തിരുവനന്തപുരം: കേരളത്തിന്‍റെ സ്വന്തം ഇലക്ട്രിക് ഓട്ടോകളായ നീം - ജി ഇനി നേപ്പാളിലെ നിരത്തുകളിലും. പൊതുമേഖല സ്ഥാപനമായ കേരള ഓട്ടോമൊബൈൽ ലിമിറ്റഡിൽ നിന്നാണ് നേപ്പാൾ ഇ - ഓട്ടോകൾ സ്വന്തമാക്കുന്നത്. ആദ്യഘട്ടമായി 25 ഓട്ടോകളാണ് കൈമാറുന്നത്. ഓട്ടോകളുമായി നേപ്പാളിലേയ്ക്കുള്ള ആദ്യ ട്രക്ക് തിരുവനന്തപുരം സെൻട്രൽ സ്റ്റേഡിയത്തിന് സമീപത്തുനിന്നും യാത്ര തിരിച്ചു.
പ്രതിവർഷം 500 ഇ- ഓട്ടോകളുടെ ഓർഡറാണ് നേപ്പാൾ നൽകിയത്. ബംഗ്ലാദേശും, ശ്രീലങ്കയും ഇ- ഓട്ടോകൾക്കായി കെ.എ.എല്ലിനെ സമീപിച്ചിട്ടുണ്ട്. അവരുമായുള്ള ചർച്ചകളും പുരോഗമിക്കുകയാണ്. നേരത്തെ തെലങ്കാന, ആന്ധ്രാപ്രദേശ് അടക്കമുള്ള സംസ്ഥാനങ്ങൾ ഇ ഓട്ടോകൾകൾക്കായി കെ.എ.എല്ലിനെ സമീപിച്ചിരുന്നു. കൊവിഡിന്‍റെ സാഹചര്യത്തിൽ ആശ്വാസ പദ്ധതിയായി 5 കോടി രൂപ കെഎഎല്ലിന് നൽകുമെന്ന് മന്ത്രി ഇ.പി ജയരാജൻ പറഞ്ഞു. വനിത സഹകരണ സംഘങ്ങൾ വഴി വനിതകൾക്ക് ഇ-ഓട്ടോകൾ നൽകാനുള്ള പദ്ധതി നടപ്പാക്കുമെന്നും അദ്ദേഹം വ്യക്തമാക്കി. പ്രതിവർഷം 7200 ഓട്ടോകൾ പുറത്തിറക്കാനാണ് കെ.എ എൽ ലക്ഷൃം വയ്ക്കുന്നത്. 2,85,000 രൂപയാണ് ഓട്ടോയുടെ വില. 30000 രൂപ സംസ്ഥാന സർക്കാർ സബ്സിഡിയും നൽകും.
