കോട്ടയം: ഭാര്യ സഹോദരനെ കുത്തി കൊലപ്പെടുത്താന്‍ ശ്രമിച്ച സംഭവത്തില്‍ ഒരാള്‍ അറസ്റ്റില്‍. ചേര്‍ത്തല തണ്ണീര്‍മുക്കം സ്വദേശിയായ ജിജോയാണ് (40) അറസ്റ്റിലായത്. ഇന്നലെയാണ് മണിമല പൊലീസ് ഇയാളെ അറസ്റ്റ് ചെയ്‌തത്.
ഭാര്യ സഹോദരനായ ജിബിനെയാണ് ഇയാള്‍ കത്രിക കൊണ്ട് കുത്തി കൊലപ്പെടുത്താന്‍ ശ്രമിച്ചത്. തിങ്കളാഴ്‌ച രാത്രിയാണ് കേസിനാസ്‌പദമായ സംഭവം. ജിജോയും ഭാര്യയും തമ്മില്‍ വീട്ടില്‍ വച്ച് വഴക്കുണ്ടായി. ഇതേ തുടര്‍ന്ന് ജിജോ ഭാര്യയെ ഉപദ്രവിച്ചപ്പോള്‍ ജിബിന്‍ തടയാന്‍ ശ്രമിച്ചു.
അതോടെ രോഷാകുലനായ ജിജോ ജിബിനെ കത്രിക കൊണ്ട് കുത്താന്‍ ശ്രമിച്ചു. സംഭവത്തെ തുടര്‍ന്ന് വീട്ടുകാര്‍ മണിമല പൊലീസില്‍ വിവരമറിയിച്ചു. ഇതേ തുടര്‍ന്ന് സ്ഥലത്തെത്തിയ പൊലീസ് ജിജോയെ അറസ്റ്റ് ചെയ്‌തു.
ഇയാളെ കോടതിയില്‍ ഹാജരാക്കി റിമാന്‍ഡ് ചെയ്‌തു. മണിമല സ്റ്റേഷൻ എസ്.എച്ച്.ഒ ഷാജിമോൻ.ബി, എസ്.ഐ മാരായ വിജയകുമാർ, സുരേഷ് ഇ.എസ്, സി.പി.ഓമാരായ പ്രതാപ്, അഭിലാഷ്, ശ്രീജിത്ത് എന്നിവര്‍ ചേര്‍ന്നാണ് ഇയാളെ അറസ്റ്റ് ചെയ്‌തത്.
