തിരുവനന്തപുരം: കോണ്‍ഗ്രസ് നേതാക്കളെ വീട്ടില്‍ പോയിക്കാണാന്‍ തനിക്ക് എ.കെ.ജി സെന്‍ററിന്‍റെ അനുവാദം ആവശ്യമില്ലെന്ന് പ്രതിപക്ഷ നേതാവ് വി.ഡി.സതീശന്‍. വി.ഡി സതീശൻ കോണ്‍ഗ്രസ് നേതാക്കളുടെ വീടുകള്‍ കയറി നടക്കുന്നുവെന്ന എ. വിജയരാഘവന്‍റെ പ്രസ്‌താവനയോടു പ്രതികരിക്കുകയായിരുന്നു പ്രതിപക്ഷ നേതാവ്.
കുറച്ചു കൂടി നിലവാരമുള്ള തമാശകള്‍ പറയാന്‍ മുഖ്യമന്ത്രി വിജയരാഘവനോടു പറയണം. ഒന്നുമല്ലെങ്കില്‍ അദ്ദേഹം സിപിഎം സംസ്ഥാന സെക്രട്ടറി സ്ഥാനത്തിരിക്കുന്ന വ്യക്തിയാണെന്ന വിചാരം വേണം. ഇത്തം വളിച്ച തമാശകള്‍ വിജയരാഘവന് നിര്‍ത്തണം. കോണ്‍ഗ്രസിലെ എല്ലാ പ്രശ്‌നങ്ങളും അവസാനിച്ചുവെന്നും കോൺഗ്രസിലെ പ്രശ്‌നങ്ങള്‍ തീര്‍ക്കാര്‍ എ.ഐ.സി.സി ജനറല്‍ സെക്രട്ടറി തന്നെ വേണമെന്നില്ലെന്നും വി.ഡി സതീശൻ പറഞ്ഞു.
നിപ പ്രതിരോധത്തില്‍ സര്‍ക്കാരിന് പ്രതിപക്ഷം എല്ലാ പിന്തുണയും വാഗ്‌ദാനം ചെയ്യുന്നു. കൊവിഡ് കൈകാര്യം ചെയ്യുന്നതില്‍ സര്‍ക്കാര്‍ പരാജയപ്പെട്ടു. എന്തുകൊണ്ടാണ് കൊവിഡ് ഇങ്ങനെ വര്‍ധിക്കുന്നതെന്ന കാര്യത്തില്‍ വ്യക്തമായ വിശദീകരണം നല്‍കാന്‍ പോലും മുഖ്യമന്ത്രി തയ്യാറാകുന്നില്ല. കൊവിഡ് നിയന്ത്രണത്തില്‍ പരാജയപ്പെട്ട പോലെയാകരുത് നിപ പ്രതിരോധമെന്നും സതീശന്‍ പറഞ്ഞു.
READ MORE: നിപ്പ: പിഎസ്‌സി ഈ മാസം നടത്താനിരുന്ന പ്രാഥമിക പരീക്ഷകള്‍ മാറ്റി
