വാഷിങ്ടണ്‍: ഇന്‍സ്റ്റഗ്രാം ഉപഭോക്താക്കള്‍ക്കായി പുതിയ ഫീച്ചറുമായി കമ്പനി. 'പിന്‍ഡ് കമന്‍റ്സാ'ണ് ആപ്പിലെ പുതിയ സവിശേഷത. മെയ് മാസം മുതല്‍ ഇത് പ്രാവര്‍ത്തികമാക്കാനുള്ള ശ്രമത്തിലായിരുന്നു അണിയറക്കാര്‍. ഇനി മുതല്‍ പിന്‍ഡ് കമന്‍റ്സ് എല്ലാവരുടെ അക്കൗണ്ടുകളിലും ലഭ്യമാകും. ഇൻസ്റ്റഗ്രാം പ്രൊഡക്ട് ഹെഡ്ഡായ വിശാല്‍ ഷായാണ് ഇത് സംബന്ധിച്ച് ട്വീറ്റ് ചെയ്തത്. തങ്ങള്‍ക്ക് പ്രിയപ്പെട്ട അഭിപ്രായങ്ങള്‍ പിന്‍ ചെയ്ത് പോസ്റ്റിനൊപ്പം മുകളിലായി വെക്കുക എന്നതാണ് 'പിന്‍ഡ് കമന്‍റ്സ്'. ഇത് മോശം അഭിപ്രായങ്ങളുടെ അമിതമായ വരവ് കുറക്കാന്‍ ഉപഭോക്താക്കളെ സഹായിക്കുമെന്നാണ് വിശാല്‍ ഷാ ട്വീറ്റിലൂടെ അവകാശപ്പെടുന്നത്.
ഫോട്ടോ പങ്കുവെക്കുന്നതിന് പ്രാധാന്യം നല്‍കികൊണ്ടുള്ള ഇൻസ്റ്റഗ്രാമിന്‍റെ പുതിയ ചില സവിശേഷതകളില്‍ ഒന്ന് മാത്രമാണ് ഇത്. സോഷ്യല്‍ മീഡിയകളില്‍ അശ്ലീല കമന്‍റുകളും ഉപദ്രവവും ഭീഷണിപ്പെടുത്തലും ഏറെ വരുന്നതിനാല്‍ അവ ഒഴിവാക്കാന്‍ ഒരു പരിധിവരെ ഈ പുതിയ ഫീച്ചറിന് സാധിക്കും.
പിൻ ചെയ്ത അഭിപ്രായ സവിശേഷത ആക്‌സസ് ചെയ്യുന്നതിന്, ഉപഭോക്താവ് ആദ്യം ഇൻസ്റ്റഗ്രാം അപ്ലിക്കേഷൻ ഏറ്റവും പുതിയ പതിപ്പിലേക്ക് അപ്‌ഡേറ്റ് ചെയ്യണം. തുടർന്ന് അക്കൗണ്ടിലെ ഏതെങ്കിലും ഇൻസ്റ്റാഗ്രാം പോസ്റ്റിൽ ടാപ്പുചെയ്ത് അഭിപ്രായ വിഭാഗത്തിലേക്ക് പോകുക പിന്നീട് പിൻ ചെയ്യുന്നതിന് ഒരു നിർദ്ദിഷ്ട അഭിപ്രായം കണ്ടെത്തിയ ശേഷം ഇടത്തേക്ക് സ്വൈപ്പ് ചെയ്ത് തമ്പ്‌ടാക്ക് ഐക്കണിൽ ടാപ്പുചെയ്യുക മാത്രം ചെയ്താല്‍ മതി.
ഉപഭോക്താക്കൾക്ക് ഒരു സമയം പോസ്റ്റിന്‍റെ മുകളിൽ മൂന്ന് അഭിപ്രായങ്ങൾ വരെ പിൻ ചെയ്യാൻ കഴിയും. ഇതെല്ലാം ഉപഭോക്താക്കളുടെ ഫോട്ടോയ്ക്ക് ചുവടെ 'പിൻ ചെയ്ത' ലേബലിനൊപ്പം ദൃശ്യമാകും. പിന്‍ ചെയ്ത അഭിപ്രായം പിന്‍വലിക്കാനുള്ള സൗകര്യവും ഏര്‍പ്പെടുത്തിയിട്ടുണ്ട്.
