ടോങ്ക് (രാജസ്ഥാന്‍) : പ്രണയിച്ചതിനും ഒരുമിച്ച് താമസിച്ചതിനും യുവാവിനെ ക്രൂരമായി മര്‍ദിച്ചും മൂത്രം കുടിപ്പിച്ചും യുവതിയുടെ ബന്ധുക്കള്‍. രാജസ്ഥാനിലെ ടോങ്കിലാണ് 21കാരിയുമായി പ്രണയത്തിലായി ഒരുമിച്ച് താമസിച്ചതിന് മുണ്ഡിയ കല ഗ്രാമത്തിലെ യുവാവിനെ താലിബാന്‍ മോഡല്‍ ആക്രമണത്തിന് ഇരയാക്കിയത്. യുവാവിന്‍റെ സഹോദരിക്കുനേരെയും സംഘം ആക്രമണം അഴിച്ചുവിട്ടു.
യുവതിയുടെ മാതാപിതാക്കളും ബന്ധുക്കളുമായ എട്ടുപേര്‍ക്കെതിരെ സംഭവത്തില്‍ യുവാവ് പരാതി നല്‍കി. ഇതിനെ തുടര്‍ന്ന് യുവതിയുടെ ബന്ധുക്കളായ ഏഴുപേരുമായി ബന്ധപ്പെട്ടുവെന്നും മൂന്ന് പേരുടെ അറസ്‌റ്റ് രേഖപ്പെടുത്തിയെന്നും പ്രദേശത്തെ പൊലീസ് സ്‌റ്റേഷന്‍ ഹൗസ് ഓഫിസര്‍ ഭഗീരഥ് സിങ് അറിയിച്ചു. യുവതിയുടെ അച്ഛന്‍ നവ്‌രതന്‍ ലാല്‍, അമ്മ, സഹോദരന്‍ ശങ്കര്‍, സഹോദരി സാവിത്രി, മറ്റൊരു സഹോദരി സാന്ദ്ര, സഹോദരീഭര്‍ത്താവ് പരസ്, അദ്ദേഹത്തിന്‍റെ സഹോദരന്‍ ഹേമ്‌രാജ് എന്നിവര്‍ക്കെതിരെ ഇന്ത്യന്‍ ശിക്ഷാ നിയമത്തിലെ 143, 342, 354, 500 വകുപ്പുകള്‍ ചുമത്തിയതായും എസ്‌എച്ച്ഒ വ്യക്തമാക്കി. യുവാവിന്‍റെ സഹോദരിയോട് മോശമായി പെരുമാറിയതിനും ഇവര്‍ക്കെതിരെ കുറ്റം ചുമത്തിയതായും അദ്ദേഹം കൂട്ടിച്ചേര്‍ത്തു.
നേരിട്ടത് പൈശാചിക പീഡനം : നവംബര്‍ ഏഴിന് വൈകുന്നേരമാണ് സംഭവം. ഗ്രാമസഭ കൂടിയ ശേഷമാണ് മോഗ്യ സമൂഹത്തിലെ പഞ്ച് പട്ടേല്‍ വിഭാഗത്തില്‍പ്പെട്ട യുവതിയുടെ ബന്ധുക്കള്‍ മുണ്ഡിയ കല നിവാസിയായ യുവാവിനെ ചെരിപ്പ് കൊണ്ട് തല്ലി അവശനാക്കിയത്. തുടര്‍ന്ന് യുവാവിനെയും സഹോദരനെയും ചെരിപ്പ് മാലയിട്ട് നടത്തിച്ച ശേഷം സംഘം കൈയ്യില്‍ കരുതിയ മൂത്രം ഇയാളെ ബലം പ്രയോഗിച്ച് കുടിപ്പിക്കുകയായിരുന്നു.
സംഭവത്തിന്‍റെ പിന്നാമ്പുറങ്ങളിലേക്ക് : പ്രദേശവാസികള്‍ പറയുന്നതനുസരിച്ച് രണ്ടാഴ്‌ച മുമ്പാണ് മല്‍പുര ഗ്രാമത്തിലെ അവിവാഹിതയായ യുവതി പ്രണയത്തെ തുടര്‍ന്ന് യുവാവിനൊപ്പം താമസിക്കാനായി വീടുവിട്ട് ഇറങ്ങുന്നത്. തുടര്‍ന്ന് ഇതേക്കുറിച്ചുള്ള ചര്‍ച്ചയ്ക്കായി ഭോപാലോ ക്ഷേത്ര പരിസരത്ത് പൗരപ്രമാണികള്‍ ഇരുവരെയും ക്ഷണിച്ചു. ഇതിനായി യുവാവും സഹോദരിയുമൊന്നിച്ചാണെത്തിയത്.
എന്നാല്‍ വിഷയം ചര്‍ച്ച ചെയ്‌ത ശേഷം നാട്ടുപ്രമാണികള്‍ യുവാവിന് പിഴ ശിക്ഷ നല്‍കി കരാര്‍ ഒപ്പിട്ട് വിട്ടയക്കുകയായിരുന്നു. എന്നാല്‍ ഇവിടെ നിന്ന് ഇറങ്ങിയ ശേഷം യുവാവിനെയും സഹോദരിയെയും യുവതിയുടെ ബന്ധുക്കള്‍ തട്ടിക്കൊണ്ടുപോവുകയും അക്രമിക്കുകയും ചെയ്തു. ഇതിന്‍റെ ക്രൂര ദൃശ്യങ്ങള്‍ സമൂഹമാധ്യമങ്ങളില്‍ പ്രചരിച്ചതോടെയാണ് പൊലീസ് ഇടപെടുന്നതും മൂന്നുപേരുടെ അറസ്‌റ്റ് രേഖപ്പെടുത്തുന്നതും.
പിന്നീട് എന്ത് സംഭവിച്ചു: എന്നാല്‍ സംഭവം വലിയ വിവാദമായതോടെ യുവതിയുടെ ബന്ധുക്കള്‍ ഇയാളെ സമീപിച്ച് കേസിന് പോകാതിരുന്നാല്‍ 5.51 ലക്ഷം രൂപ നല്‍കാമെന്ന് വാഗ്‌ദാനം നല്‍കി 500 രൂപയുടെ മുദ്ര കടലാസില്‍ ഒപ്പിട്ട് വാങ്ങി. ഭയം കാരണമാണ് താന്‍ അതിന് സമ്മതിച്ചതെന്ന് യുവാവ് പറയുന്നു. രണ്ട് വര്‍ഷം മുമ്പാണ് യുവാവിനെ ആദ്യ ഭാര്യ ഉപേക്ഷിച്ചത്. ഒരു മകനും, മകളുമുള്ള യുവാവിന്‍റെ ജീവിതത്തിലേക്ക് അങ്ങനെയിരിക്കെയാണ് യുവതി കടന്നുവരുന്നത്.
