വാഷിംഗ്‌ടൺ : തർക്കത്തിനിടെ സ്ത്രീയെ ആക്രമിച്ച കേസിൽ നടൻ ജൊനാഥൻ മേജേഴ്‌സിനെ ന്യൂയോർക്ക് പോലീസ് അറസ്റ്റ് ചെയ്‌തു. ആക്രമണം, ഉപദ്രവിക്കൽ, കഴുത്തുഞെരിച്ച് കൊല്ലാൻ ശ്രമിക്കല്‍ എന്നീ കുറ്റങ്ങൾ ചുമത്തിയാണ് ശനിയാഴ്‌ച നടനെ അറസ്റ്റ് ചെയ്‌തതെന്ന് പോലീസ് വക്താവ് പറഞ്ഞു. എന്നാൽ നടൻ ഇപ്പോൾ പൊലീസ് കസ്റ്റഡിയിലല്ല. താരത്തെ പൊലീസ് വിട്ടയക്കുകയായിരുന്നു.
ചെൽസിയിലെ ഒരു അപ്പാർട്ട്‌മെൻ്റിൽ 33 വയസ്സുള്ള ഒരു പുരുഷൻ 30കാരിയുമായി തർക്കത്തിൽ ഏർപ്പെട്ടെന്ന് അറിയിച്ച് ഹെൽപ് ലൈൻ നമ്പറായ 911 ലേക്ക് വന്ന വിളിയെ തുടര്‍ന്നാണ് സംഭവസ്ഥലത്ത് പൊലീസ് എത്തിയത്. ‘താൻ ആക്രമിക്കപ്പെട്ടതായി ഇര പോലീസിനെ അറിയിച്ചതുപ്രകാരം ഉദ്യോഗസ്ഥർ 33 വയസ്സുള്ള ജൊനാഥൻ മേജേഴ്‌സിനെ കസ്റ്റഡിയിലെടുക്കുകയായിരുന്നു. യുവതിയുടെ തലയിലും കഴുത്തിലും പരിക്കേറ്റതായും ആശുപത്രിയിലേക്ക് മാറ്റിയതായും പൊലീസ് അറിയിച്ചു.
also read: '9-ാം വയസില്‍ എന്‍റെ പിതാവ് ക്ലീനര്‍ ബോയി ആയിരുന്നു, ജീവിക്കുന്നത് മകള്‍ക്ക് വേണ്ടി'; സുനില്‍ ഷെട്ടി
‘അദ്ദേഹം തെറ്റൊന്നും ചെയ്തിട്ടില്ല, അദ്ദേഹത്തിൻ്റെ പേരിന് വന്ന കളങ്കം മായ്ക്കുന്നതിനും, എല്ലാം ശരിയാക്കുന്നതിനുമുള്ള പരിശ്രമത്തിലാണ് ഞങ്ങൾ’ - മേജേഴ്‌സിൻ്റെ പ്രധിനിധി മാധ്യമങ്ങളോട് പറഞ്ഞു. ഹോളിവുഡില്‍ മികവോടെ വില്ലൻ വേഷങ്ങൾ ചെയ്യുന്ന നടൻ ആരാണെന്ന ചോദ്യത്തിന് ഒരു ഉത്തരമേയുള്ളൂ ജൊനാഥൻ മേജേഴ്‌സ്. മാർവൽ സിനിമാറ്റിക് യൂണിവേഴ്‌സിലെ നിലവിലെ ഏറ്റവും വലിയ വില്ലൻ വേഷം ചെയ്യുന്ന മേജേഴ്‌സിന് പ്രായഭേദമന്യേ മാർവൽ ആരാധകരുടെ മനസിലുള്ള സ്ഥാനം വളരെ വലുതാണ്.
ലോക്കി സീരീസിലൂടെ മാർവല്‍ സിനിമാറ്റിക് യൂണിവേഴ്‌സിൽ കാൽ എടുത്തുവച്ച മേജേഴ്‌സിൻ്റെ ഏറ്റവും ഒടുവിലത്തെ സിനിമ ‘ആൻ്റ് -മാൻ ആൻഡ് ദി വാസ്പ്: ക്വാണ്ടുമാനിയ'യാണ്. ലോക്കി സീരീസിലെ അദ്ദേഹത്തിൻ്റെ കഥാപാത്രമായ കാങ്ങായിത്തന്നെയാണ് ‘ആൻ്റ് -മാൻ ആൻഡ് ദി വാസ്പ്: ക്വാണ്ടുമാനിയ'യിലും മേജേഴ്‌സ് വേഷമിട്ടത്.
‘ക്രീഡ് 3’ യിലും വില്ലൻ : ഈ അടുത്ത് പുറത്തിറങ്ങിയ അദ്ദേഹത്തിൻ്റെ ഏറ്റവും പുതിയ സിനിമയായ ‘ക്രീഡ് 3’ യിലും വില്ലൻ വേഷത്തിൽ തിളങ്ങിയ മേജേഴ്‌സ് തനിക്ക് ഉള്ള ആരാധകരുടെ എണ്ണം ഒന്നുകൂടെ ഊട്ടി ഉറപ്പിക്കുകയായിരുന്നു. ക്രീഡ് 3 യിലെ നായകനായ മൈക്കിൾ ബി ജോർദാൻ മാർവൻ സിനിമാറ്റിക് യൂണിവേഴ്‌സിൻ്റെ ‘ബ്ലാക്ക് പാന്തർ’ സിനിമയിൽ കിൽമോങ്കർ എന്ന വില്ലൻ വേഷം ചെയ്‌തതിനാൻ തന്നെ രണ്ട് മാർവൽ താരങ്ങൾ ബോക്സിങ് സിനിമയായ ക്രീഡ് 3ൽ നേരിട്ട് ഏറ്റുമുട്ടുന്നത് ആരാധകരെ പ്രതീക്ഷയുടെ അറ്റത്ത് എത്തിച്ചിരുന്നു. ആരാധകരുടെ പ്രതീക്ഷകൾക്ക് അനുസരിച്ച് ഒരു മികച്ച ആക്ഷൻ സിനിമയായാണ് ക്രീഡ് 3 തിയേറ്ററുകളിലെത്തിയത്.
also read: ടൊവിനോയുടെ 'നീലവെളിച്ചം' ഒരു ദിവസം മുന്നേയെത്തും
ഇന്ന് ഹോളിവുഡിൽ പ്രവർത്തിക്കുന്ന ഏറ്റവും കൂടുതൽ ഡിമാൻഡുള്ള അഭിനേതാക്കളിൽ ഒരാളാണ് മേജേഴ്‌സ്. ഈ വർഷംഅവസാനം പുറത്തിറങ്ങുമെന്ന് പ്രതീക്ഷിക്കുന്ന 'ലോകി' സീസൺ 2ൽ അദ്ദേഹം പ്രത്യക്ഷപ്പെടുമെന്നും സിനിമാലോകത്ത് അഭ്യൂഹങ്ങൾ പരക്കുന്നുണ്ട്.
