തിരുവനന്തപുരം : വിദ്യാര്‍ഥികള്‍ക്കായി 'വീട് ഒരു വിദ്യാലയം' പദ്ധതിയുമായി വിദ്യാഭ്യാസ വകുപ്പ്. കുട്ടിയുടെ വീടും പരിസരവും പരമാവധി പ്രയോജനപ്പെടുത്തി രക്ഷിതാവിന്‍റെ സഹായത്തോടെ പഠന നേട്ടം ഉറപ്പാക്കുന്നതിന് പൊതുവിദ്യാഭ്യാസ വകുപ്പിന്‍റെ നേതൃത്വത്തില്‍ സമഗ്ര ശിക്ഷാ കേരളം നടപ്പാക്കുന്ന പദ്ധതിയാണിത്.
അധ്യാപകരുടെയും രക്ഷിതാക്കളുടെയും പിന്തുണയോടുകൂടി പഠനപ്രവര്‍ത്തനങ്ങള്‍ ഓരോ കുട്ടിയിലുമെത്തിച്ച് വീട്ടില്‍ പഠനാനുകൂല അന്തരീക്ഷം ഉറപ്പാക്കുകയാണ് ലക്ഷ്യം.
അധ്യാപകരുടെയും രക്ഷിതാക്കളുടെയും പൊതുസമൂഹത്തിലെ വിദ്യാഭ്യാസ പ്രവര്‍ത്തകരുടെയും ജനപ്രതിനിധികളുടെയും കൂട്ടായ്‌മയിലൂടെയാണ് ഈ പദ്ധതി നടപ്പാക്കുന്നത്.
സംസ്ഥാനതല ഉദ്ഘാടനം വിദ്യാഭ്യാസ മന്ത്രി വി. ശിവന്‍കുട്ടി മണക്കാട് ഗവണ്‍മെന്‍റ് ഗേള്‍സ് വൊക്കേഷണല്‍ ഹയര്‍ സെക്കന്‍ഡറി സ്‌കൂളിലെ ഏഴാം ക്ലാസ് വിദ്യാര്‍ഥിനി ആതിര എം.ബിയുടെ വീട്ടിലെത്തി നിര്‍വഹിച്ചു.
READ MORE: ഓണ്‍ലൈൻ പഠനത്തിന് വിരാമമാവുന്നു; സ്കൂളുകള് ഘട്ടം ഘട്ടമായി തുറക്കും
കുട്ടികളും അധ്യാപകരും രക്ഷിതാക്കളും സര്‍ക്കാരും ചേര്‍ന്നുള്ള ഐക്യമുന്നണിയാണ് കൊവിഡ് കാലത്തെ വിദ്യാഭ്യാസത്തെ മുന്നോട്ട് നയിക്കുന്നതെന്ന് മന്ത്രി പറഞ്ഞു.
കൊവിഡ് മഹാമാരിയുടെ പശ്ചാത്തലത്തില്‍ സംസ്ഥാനത്തെ സ്കൂളുകള് ഒരുവര്‍ഷത്തിലേറെയായി തുറന്നുപ്രവര്‍ത്തിച്ചിട്ടില്ല.
വിദ്യാലയങ്ങളില്‍ നിന്ന് കുട്ടികള്‍ക്ക് ലഭിക്കുന്ന പഠനാനുഭവങ്ങള്‍ നിലവിലെ ഫസ്റ്റ്‌ബെല്‍ ക്ലാസുകളിലൂടെ പൂര്‍ണമായും കുട്ടികള്‍ക്ക് ലഭ്യമല്ല.
കുട്ടികള്‍ അതാത് കാലങ്ങളില്‍ നേടേണ്ട ശേഷികള്‍ ആര്‍ജിക്കേണ്ടത് തുടര്‍ വിദ്യാഭ്യാസത്തിന് അത്യാവശ്യമാണെന്നും അദ്ദേഹം പറഞ്ഞു.
