എറണാകുളം: കേരള, മഹാത്മാഗാന്ധി സർവകലാശാലകളുടെ പരീക്ഷകള്‍ ഹൈക്കോടതി തടഞ്ഞു. എൻഎസ്എസിന്‍റെ ഹര്‍ജിയിലാണ് ഇടക്കാല ഉത്തരവ്. കേരള, മഹാത്മാഗാന്ധി സർവകലാശാലകളുടെ അധികാരപരിധിയിൽ വരുന്ന തിരുവനന്തപുരം, കൊല്ലം, കോട്ടയം, പത്തനംതിട്ട, ഇടുക്കി ജില്ലകൾ കൊവിഡ് വ്യാപനത്തിൽ സി വിഭാഗത്തിൽ വരുന്നതിനാൽ സർവകലാശാലകൾ കോളജുകളിൽ നടത്തുന്ന പരീക്ഷകൾ നിർത്തി വയ്ക്കണമെന്നായിരുന്നു എന്‍എസ്എസിന്‍റെ ആവശ്യം.
കൊവിഡ് രൂക്ഷമായ സാഹചര്യത്തിൽ പ്രസ്‌തുത കോളജുകളിൽ പരീക്ഷ നടത്തിപ്പിന് മതിയായ അധ്യാപകരെ ലഭിക്കുന്നില്ല. കൊവിഡ് പ്രോട്ടോക്കോൾ അനുസരിച്ച് ക്ലാസ്‌മുറികളുടെ എണ്ണം ഇരട്ടിയായിരിക്കെ പരീക്ഷ നടത്തിപ്പിനുള്ള അധ്യാപകരുടെ എണ്ണവും അതിനനുസരിച്ച് വര്‍ധിച്ചിട്ടുണ്ട്. പരീക്ഷകൾ നടത്തുന്നതോടൊപ്പം ഓൺലൈൻ ക്ലാസുകളും നടക്കുന്നു.
ധാരാളം അധ്യാപകരും അനധ്യാപകരും കൊവിഡ് ബാധിതരായതിനാൽ പരീക്ഷ നടത്തിപ്പിന് മതിയായ ജീവനക്കാർ ഇല്ലാത്ത അവസ്ഥയാണുള്ളത്. പരീക്ഷാസമ്മർദം മൂലം വിദ്യാർഥികൾ രോഗബാധ മറച്ചുവെച്ചുകൊണ്ട് പരീക്ഷയിൽ പങ്കെടുക്കുന്നതിനാൽ, 3 മണിക്കൂർ പരീക്ഷ കഴിയുമ്പോൾ രോഗമില്ലാത്ത കുട്ടികളും അധ്യാപകരും രോഗബാധിരാവാനുള്ള സാധ്യത വര്‍ധിക്കുകയാണ്. ഇക്കാര്യങ്ങൾ ഉന്നയിച്ചുകൊണ്ട് എൻഎസ്എസ് സർക്കാരിന് നിവേദനം നല്‍കിയെങ്കിലും കാര്യമായ ഇടപെടൽ ഉണ്ടാകാത്തതിനെ തുടര്‍ന്നാണ് ഹൈക്കോടതിയെ സമീപിച്ചത്.
Also read: കൊവിഡ് വ്യാപനം; മഹാത്മാഗാന്ധി സർവകലാശാല പരീക്ഷകൾ മാറ്റിവച്ചു
