ഹൈദരാബാദ്: ഹാഷിഷ് ഓയില്‍ കലര്‍ത്തി ചോക്ലേറ്റ് നിര്‍മിച്ച് ഓണ്‍ലൈനില്‍ വില്‍പന നടത്തിയ യുവാവ് പിടിയില്‍. ഹൈദരാബാദ് നാർക്കോട്ടിക് എൻഫോഴ്‌സ്‌മെന്‍റ് വിങ് (എച്ച്-ന്യൂ) ആണ് നര്‍സിങ് സ്വദേശിയായ ഋഷി സഞ്ജയ് മേത്ത (22)യെ അറസ്റ്റ് ചെയ്‌തത്. ഇയാളുടെ പക്കല്‍ നിന്നും അഞ്ച് ലക്ഷം രൂപ വിലവരുന്ന ചോക്ലേറ്റ് (മയക്കുമരുന്ന് കലര്‍ത്തിയത്), 40 ഗ്രാം ഹാഷിഷ് ഓയില്‍, ഒരു മൊബൈല്‍ ഫോണ്‍ എന്നിവ പിടിച്ചെടുത്തു. ഫാര്‍മസ്യൂട്ടിക്കല്‍ വ്യവസായികളാണ് ഋഷിയുടെ കുടുംബം.
മാതാപിതാക്കള്‍ അറിയാതെയാണ് ഇയാളുടെ താവളത്തില്‍ നാര്‍ക്കോട്ടിക് സംഘം പരിശോധന നടത്തിയത്. യുവാവ് മയക്കുമരുന്നിന് അടിമയാണെന്ന് വൈദ്യപരിശോധനയില്‍ നിന്ന് വ്യക്തമായിട്ടുണ്ട്. ഇയാളുടെ കൂട്ടാളികളെയും നാര്‍ക്കോട്ടിക് സംഘം പിടികൂടി. ഫീനിക്‌സ് സര്‍വകലാശാലയിലെ ഓണ്‍ലൈന്‍ ബിസിനസ് മാനേജ്‌മെന്‍റ് കോഴ്‌സ് വിദ്യാര്‍ഥിയാണ് അറസ്റ്റിലായ ഋഷി.
മുമ്പ് ഇയാള്‍ ഇ സിഗരറ്റുകളും മയക്കുമരുന്ന് കലര്‍ത്തിയ ബ്രൗണികളും വില്‍പന നടത്തിയിരുന്നു. എന്നാല്‍ ഇതില്‍ നിന്ന് പ്രതീക്ഷിച്ച ലാഭം ലഭിക്കാതെ വന്നതോടെ ഹാഷിഷ് ഓയില്‍ അടങ്ങിയ ചോക്ലേറ്റ് നിര്‍മിച്ച് വില്‍പന ആരംഭിച്ചു. യൂട്യൂബ് വീഡിയോകള്‍ കണ്ടാണ് താന്‍ ഇത്തരം ചോക്ലേറ്റ് നിര്‍മിക്കാന്‍ പഠിച്ചത് എന്ന് ഋഷി അന്വേഷണ ഉദ്യോഗസ്ഥരോട് പറഞ്ഞു.
നാല് കിലോ ചോക്ലേറ്റിൽ 40 ഗ്രാം ഹാഷ് ഓയിൽ: നാല് കിലോ ചോക്ലേറ്റില്‍ 40 ഗ്രാം ഹാഷിഷ് ഓയില്‍ എന്നതാണ് കണക്ക്. ഓറിയോ, കിറ്റ്കാറ്റ്, കാഡ്‌ബറി തുടങ്ങിയ ഫ്ലേവറുകളിലാണ് ചോക്ലേറ്റ് ബാറുകള്‍ ഉണ്ടാക്കിയിരുന്നത്. 5,000 മുതല്‍ 10,000 രൂപ വരെയാണ് ചോക്ലേറ്റിന്‍റെ വില. ഇന്‍സ്റ്റഗ്രാം, സ്‌നാപ്‌ചാറ്റ് തുടങ്ങിയ മാധ്യമങ്ങളിലൂടെ ആവശ്യക്കാരെ കണ്ടെത്തിയായിരുന്നു വില്‍പന.
തന്‍റെ അക്കൗണ്ടില്‍ ചോക്ലേറ്റിന്‍റെ ചിത്രങ്ങള്‍ അടക്കം പ്രദര്‍ശിപ്പിച്ചാണ് ഇയാള്‍ ആവശ്യക്കാരെ കണ്ടെത്തിയിരുന്നത്. ഊബര്‍, റാപിഡോ ബൈക്കുകള്‍ എന്നിവ ഉപയോഗിച്ച് ആവശ്യക്കാര്‍ക്ക് ചോക്ലേറ്റ് എത്തിക്കുന്നതായിരുന്നു ഋഷിയുടെ രീതി. പണം നേരിട്ടോ ഗൂഗിള്‍ പേ വഴിയോ സ്വീകരിക്കും.
ഋഷിയുടെ ഇടപാടുകാരില്‍ ഏറെയും 18നും 24നും ഇടയില്‍ പ്രായമുള്ളവരാണ്. ഇതില്‍ 50 ശതമാനവും പെണ്‍കുട്ടികളാണെന്ന് നാര്‍ക്കോട്ടിക് സംഘം കണ്ടെത്തിയിട്ടുണ്ട്. വിശാഖപട്ടണത്തെ ചിന്താപ്പള്ളി വനങ്ങളിൽ നിന്നാണ് ഹാഷിഷ് ഓയിൽ ഋഷിക്ക് ലഭിച്ചിരുന്നത്.
ചിന്താപ്പള്ളിയില്‍ നിന്ന് ഇയാള്‍ക്ക് രാമറാവു എന്ന ആളാണ് ഹാഷിഷ് ഓയിൽ എത്തിച്ചു നല്‍കിയത്. രാമറാവുവിനെ കൂടാതെ സുരാര സ്വദേശിയായ വിനോദ്, ശ്രീകാന്ത്, രോഹിത് എന്നിവരും മയക്കുമരുന്ന് ചോക്ലേറ്റ് വില്‍പനയില്‍ പങ്കാളികളാണ്. ഇവരെ പിടികൂടിയ ശേഷമാണ് നാര്‍ക്കോട്ടിക് സംഘം ഋഷി സഞ്ജയ് മേത്തയിലേക്ക് എത്തിയത്.
വിദ്യാര്‍ഥികളുടെ ഫോണുകള്‍ രക്ഷിതാക്കള്‍ ഇടയ്‌ക്കിടെ പരിശോധിക്കണമെന്നും വിദ്യാര്‍ഥികളില്‍ ഏറെയും മയക്കുമരുന്നുകള്‍ക്ക് അടിമപ്പെട്ടവരാണെന്നും നാർക്കോട്ടിക് എൻഫോഴ്‌സ്‌മെന്‍റ് വിങ് ഉദ്യോഗസ്ഥന്‍ സിവി ആനന്ദ് പറഞ്ഞു. എല്ലാവരും സഹകരിച്ചാല്‍ ഹൈദരാബാദിനെ ലഹരി വിമുക്ത നഗരമാക്കാമെന്നും അദ്ദേഹം കൂട്ടിച്ചേര്‍ത്തു.
