സത്‌ന (മധ്യപ്രദേശ്) : ഭക്ഷണം നല്‍കാനെന്ന വ്യാജേന യുവതിയെ ഹോട്ടലിനുള്ളിലേക്ക് വിളിച്ചുകയറ്റി ബന്ദിയാക്കി പീഡിപ്പിച്ചു. 12 ദിവസമാണ് മൈഹാര്‍ സ്വദേശിയായ ആദിവാസി യുവതിയെ ഹോട്ടല്‍ ഉടമയും ജീവനക്കാരും ചേര്‍ന്ന് പീഡനത്തിന് ഇരയാക്കിയത്. മധ്യപ്രദേശിലെ സത്‌ന ജില്ലയിലാണ് നിഷ്ഠൂരമായ സംഭവം.
ഹോട്ടലില്‍ നിന്ന് രക്ഷപ്പെട്ട യുവതി അടുത്തുള്ള പൊലീസ് സ്റ്റേഷനിലെത്തി പരാതി നല്‍കി. ഇതിന്‍റെ അടിസ്ഥാനത്തില്‍ ഹോട്ടല്‍ ഉടമ രാജേന്ദ്ര പട്ടേല്‍, ജീവനക്കാരായ ലല്ലു യാദവ്, സണ്ണി സാകേത് എന്നിവരെ പൊലീസ് അറസ്റ്റ് ചെയ്‌തു. വെള്ളം കുടിക്കാനായി ഹോട്ടലില്‍ എത്തിയതായിരുന്നു യുവതി.
വിശന്നുവലഞ്ഞ യുവതിക്ക് ഭക്ഷണം നല്‍കാം എന്നു പറഞ്ഞ് സണ്ണി സാകേത് ആണ് അവളെ ഹോട്ടലിനകത്തേക്ക് വിളിച്ചുകയറ്റിയത്. എന്നാല്‍ ഭക്ഷണം നല്‍കാതെ അവളെ ബന്ദിയാക്കുകയും തുടര്‍ച്ചയായി 12 ദിവസം കൂട്ട ബലാത്സംഗത്തിന് ഇരയാക്കുകയുമായിരുന്നു. പ്രതികള്‍ക്കെതിരെ ഇന്ത്യന്‍ ശിക്ഷാനിയമത്തിലെ 376, 342 വകുപ്പുകളടക്കം ചുമത്തി കേസെടുത്തു.
കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്‌തതായി സത്‌ന ടൗണ്‍ ഇന്‍സ്‌പെക്‌ടര്‍ പി സി കോള്‍ അറിയിച്ചു.
