തിരുവനന്തപുരം: കത്തോലിക്ക സഭയുടെ സ്ഥാപനത്തില്‍ സഭ വൈദികന്‍റെ സാന്നിധ്യത്തില്‍ തൃക്കാക്കരയിലെ എല്‍ഡിഎഫ് സ്ഥാനാര്‍ഥിയെ പ്രഖ്യാപിച്ചതിനെ ചൊല്ലി ഉയര്‍ന്ന വിവാദം പുതിയ തലത്തിലേക്ക്. സ്ഥാനാര്‍ഥി ഡോ. ജോ ജോസഫ് കത്തോലിക്ക സഭയുടെ സ്ഥാനാര്‍ഥിയാണെന്ന വിമര്‍ശനം തുടക്കത്തിലുയര്‍ത്തി എല്‍ഡിഎഫിനെ പ്രതിരോധത്തിലാക്കിയ കോണ്‍ഗ്രസ്, പ്രചാരണം തിരിച്ചടിക്കുമോ എന്ന ഭയത്തില്‍ പ്രസ്‌താവനയില്‍ നിന്ന് തലയൂരാനുള്ള ശ്രമത്തിലാണ്. സഭയുടെ സ്ഥാനാര്‍ഥിയെന്ന് താന്‍ പറഞ്ഞിട്ടില്ലെന്ന് നിലപാട് തിരുത്തിയ പ്രതിപക്ഷ നേതാവ് വി.ഡി സതീശന്‍, സ്ഥാനാര്‍ഥി സഭയുടേതെന്ന് വരുത്തിത്തീര്‍ക്കാന്‍ മന്ത്രി പി രാജീവ് സഭയുടെ പ്ലാറ്റ്‌ഫോം ഉപയോഗിക്കുകയാണെന്ന പുതിയ വാദം ഉയര്‍ത്തി.
സഭയുടെ സ്ഥാനാര്‍ഥിയെയാണ് എല്‍ഡിഎഫ് കെട്ടിയിറക്കിയതെന്ന് ഒരു യുഡിഎഫ് നേതാവും പറഞ്ഞിട്ടില്ലെന്നും തിരുത്തല്‍ വരുത്തി. സ്ഥാനാര്‍ഥി നിര്‍ണയവുമായി ബന്ധപ്പെട്ട് സിറോ മലബാര്‍ സഭയെയും കര്‍ദിനാള്‍ മാര്‍ ജോര്‍ജ് ആലഞ്ചേരിയെയും വലിച്ചിഴയ്ക്കുന്നത് യുഡിഎഫിന് തിരിച്ചടിയാകുമെന്ന് മുന്‍ മന്ത്രിയും ജില്ലയിലെ മുതിര്‍ന്ന നേതാവുമായ ഡൊമിനിക് പ്രസന്‍റേഷന്‍ മാധ്യമങ്ങളോട് പറഞ്ഞിരുന്നു. പിന്നാലെ മുതിർന്ന കോണ്‍ഗ്രസ് നേതാവ് രമേശ് ചെന്നിത്തലയും സഭ ഏതെങ്കിലും സ്ഥാനാര്‍ഥിയെ നിര്‍ത്തുമെന്ന് കരുതുന്നില്ലെന്നും ജോര്‍ജ് ആലഞ്ചേരി രാഷ്ട്രീയത്തില്‍ ഇടപെടുന്ന ആളല്ലെന്നും വ്യക്തമാക്കി രംഗത്തു വന്നതും വി.ഡി സതീശന്‍റെ നിലപാട് മാറ്റത്തിനുള്ള കാരണമായി വിലയിരുത്തപ്പെടുന്നു.
നിലപാട് മാറ്റത്തിന് പിന്നില്‍: വിഷയത്തില്‍ യുഡിഎഫില്‍ തന്നെ ഭിന്നതയെന്ന് തുടക്കത്തിലേ തോന്നലുണ്ടാക്കുന്നത് ഒരുപക്ഷേ തെരഞ്ഞെടുപ്പില്‍ ക്ഷീണമായേക്കുമെന്ന് വിലയിരുത്തലുണ്ടായി. എല്‍ഡിഎഫ് സ്ഥാനാര്‍ഥിയെ എതിര്‍ത്ത് രംഗത്തുവന്ന സഭയിലെ തന്നെ ആലഞ്ചേരി വിരുദ്ധരെ വഴി വിട്ട് പ്രോത്സാഹിപ്പിച്ചാല്‍ യുഡിഎഫിനെതിരായി സഭ വിശ്വാസികളുടെ കേന്ദ്രീകരണമുണ്ടാകുമോ എന്ന ആശങ്കയും ഉയർന്നു. ഇതോടെയാണ് കത്തോലിക്ക സഭയെ സ്ഥാനാര്‍ഥി നിര്‍ണയത്തിന്‍റെ പേരില്‍ വിമര്‍ശിക്കുന്നതില്‍ നിന്ന് വിട്ടുനില്‍ക്കണം എന്ന അഭിപ്രായം യുഡിഎഫില്‍ പ്രത്യേകിച്ചും സതീശനിലും സുധാകരനിലും ഉണ്ടായത്.
