തിരുവനന്തപുരം: കോണ്‍ഗ്രസിന്‍റെ പുതിയ അധ്യക്ഷന്‍ ഹിന്ദി മേഖലയില്‍ നിന്നാകണമെന്ന വാദമുയര്‍ത്തി തന്‍റെ സ്ഥാനാർഥിത്വത്തെ എതിര്‍ക്കുന്നവര്‍ക്ക് ഹിന്ദിയില്‍ മറുപടിയുമായി ശശി തരൂര്‍. തിരുവനന്തപുരത്ത് വച്ച് നടന്ന വാര്‍ത്ത സമ്മേളനത്തിനിടെ മാധ്യമ പ്രവര്‍ത്തകര്‍ ഇക്കാര്യം ചൂണ്ടിക്കാട്ടിയപ്പോഴാണ് വിമര്‍ശകര്‍ക്ക് തരൂർ ഹിന്ദിയില്‍ മറുപടി നല്‍കിയത്.
ആ മേഖലയില്‍ നിന്നുള്ള ആള്‍ വേണമെങ്കില്‍ തെരഞ്ഞെടുപ്പിലൂടെ വരട്ടെ. ഭാരതീയന്‍ ആവുകയാണ് പ്രധാനമെന്നും തരൂര്‍ പറഞ്ഞു. പ്രസിഡന്‍റ് സ്ഥാനത്തേക്ക് മത്സരം ഉണ്ടാകുന്നത് പാര്‍ട്ടിക്ക് ഗുണമേ ഉണ്ടാക്കൂവെന്ന വാദം ജി-23 അംഗം കൂടിയായ തരൂര്‍ ആവര്‍ത്തിച്ചു.
കോണ്‍ഗ്രസ് പാര്‍ട്ടിയെന്നാല്‍ ഒരു വ്യക്തിയല്ല. താന്‍ മത്സരിച്ചാലും ഇല്ലെങ്കിലും പാര്‍ട്ടിയില്‍ മാറ്റം വരണമെന്ന് നേരത്തെ വ്യക്തമാക്കിയിരുന്നു. ഇതു സംബന്ധിച്ച് ചര്‍ച്ച ചെയ്‌ത് ഉചിതമായ തീരുമാനത്തിലെത്തും. കൂടുതല്‍ ആളുകള്‍ മത്സരിക്കാന്‍ തയ്യാറാകുന്നുണ്ടെന്നും ശശി തരൂര്‍ വ്യക്തമാക്കി.
Also read: എഐസിസി പ്രസിഡന്‍റായി മത്സരിക്കാന്‍ ശശി തരൂർ യോഗ്യൻ: കെപിസിസി പ്രസിഡന്‍റ് കെ സുധാകരൻ
