Kerala State Film Awards : സംസ്ഥാന ചലച്ചിത്ര പുരസ്‌കാര പ്രഖ്യാപനത്തിന് ഇനി മണിക്കൂറുകള്‍ മാത്രം. വെള്ളിയാഴ്‌ച വൈകിട്ട് അഞ്ച്‌ മണിക്ക് മന്ത്രി സജി ചെറിയാന്‍ പ്രഖ്യാപനം നടത്തും. താര രാജാക്കന്‍മാരും താരപുത്രന്‍മാരും തമ്മില്‍ മത്സരിക്കുന്നു എന്നതാണ് ഇത്തവണത്തെ സവിശേഷത.
മമ്മൂട്ടി, മോഹന്‍ലാല്‍, ദുല്‍ഖര്‍ സല്‍മാന്‍, പ്രണവ് മോഹന്‍ലാല്‍ എന്നിവരുടെ ചിത്രങ്ങള്‍ മാറ്റുരയ്ക്കുന്നുവെന്നത് ആരാധകരുടെ ആകാംക്ഷ വര്‍ദ്ധിപ്പിക്കുന്നു. ഇവര്‍ക്കൊപ്പം മിന്നും പ്രകടനം കാഴ്‌ചവച്ച ഇന്ദ്രന്‍സ്‌, ഗുരു സോമസുന്ദരം, സുരാജ്‌ വെഞ്ഞാറമൂട്‌ എന്നിവരും മത്സരരംഗത്തുണ്ട്‌.
മമ്മൂട്ടിയുടെ 'വണ്‍', 'ദ പ്രീസ്‌റ്റ്‌', മോഹന്‍ലാലിന്‍റെ 'ദൃശ്യം 2', സുരേഷ്‌ ഗോപിയുടെ 'കാവല്‍', പ്രണവ് മോഹന്‍ലാലിന്‍റെ 'ഹൃദയം', റോജിന്‍ തോമസിന്‍റെ 'ഹോം' തുടങ്ങി 142 സിനിമകളാണ് ഇത്തവണ മത്സരിക്കുന്നത്‌. ജയരാജ്‌ സംവിധാനം ചെയ്‌ത അവള്‍, നിറയെ തത്തകളുള്ള മരം, പ്രകാശം പരത്തുന്ന ഒരു പെണ്‍കുട്ടി, താര രാമാനുജന്‍റെ 'നിഷിദ്ധോ', സിദ്ധാര്‍ഥ ശിവയുടെ 'ആണ്', മനോജ്‌ കാനയുടെ 'ഖെദ്ദ', 'അവനോവിലോന', ഡോ.ബിജുവിന്‍റെ 'ദ പോര്‍ട്രെയ്‌റ്റ്‌' എന്നിവയും മികച്ച ചിത്രത്തിനുള്ള മത്സരത്തിനുണ്ട്‌.
Also Read: ആദ്യ സൂപ്പര്‍ഹീറോയ്‌ക്ക്‌ വീണ്ടും അംഗീകാരം; കൂടുതല്‍ തിളങ്ങി മിന്നല്‍ മുരളി
പൃഥ്വിരാജ്‌, ഫഹദ്‌ ഫാസില്‍, ടൊവിനോ തോമസ്‌, നിവിന്‍ പോളി, ജയസൂര്യ, കുഞ്ചാക്കോ ബോബന്‍, ആസിഫ്‌ അലി, ദിലീപ്‌, ബിജു മേനോന്‍, ജോജു ജോര്‍ജ്‌, ചെമ്പന്‍ വിനോദ്‌, സൗബിന്‍ ഷാഹിര്‍, അനൂപ് മേനോന്‍, ഉണ്ണി മുകുന്ദന്‍, സണ്ണി വെയ്‌ന്‍ തുടങ്ങിയ നടന്‍മാരുടെ ചിത്രങ്ങളും മത്സരരംഗത്തുണ്ട്‌.
മഞ്ജു വാര്യര്‍, പാര്‍വതി തിരുവോത്ത്‌, കല്യാണി പ്രിയദര്‍ശന്‍, ദര്‍ശന രാജേന്ദ്രന്‍, രജിഷ വിജയന്‍, അന്ന ബെന്‍, നിമിഷ സജയന്‍, ഐശ്വര്യലക്ഷ്‌മി, ഉര്‍വശി, ഗ്രേസ്‌ ആന്‍റണി, നമിത പ്രമോദ്‌, സുരഭി, മംമ്‌ത മോഹന്‍ദാസ്‌, ലെന, മഞ്ജു പിള്ള, റിയ സൈര, ശൃതി സത്യന്‍, അഞ്‌ജു കുര്യന്‍, വിന്‍സി അലോഷ്യസ്‌, ഡയാന, ദിവ്യ എം.നായര്‍ തുടങ്ങിയവരുടെ സിനിമകളും മത്സരിക്കുന്നുണ്ട്‌.
മത്സരത്തിനെത്തിയ 142 സിനിമകള്‍ രണ്ട്‌ പ്രാഥമിക ജൂറികള്‍ കണ്ട ശേഷം മികച്ച 40-45 സിനിമകള്‍ അന്തിമ ജൂറിക്ക് വിലയിരുത്താന്‍ വിട്ടു. ഹിന്ദി സംവിധായകനും തിരക്കഥാകൃത്തുമായ സയ്യിദ്‌ അഖ്‌തര്‍ മിര്‍സ ചെയര്‍മാനായ അന്തിമ ജൂറിയാണ് പുരസ്‌കാര നിര്‍ണയം നടത്തുന്നത്.
