കോഴിക്കോട്: നിപ ലക്ഷണമുള്ള 16 സാമ്പിളുകൾ കൂടി നെഗറ്റീവായി. ഇതോടെ നെഗറ്റീവായവരുടെ എണ്ണം 46 ആയി. മരിച്ച കുട്ടിയുടെ സമ്പര്‍ക്ക പട്ടികയിലുണ്ടായിരുന്ന 20 പേരുടെ പരിശോധന ഫലം നെഗറ്റീവായിരുന്നു. നിപ ലക്ഷണമുള്ള 12 പേരുടെ സാമ്പിളുകള്‍ കൂടി പരിശോധിക്കാനുണ്ടെന്ന് ആരോഗ്യ മന്ത്രി വീണ ജോര്‍ജ് അറിയിച്ചു.
പരിശോധനകൾക്കായി മൊബൈൽ ലാബുകൾ സജ്ജമാക്കും. രോഗ ലക്ഷണങ്ങൾ ഉള്ള മുഴുവൻ പേരുടെയും ആരോഗ്യനില പരിപൂർണ തൃപ്‌തികരമാണെന്നും ആരോഗ്യമന്ത്രി പറഞ്ഞു. 8 പേരെ കൂടി സമ്പർക്കപ്പട്ടികയിൽ ഉൾപ്പെടുത്തിയതോടെ പട്ടികയിൽ ഉള്ളവരുടെ എണ്ണം 265 ആയി. 68 പേരാണ് നിലവിൽ ആശുപത്രിയിൽ കഴിയുന്നത്. 4,995 വീടുകളിൽ എത്തി വിവരങ്ങൾ ശേഖരിച്ചെന്നും മന്ത്രി വ്യക്തമാക്കി.
ജീവികളുടെ സാമ്പിൾ ശേഖരണം സംബന്ധിച്ച കാര്യത്തിൽ ഏകോപനം ഉറപ്പാക്കും. വവ്വാലുകളുടെ 5 സാമ്പിളുകൾ എൻഐവി പുനെയിലേക്ക് അയക്കും. കാട്ടുപന്നികളുടെ സാമ്പിളുകൾ വൈകാതെ ശേഖരിക്കും. എൻഐവി പൂനെയിൽ നിന്ന് വിദഗ്‌ധ സംഘം നാളെ എത്തുമെന്നും മന്ത്രി അറിയിച്ചു.
അതേസമയം, നിപയുടെ സാഹചര്യത്തിൽ നിർത്തിവെച്ച കൊവിഡ് വാക്‌സിനേഷൻ വ്യാഴാഴ്‌ച പുനരാരംഭിക്കും. കണ്ടെയ്ൻമെൻ്റ് സോണുകൾ ഒഴികെയാണ് വാക്‌സിന്‍ നൽകുക.
Read more: ആശങ്ക ഒഴിയുന്നു; നിപ പരിശോധനയ്ക്ക് അയച്ച 20 പേരുടെയും ഫലം നെഗറ്റീവ്
