തിരുവനന്തപുരം: മെഡിക്കൽ കോളജിലെ ഇ കെ നായനാർ ചാരിറ്റബിൾ ട്രസ്റ്റിന്‍റെ പ്രധാന കവാടത്തിലെ ചില്ല് ബിജെപി മഹിള മോർച്ച പ്രവർത്തകർ അടിച്ചു തകർത്തു. മെഡിക്കൽ കോളജ് കൗൺസിലർ ഡി ആർ അനിലിന്‍റെ ഓഫിസിലേക്ക് ബിജെപി പ്രവർത്തകർ നടത്തിയ മാർച്ചിലാണ് ആക്രമണം നടന്നത്. പ്രകടനവുമായെത്തിയ 75ഓളം ബിജെപി പ്രവർത്തകർ ആദ്യം കയ്യിൽ കരുതിയിരുന്ന കരിഓയിൽ ഒഴിക്കുകയും ഓഫിസിലേക്ക് തള്ളിക്കയറാൻ ശ്രമിക്കുകയും ചെയ്‌തു.
തുടർന്ന്, നടന്ന ഉന്തുംതള്ളലിനുമിടയിൽ ഓഫിസിലെ ഗ്ലാസ് ഡോർ തകരുകയായിരുന്നു. പ്രവർത്തകരെ ബലമായി പിടിച്ചു മാറ്റിയ പൊലീസ് 20 പ്രവർത്തകരെ കസ്റ്റഡിയിൽ എടുത്തു. ഇവർക്കെതിരെ പൊതുമുതൽ നശിപ്പിച്ചതിനെതിരെയുളള വകുപ്പുകൾ ചുമത്തുമെന്ന് പൊലീസ് അറിയിച്ചു.
ഡെപ്യൂട്ടി മേയർ പി കെ രാജു, ഡി ആർ അനിൽ എന്നിവർ സ്ഥലം സന്ദർശിച്ചു. എന്നാൽ തനിക്ക് അവിടെ ഓഫിസ് ഇല്ലെന്ന് ഡി ആർ അനിൽ പറഞ്ഞു. സംഭവത്തിൽ പ്രതിഷേധിച്ച് സിപിഎം പ്രവർത്തകർ പ്രകടനം നടത്തി.
