ഹൈദരാബാദ് : ഇന്ന് നവംബർ 19 ലോക ബാലപീഡന വിരുദ്ധ ദിനം (World Day For Prevention of Child Abuse). കുട്ടികളുടെ സുരക്ഷയ്ക്കും സംരക്ഷണത്തിനുമുള്ള അവകാശങ്ങൾക്കായി വാദിക്കാനും കുട്ടികളുടെ ക്ഷേമം പ്രോത്സാഹിപ്പിക്കാനുമുള്ള സുപ്രധാന അവസരമാണിത്. വിമൻസ് വേൾഡ് സമ്മിറ്റ് ഫൗണ്ടേഷനും (WWSF) കുട്ടികളെ കേന്ദ്രീകരിച്ചുള്ള മറ്റ് സംഘടനകളും ഈ ദിനത്തിനായുള്ള നിരവധി ആശയങ്ങൾ കൊണ്ടുവരുന്നു.
കുട്ടികളെ അക്രമങ്ങൾ, ചൂഷണം, ദുരുപയോഗം, അവഗണന എന്നിവയിൽ നിന്ന് സംരക്ഷിക്കുന്നത് എത്രത്തോളം നിർണായകമാണെന്ന് അവബോധം വളർത്തുകയാണ് ഇതിന്‍റെ പ്രധാന ലക്ഷ്യമായി പറയപ്പെടുന്നത്. കുട്ടികളെ ദുരുപയോഗം ചെയ്യുന്നതിന്‍റെ ആവർത്തനത്തെക്കുറിച്ചും കമ്മ്യൂണിറ്റികൾ, ഗവൺമെന്‍റുകൾ, സ്ഥാപനങ്ങൾ എന്നിവയ്‌ക്കിടയിലുള്ള പ്രതിരോധ നടപടികളുടെ അനിവാര്യമായ ആവശ്യകതയെക്കുറിച്ചും അവബോധം സൃഷ്‌ടിക്കാൻ ഇത് ശ്രമിക്കുന്നു.
കുട്ടികളുടെ അവകാശങ്ങൾ സംരക്ഷിക്കണമെന്ന് ഈ ദിനം ഓര്‍മപ്പെടുത്തുന്നു: ഇന്ത്യയിലെ എല്ലാ സാമൂഹിക സാമ്പത്തിക മേഖലകളിലെയും കുട്ടികളെ ബാധിക്കുന്ന ഒരു പ്രധാന പ്രശ്‌നമാണ് ബാലപീഡനം. ശാരീരികവും വൈകാരികവും ലൈംഗികവും മാനസികവുമായ ദുരുപയോഗം, അവഗണന എന്നിങ്ങനെയുള്ള പല തരത്തിലുള്ള ബാലപീഡനങ്ങളെക്കുറിച്ച് അവബോധം വളർത്തിയെടുക്കുക എന്നതാണ് ഈ ദിനത്തിന്‍റെ പ്രധാന ലക്ഷ്യം. ചൂഷണത്തിൽ നിന്നും കഷ്‌ടപ്പാടുകളിൽ നിന്നും കുട്ടികളെ സംരക്ഷിക്കുന്നതിനായി, നടപടിയെടുക്കാനും ദുരുപയോഗ സംഭവങ്ങൾ റിപ്പോർട്ട് ചെയ്യാനും പിന്തുണയ്‌ക്കുന്ന നെറ്റ്‌വർക്കുകൾ സ്ഥാപിക്കാനും വ്യക്തികളെയും കമ്മ്യൂണിറ്റികളെയും പ്രാപ്‌തമാക്കാനും ശ്രമിക്കുന്നു.
2000 മുതലാണ് ബാലപീഡനം തടയുന്നതിനുള്ള ലോക ദിനം എല്ലാ വർഷവും നവംബർ 19 ന് ആഗോളതലത്തിൽ ആചരിക്കുന്നത്. വിമൻസ് വേൾഡ് സമ്മിറ്റ് ഫൗണ്ടേഷനാണ് കുട്ടികെള ദുരുപയോഗം ചെയ്യുന്നത് തടയുന്നതിനായി നവംബർ 19 ന് ലോക ബാല പീഡന വിരുദ്ധദിനമായി ആചരിക്കാൻ ആരംഭിച്ചത്. കുട്ടികളുടെ ക്ഷേമം പ്രോത്സാഹിപ്പിക്കുന്നതിലൂടെയും സുരക്ഷിതത്വത്തിനും സംരക്ഷണത്തിനുമുള്ള അവരുടെ അവകാശങ്ങൾക്കുവേണ്ടി വാദിച്ചുകൊണ്ട് കുട്ടികളെ ദുരുപയോഗം ചെയ്യുന്നത് തടയുന്നതിനെക്കുറിച്ചുള്ള അവബോധം ആളുകളിൽ ഉണ്ടാക്കിയെടുക്കുക എന്നതായിരുന്നു ലക്ഷ്യം.
ദേശീയ ക്രൈം റെക്കോർഡ്‌ ബ്യൂറോയിൽ (എൻസിആർബി)യിൽ നിന്ന് ലഭിക്കുന്ന കണക്കുകൾ പരിശോധിക്കുമ്പോൾ കുട്ടികളെ ദുരുപയോഗം ചെയ്യുന്ന കേസുകളിൽ വലിയ വർധനവ് കാണിക്കുന്നു. ഈ കേസുകളിൽ ശാരീരികമായ അക്രമം, ലൈംഗികാതിക്രമം, വൈകാരിക ആഘാതം, അവഗണന എന്നിങ്ങനെ വിവിധ തരത്തിലുള്ള ദുരുപയോഗങ്ങൾ ഉൾപ്പെടുന്നു.
ഈ പ്രശ്‌നങ്ങൾക്ക് പരിഹാരം കണ്ടെത്താൻ സർക്കാരും, സർക്കാരിതര സംഘടനകളും പ്രവർത്തിക്കുന്നു. കുട്ടികളുടെ അവകാശങ്ങൾ സംരക്ഷിക്കുന്നതിന് നിയമപരമായ ചട്ടക്കൂടുകൾ നിലവിലുണ്ടെങ്കിലും അവ റിപ്പോർട്ട് ചെയ്യുന്നതിലും നടപ്പാക്കുന്നതിലും ഇപ്പോഴും പോരായ്‌മകളുണ്ട്.
