കോഴിക്കോട് : താമരശ്ശേരിയിൽ ഡ്രൈവറില്ലാ ലോറി ചായക്കടയിലേക്ക് ഇടിച്ചുകയറി. അപകട സമയത്ത് കടയ്‌ക്കുള്ളിൽ ആളുകൾ ഉണ്ടായിരുന്നെങ്കിലും ലോറി അധികം ഉള്ളിലേക്ക് കയറാത്തതിനാൽ വൻ ദുരന്തം ഒഴിവായി.ശനിയാഴ്‌ച രാവിലെ ഏഴ്‌ മണിയോടെയായിരുന്നു സംഭവം.
അമ്പായത്തോട്ടിൽ ദേശീയ പാതയോരത്തെ ഗ്രൗണ്ടിൽ നിർത്തിയിട്ടിരുന്ന ലോറിയാണ് പിന്നോട്ടുനീങ്ങി റോഡിന് എതിർവശത്തെ ചായക്കടയിലക്ക് ഇടിച്ച് കയറിയത്. മിച്ചഭൂമിക്ക് സമീപം അമ്പായത്തോട് സ്വദേശികളായ ശശി- ലീല ദമ്പതിമാർ നടത്തുന്ന ചായക്കടയിലേക്കാണ് ലോറി പാഞ്ഞുകയറിയത്.
താമരശ്ശേരിയിൽ നിർത്തിയിട്ടിരുന്ന ലോറി ചായക്കടയ്‌ക്കുള്ളിലേക്ക് ഇടിച്ചുകയറി; ഒഴിവായത് വൻ ദുരന്തം
അപകടത്തിൽ കടയ്‌ക്കകത്ത് ഉണ്ടായിരുന്ന വസ്‌തുക്കളെല്ലാം തകർന്നു. ദേശീയപാതയിലൂടെ ലോറി മറുവശത്തേക്ക് എത്തിയപ്പോൾ റോഡിൽ മറ്റ് വാഹനങ്ങൾ ഇല്ലാതിരുന്നതും വൻ ദുരന്തം ഒഴിവാക്കി. ലോറി നാട്ടുകാർ ചേർന്ന് കടയിൽ നിന്ന് തള്ളി നീക്കി. മുക്കത്ത് നിന്നും ഫയർ ഫോഴ്‌സും സ്ഥലത്തെത്തിയിരുന്നു.
