വിശാഖപട്ടണം : കടം നല്‍കിയ 500 രൂപ തിരികെ ആവശ്യപ്പെട്ടതിന് വിശാഖപട്ടണത്ത് യുവാവിനെ കഴുത്തറുത്ത് കൊലപ്പെടുത്തി. അപ്പണ്ണ റെഡ്ഡി എന്നറിയപ്പെടുന്ന അപ്പല റെഡ്ഡിയാണ് (32) കൊല്ലപ്പെട്ടത്. നിരവധി കേസുകളില്‍ ഉള്‍പ്പെട്ട ശങ്കര്‍ എന്നയാളാണ് പ്രതി.
ജൂലൈ 22-ന് പെഡവൽതേര്‍ മാനസാബു തെരുവില്‍ അപ്പലറെഡ്ഡിയുടെ വീടിനടുത്താണ് സംഭവം. മദ്യം വാങ്ങുന്നതിനായാണ് ശങ്കര്‍, റെഡ്ഡിയില്‍ നിന്ന് 500 രൂപ കടമായി വാങ്ങിയത്. ഈ രൂപ തിരികെ നല്‍കാന്‍ കാലതാമസം എടുത്തത് അപ്പല റെഡ്ഡിയെ ചൊടിപ്പിച്ചു.
മരണം നടന്ന ദിവസം, അപ്പലറെഡ്ഡി തുകയെ ചൊല്ലി ശങ്കറിന്‍റെ സഹോദരനുമായി വാക്കേറ്റത്തില്‍ ഏര്‍പ്പെട്ടിരുന്നു. ഈ തര്‍ക്കമാണ് കൊലയിലേക്ക് നയിച്ചതെന്ന് പൊലീസ് വ്യക്തമാക്കി. രണ്ട് പേര്‍ ചേര്‍ന്നാണ് അപ്പല റെഡ്ഡിയെ വകവരുത്തിയത്.
പ്രതികള്‍ക്കായുള്ള തിരച്ചില്‍ ഊര്‍ജിതമാക്കിയിട്ടുണ്ട്. സംഭവത്തില്‍ അന്വേഷണം പുരോഗമിക്കുകയാണെന്ന് ദ്വാരക എ.സി.പി മൂര്‍ത്തി പറഞ്ഞു.
