കൊച്ചി: ചാലക്കുടിയിലെ യുഡിഎഫ് സ്ഥാനാർഥി ബെന്നി ബെഹന്നാനും കിഴക്കമ്പലം പഞ്ചായത്ത് ഭരിക്കുന്ന ട്വന്റി-20 യും തമ്മിലുള്ള പോര് മുറുകുന്നു. ലോക്സഭാ തെരഞ്ഞെടുപ്പില്‍ കിറ്റെക്സിന്‍റെ ഉടമസ്ഥതയിലുള്ള ട്വന്റി - 20 എത്രത്തോളം നിര്‍ണായകമാകുമെന്ന ചോദ്യത്തിന് അത് ക്രിക്കറ്റിലാണെന്നും ഒരു പഞ്ചായത്ത് വിചാരിച്ചാല്‍ ഒരു ചുക്കും ചെയ്യാന്‍ കഴിയില്ലെന്നും ബെന്നി ബെഹന്നാന് പരിഹസിച്ചിരുന്നു. ഇതിന് പിന്നാലെ ഇതിന്റെ ദൃശ്യങ്ങള്‍ സഹിതമുള്ള ട്രോള്‍ വീഡിയോയാണ് ട്വന്റി-20 പുറത്തിറക്കിയത്. ബെന്നി ബെഹന്നാന് തെരഞ്ഞെടുപ്പിലൂടെ മറുപടി കൊടുക്കുമെന്ന് ട്വന്റി-20 ചീഫ് കോർഡിനേറ്റർ സാബു എം ജേക്കബ് തുറന്നടിച്ചു.
മുന്‍ വിജിലന്‍സ് ഡയറക്ടര്‍ ജേക്കബ് തോമസിനെ ചാലക്കുടിയില്‍ സ്ഥാനാര്‍ഥിയാക്കാന്‍ ട്വന്റി-20 തീരുമാനിച്ചെങ്കിലും നീക്കം പാളി. ഇതിന് പിന്നാലെയാണ് യുഡിഎഫ് സ്ഥാനാര്‍ഥിക്കെതിരെ പരസ്യ നിലപാടുമായി ഇവര്‍ രംഗത്തെത്തിയത്. ബെന്നി ബെഹന്നാന് വോട്ട് ചെയ്യരുതെന്ന് ആഹ്വാനം ചെയ്ത് കിഴക്കമ്പലത്ത് പ്രതിഷേധ പ്രകടനവും നടന്നിരുന്നു. സ്ഥാനാര്‍ഥിയെ വ്യക്തിപരമായി ആക്ഷേപിക്കുന്നുവെന്ന് ചൂണ്ടിക്കാട്ടി യുഡിഎഫ് തെരഞ്ഞെടുപ്പ് കമ്മീഷനില്‍ പരാതി നല്‍കിയിരുന്നു. ഇതിനിടെ കമ്പനിയും സ്ഥാനാര്‍ഥിയും തമ്മിൽ മുൻ വൈരാഗ്യമുണ്ടെന്ന വാദവും ഉയരുന്നുണ്ട്.
