ഒരു കോടിയിലധികം കുഴല്‍പ്പണവുമായി വളാഞ്ചേരിയില്‍ ദമ്പതികള്‍ പിടിയില്‍

മഹാരാഷ്ട്ര സ്വദേശികളായ താനാജി മൗലിയും അര്‍ജനയുമാണ് പിടിയിലായത്.

മലപ്പുറം: വളാഞ്ചേരിയില്‍ രേഖകൾ ഇല്ലാത്ത ഒരു കോടിയിലധികം രൂപയും 117 ഗ്രാം സ്വര്‍ണവുമായി ദമ്പതികള്‍ പൊലീസ് പിടിയിൽ. ദമ്പതികള്‍ സഞ്ചരിച്ചിരുന്ന വാഹനത്തിന്‍റെ സീറ്റിന് അകത്ത് രഹസ്യ അറകൾ ഉണ്ടാക്കിയാണ് രേഖകളില്ലാത്ത പണവും സ്വർണവും കടത്താൻ ശ്രമിച്ചത്. സംഭവത്തിൽ മഹാരാഷ്ട്ര സ്വദേശിയായ താനാജി മൗലിയും ഭാര്യ അർജനയുമാണ് പിടിയിലായത്.

ഇരുവരും തൃപ്പൂണിത്തുറയിൽ താമസിച്ചാണ് കള്ളപ്പണ ഇടപാട് നടത്തുന്നത് എന്നാണ് പൊലീസിന് ലഭിച്ച സുചന. പൊലീസിനു ലഭിച്ച രഹസ്യവിവരത്തിന്‍റെ അടിസ്ഥാനത്തിൽ വളാഞ്ചേരി പൊലീസ് സ്റ്റേഷൻ പരിധിയിൽ നടത്തിയ വാഹനപരിശോധനയിലാണ് പണവുമായി ദമ്പതികൾ പൊലീസ് വലയിലായത്. തമിഴ്‌നാട്ടിലെ കോയമ്പത്തൂരിൽ നിന്ന് മലപ്പുറം വേങ്ങരയിലേക്ക് പണം കൊണ്ടു പോകുന്നു എന്നാണ് പൊലീസിന് വിവരം ലഭിച്ചത്.

500,200,100 രൂപ നോട്ടുകളുടെ കെട്ടുകളാണ് കടത്താന്‍ ശ്രമിച്ചത്. ഈ അടുത്ത കാലത്തായി സംസ്ഥാനത്തെ ഏറ്റവും കൂടുതൽ കുഴൽപ്പണ വേട്ട നടന്നത് വളാഞ്ചേരി പൊലീസ് സ്റ്റേഷൻ പരിധിയിലാണ്. ആറു കേസുകളിലായി ഏകദേശം എട്ടു കോടിയോളം രൂപയുടെ രേഖകളില്ലാത്ത പണമാണ് വളാഞ്ചേരി പൊലീസ് പിടികൂടിയത്