കോഴിക്കോട്: കൊടുവള്ളി കൊടക്കാട്ട് കണ്ടി കടവിൽ ചെറുപുഴയ്ക്ക് കുറുകെ ഭിത്തി നിർമിച്ചതോടെ മഴക്കാലം ആധിയുടേതാണ് ഇവിടത്തുകാർക്ക്. വര്‍ഷങ്ങള്‍ക്ക് മുമ്പ് പുഴയോട് ചേര്‍ന്ന് നിര്‍മിച്ച ഗ്രൗണ്ടും ഭിത്തിയും അവിടെ വന്നടിഞ്ഞ മണ്ണും മൂലം പുഴ ഗതിമാറി ഒഴുകുകയാണ്. മഴക്കാലത്ത് പുഴയോരം ഇടിയുകയും സമീപത്തുള്ള ഇരുപത്തിയഞ്ചോളം വീടുകളില്‍ വെള്ളം കയറുന്നതും പതിവാണ്.
പുഴയുടെ സ്വാഭാവിക ഒഴുക്കിനെ തടസപ്പെടുത്തി കരിങ്കൽകെട്ടും ഗ്രൗണ്ടും നിർമിച്ചതിനെ തുടര്‍ന്നാണ് ഈ അവസ്ഥ. 15 വർഷം മുന്‍പാണ് കൊടുവള്ളി പഞ്ചായത്തിന്‍റെ ധനസഹായത്തോടെ ഇവിടെ ഫുട്ബാൾ ഗ്രൗണ്ട് നിർമിച്ചത്. ഇതോടെ ഈ ഭാഗത്തെ പുഴയുടെ വീതി 50ൽ നിന്ന് 10 മീറ്ററായി.
പശ്ചിമഘട്ടം പുഴ സംരക്ഷണസമിതി പ്രവർത്തകർ നൽകിയ പരാതിയുടെ അടിസ്ഥാനത്തിൽ റവന്യൂ, മുനിസിപ്പല്‍, ഓമശേരി പഞ്ചായത്ത് അധികൃതരും പൊലീസും ഉള്‍പ്പെടെ സ്ഥലം സന്ദർശിച്ചെങ്കിലും യാതൊരു നടപടികളും ഇതുവരെ എടുത്തിട്ടില്ല. അടുത്ത മഴക്കാലത്തിന് മുന്‍പെങ്കിലും പുഴയ്ക്ക് കുറുകെ നിര്‍മിച്ച ഭിത്തി മാറ്റി പുഴയുടെ ഒഴുക്ക് പൂർവസ്ഥിതിയിലാക്കണമെന്നാണ് നാട്ടുകാരുടെ ആവശ്യം. ഇത് സംബന്ധിച്ച് പശ്ചിമഘട്ടം പുഴ സംരക്ഷണ സമിതി കലക്‌ടര്‍ക്ക് പരാതി നൽകിയിട്ടുണ്ട്.
Also read: ആന്ധ്രാപ്രദേശില്‍ ഇനി ജില്ലകള്‍ 13 അല്ല 26: പുതിയ ജില്ലകളെ മുഖ്യമന്ത്രി പ്രഖ്യാപിച്ചു
