തിരുവനന്തപുരം : ഡോക്‌ടർമാർക്കെതിരായ അതിക്രമം ശ്രദ്ധയില്‍പ്പെട്ടിട്ടില്ലെന്ന നിയമസഭയിലെ മറുപടിയില്‍ വിശദീകരണവുമായി ആരോഗ്യമന്ത്രി വീണ ജോര്‍ജ്.
ചോദ്യത്തിനുള്ള ഉത്തരം പ്രസിദ്ധീകരിച്ചതിലെ സാങ്കേതിക പിഴവാണ് തെറ്റായ വിവരത്തിന് കാരണമായതെന്ന് ആരോഗ്യമന്ത്രിയുടെ ഓഫിസ് അറിയിച്ചു.
നേരത്തേ തയ്യാറാക്കിയ ഉത്തരമാണ് പ്രസിദ്ധീകരിച്ചിരിക്കുന്നത്. ഈ ഉത്തരം തിരുത്തി നല്‍കിയിരുന്നു. എന്നാല്‍ അത് പ്രസിദ്ധീകരിച്ചില്ല. ഇതാണ് പിഴവിന് ഇടയാക്കിയത്.
ഉത്തരം തിരുത്തി പ്രസിദ്ധീകരിക്കണമെന്ന് സ്പീക്കറോട് അഭ്യര്‍ഥിച്ചിട്ടുണ്ടെന്നും മന്ത്രിയുടെ ഓഫിസ് അറിയിച്ചു.
നിയമസഭയിലെ വീണ ജോർജിന്‍റെ വിചിത്രവാദം
ഡോക്‌ടർമാർക്കെതിരായ അതിക്രമം ശ്രദ്ധയില്‍പെട്ടിട്ടില്ലെന്നായിരുന്നു നിയമസഭയിൽ മാത്യു കുഴല്‍നാടന്‍ എംഎല്‍എയുടെ ചോദ്യത്തിനുള്ള മന്ത്രിയുടെ മറുപടി.
ഡോക്‌ടർമാർക്കെതിരായ അതിക്രമങ്ങള്‍ തടയാന്‍ ഇപ്പോഴത്തെ നിയമങ്ങള്‍ പര്യാപ്‌തമാണെന്നും മന്ത്രി നിയമസഭയിൽ പറഞ്ഞിരുന്നു.
സംസ്ഥാനത്ത് ഡോക്‌ടർമാർക്കെതിരായ അതിക്രമങ്ങള്‍ ആവര്‍ത്തിക്കപ്പെടുന്നതിനിടെയാണ് വീണ ജോര്‍ജിന്‍റെ കടകവിരുദ്ധമായ പ്രതികരണം ഉണ്ടായത്.
അതിക്രമങ്ങള്‍ തടയുന്നതിനായി പൊതുജനങ്ങള്‍ക്കിടയില്‍ ബോധവത്കരണം നടത്തുമെന്നും മന്ത്രി അറിയിച്ചിരുന്നു.
