു എന്ന പ്രത്യേകതയുമുണ്ട് ഈ ചിത്രത്തിന്.
- " class="align-text-top noRightClick twitterSection" data="">
അതേസമയം സുരേഷ് ഗോപി - ബിജു മേമോൻ കൂട്ടുകെട്ടിലും പ്രതീക്ഷ അർപ്പിച്ചിരിക്കുകയാണ് സിനിമാസ്വാദകർ. 11 വർഷങ്ങൾക്ക് ശേഷമാണ് സുരേഷ് ഗോപിയും ബിജു മേനോനും ഒരു ചിത്രത്തിന് വേണ്ടി ഒന്നിക്കുന്നത് എന്നതും 'ഗരുഡന്‍റെ' പ്രതീക്ഷകളെ വാനോളം ഉയർത്തുന്നു. 'കളിയാട്ടം, പത്രം, എഫ്‌ഐആർ ക്രിസ്‌ത്യൻ ബ്രദേഴ്‌സ്, ട്വന്‍റി-ട്വന്‍റി' തുടങ്ങിയ നിരവധി ചിത്രങ്ങളിൽ ഈ കൂട്ടുകെട്ട് പ്രേക്ഷകരെ രസിപ്പിച്ചിരുന്നു. 2010 ൽ പുറത്തിറങ്ങിയ 'രാമരാവണൻ' ആയിരുന്നു സുരേഷ് ഗോപിയും ബിജു മേനോനും അവസാനമായി ഒരുമിച്ച് അഭിനയിച്ച ചിത്രം.
ജിനീഷ് എം ആണ് 'ഗരുഡന്‍റെ' കഥ എഴുതിയിരിക്കുന്നത്. അജയ് ഡേവിഡ് കാച്ചപ്പിള്ളിയാണ് ചിത്രത്തിന്‍റെ ഛായാഗ്രാഹകൻ. എഡിറ്റിങ് ശ്രീജിത്ത് സാരംഗും നിർവഹിക്കുന്നു.
ചിത്രത്തിലെ ഗാനങ്ങൾക്ക് ഈണം പകരുന്നത് ജേക്‌സ് ബിജോയ് ആണ്. പശ്ചാത്തല സംഗീതം ഒരുക്കുന്നതും ജേക്‌സ് തന്നെ. കലാസംവിധാനം അനീസ് നാടോടിയും നിർവഹിക്കുന്നു.
സിദ്ദിഖ്, ദിലീഷ് പോത്തൻ, ജഗദീഷ്, മേജർ രവി, നിഷാന്ത് സാഗർ, ജയ്സ് ജോസ്, രഞ്ജിത്ത് കങ്കോൾ, രഞ്ജിനി, മാളവിക എന്നിവരും ഈ ചിത്രത്തിലെ പ്രധാന ആകർഷണങ്ങളാണ്. എഴുപത് ദിവസത്തോളം നീണ്ടു നിൽക്കുന്ന ചിത്രീകരണം കൊച്ചിയിലും ഹൈദരാബാദിലുമായി പൂർത്തിയാകുമെന്നാണ് വിവരം.
കോ - പ്രൊഡ്യൂസർ - ജസ്റ്റിൻ സ്റ്റീഫൻ, ലൈൻ പ്രൊഡ്യൂസർ - സന്തോഷ് കൃഷ്‌ണൻ, എക്‌സിക്യൂട്ടീവ് പ്രൊഡ്യൂസർ - നവീൻ പി തോമസ്. അഡ്‌മിനിസ്‌ട്രേഷൻ ആൻഡ് ഡിസ്‌ട്രിബ്യൂഷൻ ഹെഡ് - ബബിൻ ബാബു, പ്രൊഡക്ഷൻ കൺട്രോളർ - ഡിക്സൺ പൊടുത്താസ്, പ്രൊഡക്ഷൻ ഇൻ ചാർജ് - അഖിൽ യശോധരൻ. മേക്കപ്പ് - റോണക്‌സ്‌ സേവ്യർ, കോസ്റ്റ്യൂം - സ്റ്റെഫി സേവ്യർ, മാർക്കറ്റിങ് - ഒബ്‌സ്ക്യുറ, മാർക്കറ്റിങ് കൺസൾട്ടന്‍റ് - ബിനു ബ്രിങ് ഫോർത്ത്. ഡിസൈൻസ് -ആന്റണി സ്റ്റീഫൻ എന്നിവരാണ് ചിത്രത്തിലെ മറ്റ് അണിയറ പ്രവർത്തകർ.
