ഇന്ത്യൻ റെയിൽവേയിൽ (Indian Railway) ജോലി നേടാൻ രാജ്യത്ത് ഏറ്റവും കൂടുതലാളുകൾ എഴുതുന്ന പരീക്ഷയാണ് റെയിൽവേ റിക്രൂട്ട്‌മെന്‍റ് ബോർഡ് (Railway Recruitment Board) അഥവാ ആർ ആർ ബി നടത്തുന്ന ഗ്രൂപ്പ് ഡി പരീക്ഷ (Group D Exam). റെയിൽവേയുടെ വിവിധ പ്രൊഡക്ഷൻ യൂണിറ്റുകളിലെ സാങ്കേതിക വകുപ്പുകളിലേക്കാണ് ഈ പരീക്ഷയിലൂടെ ജോലി ലഭിക്കുന്നത്. വിവിധ തസ്തികകളിലേക്ക് ഒരു ലക്ഷത്തിലധികം ഒഴിവുകളുണ്ടാകും. കോടിക്കണക്കിന് ഉദ്യോഗാർഥികളാണ് ഓരോ തവണയും ഗ്രൂപ്പ് ഡി പരീക്ഷയെഴുതുന്നത്. പരീക്ഷ മൂന്നു ഘട്ടങ്ങളിലാണ് നടക്കുന്നത്. കമ്പ്യൂട്ടർ അടിസ്ഥാനമാക്കിയുള്ള ടെസ്റ്റ് (Computer Based Test), ശരീരിക ഘടനാ പരീക്ഷ (Physical Efficiency Tset), പ്രമാണ പരിശോധന (document verification) എന്നിവയാണ് പരീക്ഷയുടെ ഘട്ടങ്ങൾ.
പരീക്ഷയെഴുതുന്ന ഉദ്യോഗാർഥികളിൽ നിന്ന് റെയിൽവേ നിശ്ചിത ഫീസ് ഈടാക്കുന്നുണ്ട്. ജനറൽ/ ഒ ബി സി ഉദ്യോഗാർഥികൾ 500 രൂപയും പിന്നാക്ക വിഭാഗക്കാർ അടക്കമുള്ളവർ 250 രൂപയുമാണ് ഫീസായി നൽകേണ്ടത്. എന്നാൽ പരീക്ഷയെഴുതി ജോലി കിട്ടാത്ത ഉദ്യോഗാർഥികൾക്ക് അവർ നൽകുന്ന ഫീസിന്‍റെ സിംഹഭാഗവും റെയിൽവേ തിരികെ നൽകും. ഈ റീഫണ്ട് ലഭിക്കാൻ ഉദ്യോഗാർഥികൾ ചില നടപടിക്രമങ്ങൾ പാലിക്കേണ്ടതുണ്ട്. അവ എന്തൊക്കെയെന്ന് നോക്കാം (How to apply for Railway Group D Exam Refund) .
റീഫണ്ട് ആർക്കൊക്കെ? : ദിവ്യാംഗർ, സ്ത്രീകൾ, ഭിന്നലിംഗക്കാർ, വിമുക്ത ഭടന്മാർ, പട്ടികജാതി പട്ടികവർഗക്കാർ, ന്യൂനപക്ഷം, സാമ്പത്തികമായി പിന്നാക്കം നിൽക്കുന്നവർ, തുടങ്ങിയവർക്ക് അവർ നൽകിയ ഫീസായ 250 രൂപ മുഴുവനായും തിരികെ ലഭിക്കും. ജനറൽ/ ഒ ബി സി വിഭാഗക്കാർക്ക് അവർ നൽകുന്ന 500 രൂപ ഫീസിൽ നിന്ന് 400 രൂപയും റീഫണ്ടായി ലഭിക്കും.
റീഫണ്ട് ലഭിക്കാൻ പാലിക്കേണ്ട നടപടിക്രമങ്ങൾ
- സ്റ്റെപ് 1: റീജിയണൽ ആർ ആർ ബി-കളുടെ ഔദ്യോഗിക വെബ്‌സൈറ്റ് സന്ദർശിക്കുക.
- സ്റ്റെപ് 2: ഹോം പേജിൽ താഴേക്ക് സ്ക്രോൾ ചെയ്യുമ്പോൾ "റീഫണ്ടിനായി ബാങ്ക് അക്കൗണ്ട് വിശദാംശങ്ങൾ അപ്ഡേറ്റ് ചെയ്യാൻ ഇവിടെ ക്ലിക്ക് ചെയ്യുക" എന്ന ലിങ്ക് കാണാം. ഈ ലിങ്കിൽ ക്ലിക്ക് ചെയ്യുക.
- സ്റ്റെപ് 3: ഒരു പുതിയ പേജ് തുറക്കും.
- സ്റ്റെപ് 4: പുതുതായി വരുന്ന പേജിൽ നിങ്ങളുടെ യൂസർ ഐ ഡിയും പാസ്‌വേർഡും അടക്കമുള്ള ലോഗിൻ വിവരങ്ങൾ നൽകുക.
- ഇതിനുശേഷം റീഫണ്ട് നിക്ഷേപിക്കേണ്ട ബാങ്ക് അക്കൗണ്ട് നമ്പറും ഐ എഫ് എസ് സി കോഡും അടക്കമുള്ള വിവരങ്ങൾ എന്‍റർ ചെയ്യുക.
- സ്റ്റെപ് 5: വിവരങ്ങൾ നല്‍കിക്കഴിഞ്ഞ് സബ്‌മിറ്റ് ബട്ടണിൽ ക്ലിക്ക് ചെയ്യുക.
പ്രത്യേകം ശ്രദ്ധിക്കേണ്ട കാര്യം: ബാങ്ക് അക്കൗണ്ട് നമ്പറും ഐ എഫ് എസ് സി കോഡും സമർപ്പിക്കുന്നതിന് മുൻപ് അവ ശരിയാണെന്ന് ഉറപ്പുവരുത്താൻ ഉദ്യോഗാർഥികളോട് റെയിൽവേ അഭ്യർഥിക്കുന്നു. അപേക്ഷ സമർപ്പിച്ചതിന് ശേഷം നേരത്തെ നൽകിയ വിവരങ്ങൾ തിരുത്തുന്നത് അനുവദനീയമല്ല. ഒരു ബാങ്ക് അകൗണ്ടിൽ ഒന്നിലധികം റീഫണ്ടുകൾ അനുവദിക്കില്ല.
