ആരാധകര്‍ നാളേറെയായി കാത്തിരിക്കുന്ന ചിയാന്‍ വിക്രം Vikram ചിത്രമാണ് 'ധ്രുവനച്ചത്തിരം' (Dhruva Natchathiram). ഗൗതം വാസുദേവ് മേനോന്‍ (Gautham Vasudev Menon) സംവിധാനം ചെയ്യുന്ന സിനിമയിലെ പുതിയ ഗാനത്തിന്‍റെ പ്രമോ വീഡിയോ പുറത്തുവിട്ടിരിക്കുകയാണ് നിര്‍മാതാക്കള്‍. 'ധ്രുവനച്ചത്തിര'ത്തിലെ രണ്ടാമത്തെ ഗാനമായ 'ഹിസ് നെയിം ഈസ് ജോണി'ന്‍റെ (His Name is John) പ്രമോ വീഡിയോയാണ് പുറത്തുവിട്ടിരിക്കുന്നത്. പ്രമോയില്‍ ഗാനത്തിന്‍റെ റിലീസ് തീയതിയും പങ്കുവച്ചിട്ടുണ്ട്. നാളെയാണ് (ജൂലൈ 18) 'ഹിസ് നെയിം ഈസ് ജോണ്‍' എന്ന ഗാനം റിലീസ് ചെയ്യുക.
ഒരു ഗ്യാങ്സ്‌റ്റർ ഡ്രാമ സ്‌പൈ ത്രില്ലറായാണ് ചിത്രം ഒരുങ്ങുന്നത്. സിനിമയില്‍ 'ജോണ്‍' എന്ന കഥാപാത്രത്തെയാണ് വിക്രം അവതരിപ്പിക്കുന്നത്. സോള്‍ട്ട് ആന്‍ഡ് പെപ്പര്‍ ലുക്കിലാണ് 'ധ്രുവനച്ചത്തിര'ത്തില്‍ വിക്രം പ്രത്യക്ഷപ്പെടുന്നത്. സിനിമയില്‍ നിന്നുള്ള വിക്രമിന്‍റെ ലുക്കുകള്‍ ഇതിനോടകം തന്നെ സോഷ്യല്‍ മീഡിയയില്‍ ശ്രദ്ധ നേടിയിരുന്നു.
- " class="align-text-top noRightClick twitterSection" data="">
2016ലാണ് 'ധ്രുവനച്ചത്തിര'ത്തിന്‍റെ ചിത്രീകരണം ആരംഭിച്ചത്. എന്നാല്‍ സിനിമ പല കാരണങ്ങളാല്‍ മുടങ്ങി പോവുകയായിരുന്നു. താമരൈയുടെ വരികൾക്ക് ഹാരിസ് ജയരാജ് (Harris Jayaraj) ആണ് സിനിമയ്‌ക്ക് വേണ്ടി സംഗീതം ഒരുക്കിയിരിക്കുന്നത്. നിരവധി ഹിറ്റ് ഗാനങ്ങൾ പ്രേക്ഷകർക്ക് സമ്മാനിച്ച ഹാരിസ് ജയരാജിന്‍റെ 'ധ്രുവനച്ചത്തിരം' പാട്ടുകളും ആരാധകരുടെ ഇഷ്‌ട ലിസ്റ്റില്‍ ഇടംപിടിക്കുമെന്നാണ് പ്രതീക്ഷിക്കപ്പെടുന്നത്.
ബിഗ് ബജറ്റിലൊരുങ്ങുന്ന ചിത്രത്തില്‍ വിക്രമിനെ കൂടാതെ ഋതു വർമ, ഐശ്വര്യ രാജേഷ്, സിമ്രാൻ, വിനായകൻ, രാധിക ശരത്കുമാർ, ദിവ്യദർശിനി, അർജുൻ ദാസ് എന്നിവരും പ്രധാന വേഷങ്ങളില്‍ എത്തും. മലയാളിയായ ജോമോന്‍ ടി ജോണാണ് സിനിമയുടെ ഛായാഗ്രാഹകൻ.
മണിരത്‌നത്തിന്‍റെ സ്വപ്‌ന പദ്ധതിയായ 'പൊന്നിയിൻ സെൽവൻ 2' ആണ് വിക്രമിന്‍റേതായി ഏറ്റവും ഒടുവില്‍ തിയേറ്ററുകളില്‍ എത്തിയ ചിത്രം. 1955ല്‍ എഴുത്തുകാരന്‍ കല്‍ക്കി കൃഷ്‌ണമൂര്‍ത്തി രചിച്ച തമിഴ്‌ നോവലിന്‍റെ സിനിമാറ്റിക് അവലംബമാണ് അതേ പേരില്‍ പുറത്തിറങ്ങിയ 'പൊന്നിയിന്‍ സെല്‍വന്‍'. ചോള രാജവംശത്തിന്‍റെ ചരിത്രം പ്രമേയമാക്കിയാണ് ചിത്രം ഒരുക്കിയത്. പൊന്നിയിൻ സെൽവൻ എന്ന ചോള രാജകുമാരൻ അരുൾമൊഴി വർമന്‍റെ ചരിത്രം പറയുന്ന ഇതിഹാസ കഥയെ അടിസ്ഥാനമാക്കിയുള്ളതായിരുന്നു ചിത്രം.
ഐശ്വര്യ റായ് ബച്ചൻ, കാർത്തി, ജയം രവി, തൃഷ, ജയറാം, ഐശ്വര്യ ലക്ഷ്‌മി, ശോഭിത ധൂലിപാല, പ്രകാശ് രാജ്, ലാൽ എന്നിവരും ചിത്രത്തിൽ അഭിനയിച്ചിരുന്നു. തിയേറ്റര്‍ റിലീസിന് ശേഷം ഒടിടിയിലും ചിത്രം പ്രദര്‍ശനത്തിനെത്തി. ഏപ്രില്‍ 28ന് തിയേറ്ററുകളില്‍ എത്തിയ ചിത്രം ജൂണ്‍ 28ന് ആമസോണ്‍ പ്രൈം വീഡിയോയിലൂടെയാണ് ഒടിടിയില്‍ വന്നത്.
Also Read: Dhruva Natchathiram | 'ധ്രുവനച്ചത്തിര'ത്തിന്‍റെ വരവറിയിച്ച് ഗൗതം മേനോൻ ; പുതിയ ഗാനം 19ന് എത്തും
പാ രഞ്ജിത്തിന്‍റെ 'തങ്കലാൻ' ആണ് വിക്രമിന്‍റേതായി റിലീസിനൊരുങ്ങുന്ന മറ്റൊരു ചിത്രം. കോലാര്‍ സ്വര്‍ണ ഖനിയുടെ പശ്ചാത്തലത്തിൽ കഥ പറയുന്ന ചിത്രമാണ് 'തങ്കലാൻ'. സിനിമയുടെ ചിത്രീകരണം അടുത്തിടെ പൂർത്തിയായിരുന്നു. 19-ാം നൂറ്റാണ്ടിൽ, ബ്രിട്ടീഷ് കാലഘട്ടത്തിൽ കെജിഎഫിൽ നടന്ന ഒരു സംഭവത്തെ അടിസ്ഥാനമാക്കിയുള്ളതാണ് സിനിമ. പാ രഞ്ജിത്ത് തന്നെയാണ് സിനിമയുടെ തിരക്കഥയും സംവിധാനവും നിര്‍വഹിച്ചിരിക്കുന്നത്.
