ഭോപ്പാൽ: ശ്രീരാമ നവമി ആഘോഷങ്ങൾക്കിടെ മധ്യപ്രദേശിലും സംഘര്‍ഷം. ഖാർഗോണിൽ കർഫ്യു ഏര്‍പെടുത്തി. വർഗീയ ലഹളകളുണ്ടാകാതിരിക്കാൻ ഇവിടെ പൊലീസിനെ വിന്യസിച്ചിരിക്കുകയാണ്. തലാബ് ചൗക്ക് പ്രദേശത്തുനിന്ന് ഘോഷയാത്ര ആരംഭിച്ചതിന് പിന്നാലെ കല്ലേറുണ്ടായതായി അഡിഷനൽ കലക്ടർ എസ്.എസ്. മുജാൽദെ അറിയിച്ചു.
ഉച്ചഭാഷിണിയിൽ പാട്ടുവച്ചതിന്‍റെ പേരിലും സംഘർഷമുണ്ടായി. പൊലീസ് കണ്ണീർ വാതകം പ്രയോഗിച്ചു. സംഭവത്തിൽ നിരവധി പേർക്ക് പരിക്കേറ്റിട്ടുണ്ട്. കല്ലെറിഞ്ഞതിന് പുറമേ പ്രദേശത്തെ വാഹനങ്ങൾക്കും അക്രമികൾ തീയിട്ടു. അക്രമി സംഘത്തെ നേരിടുന്നതിനിടെ പൊലീസുകാർക്കും പരിക്കേറ്റിട്ടുണ്ട്.
