പത്തനംതിട്ട: ഇലന്തൂര്‍ ഇരട്ട നരബലി കേസില്‍ വഴിത്തിരിവായേക്കാവുന്ന സൂചനകള്‍ പുറത്ത്. കൊല്ലപ്പെട്ട സ്‌ത്രീകളില്‍ ഒരാളായ റോസ്‌ലിയുടെ മൃതദേഹത്തില്‍ കരളും വൃക്കയും ഉണ്ടായിരുന്നില്ല എന്നതിനാല്‍ കൊല്ലപ്പെട്ടവരുടെ അവയവങ്ങള്‍ കടത്തിയെന്ന സംശയമാണ് ബലപ്പെടുന്നത്. അതുകൊണ്ടുതന്നെ യുവതികളെ കൊന്നത് അവയവ കച്ചവടത്തിനാണോ എന്ന സാധ്യതയും അന്വേഷണ സംഘം പരിശോധിക്കുന്നുണ്ട്.
കേസില്‍ മുഖ്യപ്രതിയായ മുഹമ്മദ് ഷാഫിയുടെ ക്രിമിനല്‍ ബന്ധങ്ങളും മുന്‍കാല ഇടപാടുകളുമാണ് ഇത്തരം സാധ്യതകളിലേക്ക് അന്വേഷണ സംഘത്തെ എത്തിക്കുന്നത്. നാട്ടുകാരുൾപ്പെടെ ഇത്തരം സംശയങ്ങൾ തുടക്കം മുതൽ ഉന്നയിച്ചിരുന്നു. അതുകൊണ്ടുതന്നെ സ്‌ത്രീകളുടെ ശരീര ഭാഗങ്ങൾ പാകം ചെയ്‌ത്‌ ഭക്ഷിച്ചെന്ന പ്രതികളുടെ മൊഴികളിലും ദുരൂഹത നിറഞ്ഞിരുന്നു. അവയവങ്ങൾ കാണാതായത് സംബന്ധിച്ച അന്വേഷണം വന്നാൽ അതുവഴി തിരിച്ചുവിടാൻ പ്രതികൾ നടത്തിയ ഗൂഡലോചനയാണോ ഇതെന്നും സംശയം ഉയരുകയാണ്. മാത്രമല്ല കൊലപാതകം ഞെട്ടിച്ചുവെന്നും ഒരു തരത്തിലും ന്യായീകരിക്കില്ലെന്നും ഇതുസംബന്ധിച്ച് പൊലീസ് വിശദമായ അന്വേഷണം നടത്തണമെന്നും പ്രതിയായ ലൈലയുടെ സഹോദരൻ ഇടിവി ഭാരതിനോട് പറഞ്ഞിരുന്നു.
ഇതിനിടെ ഇലന്തൂരില്‍ കൊല്ലപ്പെട്ട സ്‌ത്രീകളിലൊരാളായ പത്മയുടെ മകന്‍ മൃതദേഹം വിട്ടുകിട്ടാന്‍ മുഖ്യമന്ത്രി പിണറായി വിജയന് പരാതി നല്‍കി. കഴിഞ്ഞ ആറുദിവസമായി പത്മയുടെ മൃതദേഹം കോട്ടയം മെഡിക്കല്‍ കോളജ് ആശുപത്രിയിലാണുള്ളതെന്നും മൃതദേഹം വിട്ടുകിട്ടാന്‍ നടപടിക്രമങ്ങള്‍ വേഗത്തിലാക്കണമെന്ന് നിര്‍ദേശിക്കണമെന്നും ആവശ്യപ്പെട്ടാണ് കത്ത് നല്‍കിയത്. മൃതദേഹം കൊണ്ടുപോകാന്‍ സര്‍ക്കാര്‍ സഹായം വേണമെന്നും ഇക്കാര്യത്തില്‍ അധികൃതര്‍ ഇടപെടണമെന്നും മകനും ബന്ധുക്കളും ആവശ്യപ്പെട്ടു.
ഡിഎന്‍എ സാംപിള്‍ ശേഖരിക്കുന്ന അടക്കമുള്ള നടപടികള്‍ പൂര്‍ത്തിയായിട്ടുണ്ടെങ്കിലും മൃതദേഹം ഇതുവരെയും വിട്ടുനല്‍കിയിട്ടില്ല. അതിനാല്‍ മൃതദേഹം ആചാരപ്രകാരം സംസ്‌കരിക്കാന്‍ സര്‍ക്കാര്‍ നടപടികള്‍ വേഗത്തിലാക്കണമെന്നാണ് കത്തിലെ ആവശ്യം. അതേസമയം കഴിഞ്ഞ ദിവസം ലഭിച്ച തെളിവുകള്‍ വിലയിരുത്തിയ ശേഷം പ്രതികളെ വീണ്ടും ഇലന്തൂരില്‍ എത്തിച്ചാല്‍ മതിയെന്നാണ് അന്വേഷണ സംഘത്തിന്‍റെ തീരുമാനമെന്നാണ് സൂചന. കേസില്‍ അന്വേഷണം ഊർജ്ജിതമായി തന്നെ പുരോഗമിക്കുകയാണ്.
