തിരുവനന്തപുരം: തുടര്‍ഭരണമെന്ന ചരിത്രനേട്ടം നേടിയ ഇടത് സര്‍ക്കാര്‍ ഇടര്‍ച്ചയും തളര്‍ച്ചയുമില്ലാതെ ഊര്‍ജ്ജസ്വലമായ വളര്‍ച്ചയിലാണ് മുന്നോട്ട് പോകുന്നതെന്ന് മുഖ്യമന്ത്രി പിണറായി വിജയന്‍. പ്രതിസന്ധികളെ തരണം ചെയ്യാനാണ് ശ്രമം. കൊവിഡ് പ്രതിസന്ധിയേയും സര്‍ക്കാര്‍ നേരിടുമെന്നും മുഖ്യമന്ത്രി വ്യക്തമാക്കി.
തിരുവനന്തപുരത്ത് അയ്യങ്കാളി ജയന്തി ആഘോഷം ഉദ്‌ഘാടനം ചെയ്യുകയായിരുന്നു മുഖ്യമന്ത്രി. ചിലര്‍ അധികാരത്തിലെത്തുമ്പോള്‍ ചില പ്രത്യേക വിഭാഗക്കാരെ പുറത്താക്കാന്‍ ശ്രമിക്കുന്നത് നമുക്ക് കാണാം. ഇവിടെയാണ് സാഹോദര്യത്തിന്‍റെയും മാനവികതയുടെയും മൂല്യം നാം ഉയര്‍ത്തിപ്പിടിക്കേണ്ടത്.
ഇത്തരം സാഹചര്യത്തില്‍ അയ്യങ്കാളിയെ പോലെയുള്ളവര്‍ ഉയര്‍ത്തിയ ആശയങ്ങളുടെ പ്രസക്തി പരിശോധിക്കണമെന്നും മുഖ്യമന്ത്രി വ്യക്തമാക്കി. സര്‍ക്കാരിന്‍റെ നൂറ് ദിന പരിപാടികളില്‍ പട്ടിക വിഭാഗക്കാര്‍ക്കായി നിരവധി പദ്ധതികള്‍ നടപ്പാക്കുമെന്നും മുഖ്യമന്ത്രി വ്യക്തമാക്കി.
