തിരുവനന്തപുരം: കെ.എം ഷാജിക്കെതിരായ വിജിലൻസ് അന്വേഷണത്തില്‍ മുഖ്യമന്ത്രിയെ വിമര്‍ശിച്ച് പ്രതിപക്ഷം. മോദി ചെയ്യുന്നത് പോലെ എതിർക്കുന്നവരെ അധികാരം ഉപയോഗിച്ച് നേരിടുകയാണ് പിണറായിയെന്ന് പ്രതിപക്ഷ നേതാവ് രമേശ് ചെന്നിത്തല. ഷാജിക്കെതിരായ കേസ് രാഷ്ട്രീയപ്രേരിതമാണ്. ഇതിലൂടെ യുഡിഎഫിനെ തളർത്താമെന്ന് കരുതേണ്ട. കേസിനെ രാഷ്ട്രീയമായും നിയമപരമായും ശക്തമായി നേരിടുമെന്നും ചെന്നിത്തല പറഞ്ഞു.
സ്പ്രിംഗ്ലർ കരാറിൽ വ്യാജ ഒപ്പെന്ന ആരോപണം ഗൗരവമുള്ളതാണ്. നിയമ നടപടി അടക്കം ആലോചിക്കുന്നുണ്ട്. താൻ കാര്യങ്ങൾ കൂടുതൽ മനസിലാക്കിയതിന്‍റെ പ്രയാസമാണ് മുഖ്യമന്ത്രിക്കെന്നും ചെന്നിത്തല പറഞ്ഞു. പ്രതിപക്ഷ നേതാവിന് കാര്യങ്ങൾ മനസിലാക്കാൻ സമയം വേണ്ടിവരുമെന്ന മുഖ്യമന്ത്രിയുടെ പ്രസ്‌താവനക്കാണ് ചെന്നിത്തലയുടെ മറുപടി.
