പൂനെ: രാഷ്‌ട്രീയം വിടുകയാണെന്ന സൂചന നല്‍കി നാഷണലിസ്‌റ്റ് കോണ്‍ഗ്രസ് പാര്‍ട്ടി തലവൻ ശരദ് പവാര്‍. എൻസിപിയിലേക്ക് പുതിയ നേതൃത്വത്തിന് വഴിയൊരുക്കുന്നതിന് വേണ്ടി രാഷ്ട്രീയത്തില് നിന്നും താൻ മാറിനിൽക്കുകയാണെന്നും അദ്ദേഹം പറഞ്ഞു. ബാരാമതി നിയമസഭ മണ്ഡലത്തിൽ ചെറുമകൻ യുഗേന്ദ്ര പവാറിന്‍റെ തെരഞ്ഞെടുപ്പ് പ്രചാരണ റാലിയിൽ സംസാരിക്കവെയാണ് രാഷ്ട്രീയത്തില് നിന്ന് വിരമിക്കുന്നതുമായി ബന്ധപ്പെട്ട് ശരദ് പവാര്‍ സൂചന നല്‍കിയത്.
ഇനിയും ഒരു രാജ്യസഭാ എംപിയായി തുടരണമോ എന്ന കാര്യം അലോചിക്കുമെന്നും അദ്ദേഹം പറഞ്ഞു. 2026-ൽ രാജ്യസഭാ എംപി കാലാവധി അവസാനിച്ചതിന് ശേഷം രാഷ്ട്രീയത്തിൽ നിന്ന് വിരമിക്കുമെന്നും അദ്ദേഹം സൂചന നൽകി. താൻ ഒരു തെരഞ്ഞെടുപ്പിലും ഇനി മത്സരിക്കില്ലെന്നും പുതിയ തലമുറ രാഷ്ട്രീയത്തിലേക്ക് വരേണ്ട സമയമാണിതെന്നും അദ്ദേഹം വ്യക്തമാക്കി.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
രാഷ്ട്രീയത്തില് നിന്ന് വിരമിച്ചാലും ജനങ്ങൾക്ക് വേണ്ടി പ്രവർത്തിക്കുന്നത് തുടരുമെന്നും പ്രത്യേകിച്ച് പാർശ്വവൽക്കരിക്കപ്പെട്ട വിഭാഗങ്ങള്‍ക്ക് വേണ്ടി പ്രവര്‍ത്തിക്കുമെന്നും അദ്ദേഹം പറഞ്ഞു. 'ഞാൻ ഇപ്പോള്‍ അധികാരത്തിലില്ല. ഞാൻ രാജ്യസഭയിലെ എംപിയാണ്, ഇനി ഒരു ഒന്നര വർഷം അവശേഷിക്കുന്നു. ഞാൻ ഇതിനകം 14 തെരഞ്ഞെടുപ്പുകളിൽ മത്സരിച്ചു, എല്ലായ്‌പ്പോഴും നിങ്ങള്‍ എന്നെ ജയിപ്പിച്ചു. ഇനി മത്സരിക്കാനില്ല. ഇപ്പോൾ പുതിയ തലമുറയ്ക്ക് അവസരം നൽകണമെന്ന് ഞാൻ കരുതുന്നു,' എന്ന് ബാരാമതിയിൽ ഒരു പൊതു റാലിയെ അഭിസംബോധന ചെയ്യവെ പവാർ പറഞ്ഞു.
രാഷ്‌ട്രീയ ജീവിതത്തിലെ നേട്ടങ്ങള്‍ എണ്ണിപ്പറഞ്ഞ് ശരദ് പവാര്‍
അധികാരത്തിലിരുന്ന കാലത്ത് താൻ ജനങ്ങള്‍ക്ക് കാര്യമായ വികസനം കൊണ്ടുവന്നെന്നും അദ്ദേഹം എടുത്തുപറഞ്ഞു. 70,000 കോടി രൂപയുടെ കാർഷിക കടങ്ങൾ എഴുതിത്തള്ളി, കാർഷികോൽപ്പന്നങ്ങളുടെ വില ഉയർത്തി, കാർഷിക കയറ്റുമതി സുഗമമാക്കി, പ്രതിരോധ മന്ത്രാലയത്തിൽ സേവനമനുഷ്‌ഠിക്കുമ്പോൾ സായുധ സേനയിൽ സ്ത്രീകൾക്ക് അവസരം നല്‍കി.
താൻ മഹാരാഷ്ട്ര മുഖ്യമന്ത്രിയായിരിക്കെ തദ്ദേശ സ്ഥാപനങ്ങളിൽ 50 ശതമാനം സ്ത്രീകൾക്ക് പ്രാതിനിധ്യം ഉറപ്പ് വരുത്തിയെന്നും അദ്ദേഹം ചൂണ്ടിക്കാട്ടി. ബാരാമതി നിയമസഭ മണ്ഡലത്തിലെ നിലവിലെ എംഎല്‍എയും പുതിയ എൻസിപിയുടെ തലവനുമായ അജിത് പവാറിനെയും ശരദ് പവാര്‍ വിമര്‍ശിച്ചു. മണ്ഡലത്തിലെ ചില പദ്ധതികള്‍ അജിത് പവാര്‍ പൂര്‍ത്തിയാക്കിയില്ലെന്നും അദ്ദേഹം ആരോപിച്ചു.
നാല് തവണ മഹാരാഷ്ട്ര മുഖ്യമന്ത്രിയായി സേവനമനുഷ്‌ഠിച്ച ശരദ് പവാര്‍ പി വി നരസിംഹ റാവുവിന്‍റെ കേന്ദ്രമന്ത്രിസഭയിൽ പ്രതിരോധ മന്ത്രിയായും മൻമോഹൻ സിങ് മന്ത്രിസഭയിൽ കൃഷി മന്ത്രിയായും സേവനമനുഷ്‌ഠിച്ചിട്ടുണ്ട്. ഇന്ത്യൻ നാഷണൽ കോൺഗ്രസിൽ നിന്ന് വേർപിരിഞ്ഞ ശേഷം 1999 ലാണ് അദ്ദേഹം നാഷണലിസ്‌റ്റ് കോൺഗ്രസ് പാർട്ടി (എൻസിപി) രൂപീകരിച്ചത്.
പാര്‍ട്ടിയുടെ ആദ്യത്തെ പ്രസിഡന്‍റ് കൂടിയാണ് അദ്ദേഹം. 2023 ല്‍ ശരദ് പവാറിന്‍റെ അനന്തരവൻ അജിത് പവാര്‍ എൻസിപി പിളര്‍ത്തി. 2023 ജൂലൈയിൽ, അജിത് പവാർ ശരദ് പവാറിനെതിരെ മത്സരിക്കുകയും ഭരണകക്ഷിയായ ബിജെപി-ശിവസേന സർക്കാരിൽ ചേരുകയും മഹാരാഷ്ട്ര ഉപമുഖ്യമന്ത്രിയായി സത്യപ്രതിജ്ഞ ചെയ്യുകയും ചെയ്‌തിരുന്നു.
Read Also: യുപി സര്‍ക്കാരിന് തിരിച്ചടി; മദ്രസ വിദ്യാഭ്യാസ നിയമം ശരിവച്ച് സുപ്രീംകോടതി
