ജോജു ജോര്ജ് ഇരട്ട വേഷത്തിലെത്തിയ ചിത്രമാണ് 'ഇരട്ട'. ജോജുവിന്‍റെ കരിയറിലെ ഏറ്റവും മികച്ച പ്രകടനങ്ങളില്‍ ഒന്നായാണ് ചിത്രം തിയേറ്ററുകളിലെത്തിയത്. നവാഗതനായ രോഹിത് എം.ജി കൃഷ്‌ണന്‍ സംവിധാനം ചെയ്‌ത സിനിമയ്‌ക്ക് തിയേറ്ററുകളില്‍ മികച്ച സ്വീകാര്യത ലഭിച്ചിരുന്നു.
'ഇരട്ട' ഒടിടിയിലും എത്തുകയാണിപ്പോള്‍. നെറ്റ്‌ഫ്ലിക്‌സിലൂടെ മാര്‍ച്ച് 3നാണ് ചിത്രം ഡിജിറ്റല്‍ പ്ലാറ്റ്‌ഫോമില്‍ സ്‌ട്രീമിംഗ് ആരംഭിക്കുക. ഫെബ്രുവരി 3നായിരുന്നു 'ഇരട്ട'യുടെ തിയേറ്റര്‍ റിലീസ്. തിയേറ്റര്‍ റിലീസ് കഴിഞ്ഞ് ഒരുമാസം ആകുന്ന സാഹചര്യത്തിലാണ് ചിത്രം ഒടിടിയിലെത്തുന്നത്.
പ്രഖ്യാപനം മുതല്‍ 'ഇരട്ട' മാധ്യമ ശ്രദ്ധ നേടിയിരുന്നു. സിനിമയ്‌ക്കായി പ്രൊമോ ഗാനം പാടിയും ജോജു ജോര്ജ് പ്രേക്ഷകരുടെ കൈയടി ഏറ്റുവാങ്ങിയിരുന്നു. ജോജു ജോര്‍ജും ബെനടിക്‌ ഷൈനും ചേര്‍ന്ന് പാടിയ 'എന്തിനാടി പൂങ്കൊടിയേ' എന്ന പ്രൊമോ ഗാനം സോഷ്യല്‍ മീഡിയയില്‍ ഏറെ ശ്രദ്ധ നേടിയിരുന്നു.
ഒരു പൊലീസ് ക്രൈം ഇന്‍വെസ്‌റ്റിഗേഷന്‍ ത്രില്ലറാണ്‌ 'ഇരട്ട'. ജോജു ജോര്ജ് ആദ്യമായി ഇരട്ട വേഷത്തിലെത്തിയ ചിത്രമെന്ന പ്രത്യേകതയോടു കൂടിയാണ് ചിത്രം പുറത്തിറങ്ങിയത്. വിനോദ്, പ്രമോദ് എന്നീ ഇരട്ട സഹോദരങ്ങളുടെ വേഷമായിരുന്നു സിനിമയില്‍ ജോജുവിന്. ചിത്രത്തില്‍ ജോജുവിന്‍റെ ഒരു കഥാപാത്രം പൊലീസിന്‍റെ വേഷത്തിലാണ് എത്തുന്നത്.
മലയാളം തമിഴ് താരം അഞ്ജലിയാണ് ചിത്രത്തിലെ നായിക. ശ്രിന്ദ, സാബു മോന്‍, ശ്രീകാന്ത് മുരളി, ആര്യ സലിം, അഭിറാം തുടങ്ങിയവരും ചിത്രത്തില്‍ സുപ്രധാന വേഷങ്ങളില്‍ എത്തിയിരുന്നു. ജോജു ജോര്‍ജിന്‍റെ ഉടമസ്ഥതയിലുള്ള അപ്പു പാത്തു പപ്പു പ്രൊഡക്ഷന്‍സും, മാര്‍ട്ടിന്‍ പ്രകാട്ട് ഫിലിംസും, സിജോ വടക്കനും ചേര്‍ന്നാണ് സിനിമയുടെ നിര്‍മാണം.
മനു ആന്‍റണി എഡിറ്റിംഗും വിജയ്‌ ഛായാഗ്രഹണവും നിര്‍വഹിച്ചു. അന്‍വര്‍ അലിയുടെ വരികള്‍ക്ക് ജേക്‌സ്‌ ബിജോയ് ആണ് സംഗീതം ഒരുക്കിയിരിക്കുന്നത്. സമീറ സനീഷ് വസ്‌ത്രാലങ്കാരവും റോണെക്‌സ്‌ സേവ്യര്‍ മേക്കപ്പും ദിലീപ് നാഥ് കലാസംവിധാനവും കെ രാജശേഖര്‍ സംഘട്ടനും ഒരുക്കി.
Also Read: ഇരട്ടയ്‌ക്ക് വേണ്ടി പാട്ട് പാടി ജോജു ജോര്ജ്; റിലീസിന് ഇനി ദിവസങ്ങള്‍ മാത്രം
