Shah Rukh Khan in list of 50 greatest actors: ലോകത്തെ എക്കാലത്തെയും മികച്ച 50 താരങ്ങളുടെ പട്ടികയില്‍ ബോളിവുഡ് സൂപ്പര്‍ താരം ഷാരൂഖ് ഖാനും. എംപയര്‍ എന്ന പ്രമുഖ ബ്രിട്ടീഷ് മാസികയുടെ പട്ടികയിലാണ് ഷാരൂഖും ഉള്‍പ്പെട്ടിരിക്കുന്നത്. ഡെന്‍സെല്‍ വാഷിങ്ടണ്‍, ടോം ഹങ്ക്‌സ്‌, മര്‍ലോന്‍ ബ്രാന്‍ഡോ, മെറില്‍ സ്‌ട്രീപ്പ്, ജാക്ക് നിക്കോള്‍സണ്‍ എന്നിവര്‍ക്കൊപ്പമാണ് 57കാരനായ ഷാരൂഖും ഈ പട്ടികയില്‍ ഇടംപിടിച്ചത്.
Shah Rukh Khan in Empire Magazine: ഇന്ത്യയില്‍ നിന്നും ഷാരൂഖ് ഖാന്‍ മാത്രമാണ് ഈ മാസികയില്‍ ഇടംപിടിരിക്കുന്നത്. താരത്തിന്‍റെ 'ദേവസാസ്', 'മൈ നെയിം ഈസ് ഖാന്‍', 'കുച്ച് കുച്ച് ഹോത്താ ഹേ', 'സ്വദേശ്' തുടങ്ങി ചിത്രങ്ങളെ കുറിച്ച്‌ മാസികയില്‍ പരാമര്‍ശിക്കുന്നുണ്ട്. കോടിക്കണക്കിന് ആരാധകരുള്ള താരമാണ് ഷാരൂഖ് ഖാന്‍ എന്നും എംപയര്‍ മാസിക ചൂണ്ടികാട്ടുന്നു.
ഷാരൂഖിന്‍റേതായി റിലീസിനൊരുങ്ങുന്ന ഏറ്റവും പുതിയ ചിത്രമാണ് സിദ്ധാര്‍ഥ് ആനന്ദ് സംവിധാനം ചെയ്യുന്ന 'പഠാന്‍'. 2023 ജനുവരി 25നാണ് ചിത്രം തിയേറ്ററുകളിലെത്തുക. നാല് വര്‍ഷങ്ങള്‍ക്ക് ശേഷം ചിത്രം തിയേറ്ററുകളിലെത്താന്‍ ഒരുങ്ങുമ്പോള്‍ സിനിമയെ വിവാദങ്ങള്‍ കൊണ്ട് മൂടുകയാണ്.
ചിത്രത്തിലെ 'ബേഷരം രംഗ്‌' എന്ന ഗാനം പുറത്തിറങ്ങിയത് മുതലാണ് 'പഠാനെ'തിരെ വിവാദങ്ങള്‍ ഉയര്‍ന്നത്. ഗാനരംഗത്തിലെ ദീപികയുടെ വസ്‌ത്ര ധാരണത്തെ ചൂണ്ടികാട്ടിയായായിരുന്നു വിവാദങ്ങള്‍. ജോണ്‍ എബ്രഹാമും ചിത്രത്തില്‍ സുപ്രധാന വേഷത്തിലെത്തുന്നുണ്ട്.
അറ്റ്‌ലിയുടെ സംവിധാനത്തില്‍ ഒരുങ്ങുന്ന 'ജവാന്‍', രാജ്‌കുമാര്‍ ഹിറാനിയുടെ 'ഡങ്കി' എന്നിവയാണ് താരത്തിന്‍റേതായി റിലീസിനൊരുങ്ങുന്ന മറ്റു ചിത്രങ്ങള്‍. 2023 ജൂണ്‍ 2ന് 'ജവാനും' തപ്‌സി പന്നു നായികയാെത്തുന്ന 'ഡങ്കി' 2023 ഡിസംബറിലുമാകും റിലീസിനെത്തുക.
Also Read: 'ഷാരൂഖ് ഖാന്‍ മകള്‍ക്കൊപ്പം ഇരുന്ന് പഠാന്‍ കാണണം'; വെല്ലുവിളിച്ച് മധ്യപ്രദേശ് നിയമസഭ സ്‌പീക്കര്‍
