മുംബൈ: 'ബോളിവുഡിന് എന്നെ താങ്ങാന്‍ കഴിയില്ല' എന്ന പരാമര്‍ശത്തില്‍ വിശദീകരണവുമായി നടന്‍ മഹേഷ് ബാബു രംഗത്ത്‌. ഇപ്പോള്‍ ഏത്‌ ഇന്‍ഡസ്ട്രിയിലാണോ പ്രവര്‍ത്തിക്കുന്നത്‌ അവിടെ ജോലി ചെയ്യാനാണ് തനിക്ക്‌ സൗകര്യമെന്ന് താരം വ്യക്തമാക്കി. തെലുങ്ക്‌ സിനിമ മുന്നേറുന്നതിലൂടെ തന്‍റെ സ്വപ്‌നം യാഥാര്‍ഥ്യമാകുന്നതില്‍ സന്തോഷമുണ്ടെന്നും അദ്ദേഹം പറഞ്ഞു. എസ്‌.എസ്‌ രാജമൗലിക്കൊപ്പമുള്ള തന്‍റെ അടുത്ത ചിത്രം ഒരു പാന്‍ ഇന്ത്യന്‍ സിനിമ ആയിരിക്കുമെന്നും താരം അറിയിച്ചു.
Mahesh Babu clarifies his statement: മഹേഷ് ബാബുവിന്‍റെ അഭിപ്രായ പ്രകടനം സോഷ്യല്‍ മീഡിയയില്‍ തുറന്ന ചര്‍ച്ചകള്‍ക്ക്‌ വഴിവച്ചിരുന്നു. താരത്തിനെതിരെ രൂക്ഷ വിമര്‍ശനങ്ങള്‍ ഉയര്‍ന്നു. നടന്‍റെ പ്രസ്‌താവനയില്‍ ചിലര്‍ നിരാശരായപ്പോള്‍ ചിലര്‍ ആക്ഷേപങ്ങളുമായും രംഗത്തെത്തി. 'നിങ്ങള്‍ക്ക്‌ ബോളിവുഡില്‍ ജോലി ചെയ്യാന്‍ താല്‍പ്പര്യമില്ല. കുഴപ്പമില്ല. പക്ഷേ ബോളിവുഡിന് നിങ്ങളെ താങ്ങാന്‍ കഴിയില്ലെന്ന് പറയുന്നത്‌ വളരെ ഗൗരവമുള്ള കാര്യമാണ്!! ഇത്‌ പരുഷവും അഹങ്കാരവും നിറഞ്ഞതാണ്. പക്ഷേ എനിക്കിപ്പോള്‍ മനസ്സിലായി. നിങ്ങള്‍ ആഗ്രഹിക്കുന്നിടത്ത്‌ ജോലി ചെയ്യൂ..' - ഒരു ട്വിറ്റര്‍ ഉപയോക്താവ് കുറിച്ചു.
Social media reacts on Mahesh Babu's statement: 'മഹേഷ് ബാബു ഒരിക്കലും ഇത്തരം അനാദരവും അഹങ്കാരവുമുള്ള പ്രസ്‌താവനകള്‍ നടത്തുന്ന വ്യക്തിയല്ലെന്ന് മറ്റൊരു ഉപയോക്താവ് കുറിച്ചു. 'അദ്ദേഹത്തിന്‍റെ ഉദ്ദേശ്യങ്ങള്‍ തെറ്റായ രീതിയിലാണ് പ്രകടമാക്കിയത്‌. വരുന്ന അഭിമുഖങ്ങളില്‍ ഈ തെറ്റായ പരാമര്‍ശങ്ങളെ അദ്ദേഹം തിരുത്തുമെന്ന് പ്രതീക്ഷിക്കുന്നു. സ്വഭാവത്തില്‍ മഹേഷ് പത്തരമാറ്റ്‌ പൊന്നാണ്. അദ്ദേഹം ഒരിക്കലും മാന്യമല്ലാത്തതും അഹങ്കാരവും നിറഞ്ഞതുമായ പ്രസ്‌താവനകള്‍ നടത്തില്ല' - മറ്റൊരു ഉപയോക്താവ് കുറിച്ചു.
Also Read: എന്നെ താങ്ങാന്‍ ബോളിവുഡിന് കഴിയില്ല, ഹിന്ദിയില്‍ അഭിനയിക്കാത്തതിനെ കുറിച്ച് മഹേഷ് ബാബു
'മഹേഷ് ബാബു ഒട്ടും അഹങ്കാരിയല്ല. അഭിമുഖത്തില്‍ അദ്ദേഹത്തിന്‍റെ വാചകം മാധ്യമങ്ങള്‍ വളച്ചൊടിച്ചതാണ്. താരം ഇതുവരെ ബോളിവുഡില്‍ സിനിമ ചെയ്‌തിട്ടില്ല. അതുകൊണ്ട്‌ ബോളിവുഡില്‍ എത്രപേര്‍ക്ക്‌ അറിയുമെന്നതില്‍ താരത്തിന് ഭയമുണ്ടെന്നും അദ്ദേഹം പറഞ്ഞു ' - ഒരു ട്വിറ്റര്‍ ഉപയോക്താവ് കുറിച്ചു.
Mahesh Babu career: തെലുങ്ക്‌ നടന്‍ കൃഷ്‌ണയുടെ മകനാണ് മഹേഷ് ബാബു. പിതാവിന്‍റെ ചിത്രത്തിലൂടെ ബാലതാരമായാണ് അരങ്ങേറ്റം. 1989ല്‍ പുറത്തിറങ്ങിയ 'പോരാട്ടം' എന്ന സിനിമയിലൂടെയാണ് ബാലതാരമായി വെള്ളിത്തിരയിലേക്ക് ചുവടുവച്ചത്. 1999ല്‍ പ്രീതി ടസിന്‍റയ്‌ക്കൊപ്പം 'രാജ കുമാരുഡു' എന്ന ചിത്രത്തിലൂടെ നായകനായി. 'ബിസിനസ്സുമാന്‍', 'ശ്രീമന്തുഡു', 'അത്താടു', 'പോക്കിരി', 'അതിഥി', 'ദൂക്കുഡു', 'സ്‌പൈഡര്‍', 'ഭാരത്‌ ആനേ നേനു', 'മഹര്‍ഷി' തുടങ്ങിയ നിരവധി ബ്ലോക്ക്‌ബസ്‌റ്ററുകള്‍ മഹേഷ് സമ്മാനിച്ചിട്ടുണ്ട്‌.
Mahesh Babu upcoming movies: 'സര്‍ക്കാരു വാരി പാട്ട' ആണ് മഹേഷിന്‍റേതായി റിലീസിനൊരുങ്ങുന്ന ഏറ്റവും പുതിയ ചിത്രം. മെയ്‌ 12നാണ് ചിത്രം റിലീസിനെത്തുക. അദിവി ശേഷ്‌ നായകനായെത്തുന്ന 'മേജര്‍' ആണ് താരത്തിന്‍റെ നിര്‍മാണത്തില്‍ ഒരുങ്ങുന്ന ചിത്രം. ജൂണ്‍ മൂന്നിന് ചിത്രം തിയേറ്ററുകളിലെത്തും.
