ന്യൂഡല്‍ഹി: രാജ്യത്തെ മുന്‍നിര വാഹന നിര്‍മാതാക്കളായ മാരുതി സുസുക്കിക്ക് പിന്നാലെ കാറുകളുടെ വില വര്‍ധിപ്പിക്കാനൊരുങ്ങി റെനോ ഇന്ത്യയും. നിര്‍മാണ ചെലവ് ഉള്‍പ്പടെ വര്‍ധിച്ച് വരുന്ന ഇന്‍പുട് ചെലവുകള്‍ ഭാഗികമായെങ്കിലും നികത്താന്‍ ശ്രമിക്കുക എന്ന ഉദ്യേശത്തോടെയാണ് റെനോ വാഹനങ്ങളുടെ വില വര്‍ധിപ്പിക്കാനൊരുങ്ങുന്നത്. ഇതോടെ അടുത്ത മാസം മുതല്‍ റെനോ ഇന്ത്യയുടെ എല്ലാ വാഹനങ്ങള്‍ക്കും മോഡലുകള്‍ക്കനുസൃതമായ വില വര്‍ധനവുണ്ടാകുമെന്ന് നിര്‍മാതാക്കള്‍ അറിയിച്ചു.
സര്‍വത്ര വര്‍ധന: സാധാരണക്കാരന്‍റെ കീശ മനസ്സിലാക്കി വാഹനങ്ങള്‍ വിപണിയിലെത്തിക്കുന്ന റെനോയുടെ 4.64 ലക്ഷം മുതല്‍ 10.62 ലക്ഷം രൂപ വരെ വിലയുള്ള ചെറുകാര്‍ ഇനത്തില്‍ പെടുന്ന ക്വിഡ്, മള്‍ട്ടി യൂട്ടിലിറ്റി വെഹിക്കിള്‍ ഇനത്തില്‍ പെടുന്ന ട്രൈബര്‍, കോംപാക്‌റ്റ് എസ്‌യുവിയായ കിഗര്‍ തുടങ്ങിയവയ്‌ക്ക് ഇതോടെ വില കൂടും. എന്നാല്‍ വാഹനത്തിന്‍റെ മോഡലുകള്‍ക്ക് എത്രമാത്രം വിലവര്‍ധനവുണ്ടാകുമെന്ന് കമ്പനി വെളിപ്പെടുത്തിയിട്ടില്ല. ഇന്‍പുട് ചെലവുകള്‍ ഭാഗികമായെങ്കിലും നികത്തല്‍, യന്ത്രഭാഗങ്ങളുടെ വിലവര്‍ധന, വിദേശ വിനിമയത്തിലെ ഏറ്റക്കുറച്ചിലുകള്‍, പണപ്പെരുപ്പം, വാഹന നിര്‍മാണ രംഗത്തുള്ള സമീപകാലത്തെ നിയന്ത്രണങ്ങള്‍ തുടങ്ങിയവ പരിഗണിച്ചാണ് വില വര്‍ധനവെന്ന് കമ്പനി പ്രസ്‌താവനയില്‍ അറിയിച്ചു.
എല്ലാം നല്ലതിന്: ഇന്ത്യ റെനോയുടെ പ്രധാന വിപണിയാണെന്നും വൈവിധ്യം ഇഷ്‌ടപ്പെടുന്ന ഇന്ത്യന്‍ ഉപഭോക്താക്കള്‍ക്കായി ഉല്‍പന്നങ്ങളിലും സേവനങ്ങളിലും പുത്തന്‍ കണ്ടുപിടിത്തങ്ങള്‍ കൊണ്ടുവരാനുള്ള ശ്രമത്തിലാണെന്നും കമ്പനി വ്യക്തമാക്കി. ബ്രാന്‍ഡ് വളര്‍ത്തുന്നതിനായുള്ള ദീര്‍ഘകാല പദ്ധതികളെക്കുറിച്ച് ചിന്തിക്കുന്നതായും കമ്പനി അവകാശപ്പെട്ടു. ആഗോള പകിട്ടുള്ള ഉല്‍പന്നങ്ങള്‍ പുറത്തെത്തിക്കുന്നതിനൊപ്പം നിലവിലുള്ളതും ഭാവിയില്‍ വരാനിരിക്കുന്നതുമായ ഉല്‍പന്നങ്ങളുടെ നിരയില്‍ പ്രാദേശികവല്‍കരണത്തിന് ശക്തമായ ഊന്നല്‍ നല്‍കുന്നതായും കമ്പനി കൂട്ടിച്ചേര്‍ത്തു.
തുല്യ ദുഃഖിതര്‍: അതേസമയം രാജ്യത്തും ആഗോളതലത്തിലുമുള്ള പണപ്പെരുപ്പവും നിര്‍മാണരംഗത്തെ നിയന്ത്രണങ്ങളുമെല്ലാമാണ് വില വർധനവിലേക്ക് നീങ്ങുന്നതിലേക്ക് പ്രേരകമായതെന്നാണ് മാരുതി സുസുക്കിയും അറിയിച്ചിരുന്നത്. അടുത്ത മാസം മുതല്‍ തന്നെയാണ് മാരുതിയും മോഡലുകള്‍ക്കനുസൃതമായി വാഹനങ്ങളുടെ വില വര്‍ധിപ്പിക്കാനൊരുങ്ങുന്നത്. മാത്രമല്ല വാഹനങ്ങളിലെ വില വര്‍ധനവ് എത്രമാത്രമുണ്ടാകുമെന്ന് മാരുതി സുസുക്കിയും വ്യക്തമാക്കിയിരുന്നില്ല.
