ന്യൂഡല്‍ഹി: അശ്ലീല കണ്ടന്‍റുകള്‍ക്ക് മോണിറ്റൈസേഷന്‍ ഏര്‍പ്പെടുത്തി പണം സമ്പാദിക്കാനുള്ള മുന്നൊരുക്കവുമായി ട്വിറ്റര്‍. ഇതോടെ പോണ്‍ സൈറ്റായ ഓണ്‍ലി ഫാന്‍സിന്‍റെ മുഖ്യ എതിരാളിയായി ട്വിറ്റര്‍ മാറുമെന്നാണ് ദി വെര്‍ജ് നിരീക്ഷിക്കുന്നത്. അശ്ലീല കണ്ടന്‍റുകള്‍ പോസ്റ്റ് ചെയ്യുന്നത് ട്വിറ്ററിന്‍റെ മാര്‍ഗനിര്‍ദേശങ്ങള്‍ക്ക് എതിരല്ലാത്തതിനാല്‍ ചില ഉപയോക്താക്കള്‍ അവരുടെ ഓണ്‍ലി ഫാന്‍സ് അക്കൗണ്ടുകള്‍ പരസ്യപ്പെടുത്തുന്നതിനായി ട്വിറ്റര്‍ ഉപയോഗിക്കുന്നു എന്ന് റിപ്പോര്‍ട്ടുകള്‍ പറയുന്നു.
എന്നാല്‍ അശ്ലീല കണ്ടന്‍റുകള്‍ ഉള്‍പ്പെടുത്തുക വഴി കുട്ടികളെ ലൈംഗികമായി ദുരുപയോഗം (CSAM) ചെയ്യുന്നത് ട്വിറ്ററിന് കണ്ടെത്താനാകില്ലെന്നാണ് 84 അംഗങ്ങളുള്ള റെഡ് ടീമിന്‍റെ കണ്ടെത്തല്‍. ഇത്തരം ഉള്ളടക്കങ്ങളുടെ സൃഷ്‌ടാക്കളും ഉപയോക്താക്കളും 18 വയസിന് മുകളില്‍ ഉള്ളവരാണെന്ന് ഉറപ്പുവരുത്താനുള്ള സാങ്കേതികത ട്വിറ്ററിന് ഇല്ല. അതിനാല്‍ കുട്ടികളെ ലൈംഗികമായി ചൂഷണം ചെയ്യുന്നത് കൃത്യമായി കണ്ടെത്താന്‍ ട്വിറ്ററിന് കഴിയില്ലെന്നാണ് റെഡ് ടീം പറയുന്നത്.
റെഡ് ടീമിന്‍റെ റിപ്പോര്‍ട്ടിന്‍റെ അടിസ്ഥാനത്തില്‍, ഇലോണ്‍ മസ്‌ക് ട്വിറ്റര്‍ വാങ്ങുമെന്ന് പ്രഖ്യാപിച്ചതിനെ തുടര്‍ന്ന് കമ്പനി പുതിയ പദ്ധതി താത്‌കാലികമായി നിര്‍ത്തി വയ്‌ക്കുകയായിരുന്നു. ട്വിറ്ററിന്‍റെ വാർഷിക വരുമാനം ഏകദേശം 5 ബില്യൺ യുഎസ് ഡോളറാണ്, കഴിഞ്ഞ വർഷം 257 ബില്യൺ ഡോളർ വരുമാനം നേടിയ ഗൂഗിൾ പോലുള്ള കമ്പനിയുമായി താരതമ്യപ്പെടുത്തുമ്പോൾ ട്വിറ്ററിന്‍റെ വരുമാനം വളരെ കുറവാണ്.
ഗൂഗിള്‍ അടക്കമുള്ളവയ്‌ക്ക്‌ കുട്ടികളെ ലൈംഗികമായി ദുരുപയോഗം ചെയ്യുന്നത് കണ്ടെത്താനുള്ള സാങ്കേതിക വിദ്യയുണ്ട്. എന്നിരുന്നാലും അവയൊന്നും പൂര്‍ണമല്ല. കുട്ടികളെ ലൈംഗികമായി ചൂഷണം ചെയ്യുന്നതിനോട് സഹിഷ്‌ണുത കാണിക്കുന്നില്ലെന്നും കുട്ടികള്‍ക്ക് നേരെയുള്ള ഓൺലൈൻ ലൈംഗിക ദുരുപയോഗത്തിനെതിരെ ശക്തമായി പോരാടുമെന്നുമാണ് ട്വിറ്റര്‍ പറയുന്നത്.
