തിരുവനന്തപുരം: പ്രമുഖ തീര്‍ഥാടന കേന്ദ്രമായ ഉത്തര്‍പ്രദേശിലെ വാരാണസിയില്‍ തിരുവിതാംകൂര്‍ ദേവസ്വം ബോര്‍ഡിന് സ്വന്തമായുള്ള സത്രവും ധര്‍മ്മശാലയും അടിയന്തരമായി നവീകരിക്കാന്‍ തീരുമാനം. നാലായിരത്തിലേറെ ചതുരശ്ര അടി ഇരുനില സത്രവും ധര്‍മ്മശാലയുമാണ് തിരുവിതാംകൂര്‍ ദേവസ്വം ബോര്‍ഡിന് വാരാണസിയിലുള്ളത്. ഇതിനുള്ളില്‍ ഒരു ക്ഷേത്രവുമുണ്ട്.
തിരുവിതാംകൂര്‍ രാജകുടുംബത്തിന്‍റെ വകയായിരുന്ന ഈ കെട്ടിടം തിരുവിതാംകൂര്‍ രാജാവില്‍ നിന്നാണ് ദേവസ്വം ബോര്‍ഡിന് ലഭിച്ചത്. കോടികള്‍ വിലമതിക്കുന്ന ഈ സ്വത്തുക്കളെല്ലാം ഇന്ന് ശോചനീയാവസ്ഥയിലാണ്. ഇക്കാര്യം ശ്രദ്ധയില്‍ പെട്ടതിനെ തുടര്‍ന്ന് ദേവസ്വം ബോര്‍ഡ് പ്രസിഡന്‍റ് കെ.അനന്തഗോപന്‍റെ നേതൃത്വത്തിലുള്ള സംഘം വാരാണസിയില്‍ സന്ദര്‍ശനം നടത്തി കാര്യങ്ങള്‍ വിലയിരുത്തി.
കാശിയിലെ മലയാളികളുടെ യോഗവും പ്രസിഡന്‍റ് വിളിച്ചു ചേര്‍ത്തു. ഈ യോഗത്തിലാണ് നവീകരണം സംബന്ധിച്ച തീരുമാനമെടുത്തത്. കെട്ടിടങ്ങളുടെ നവീകരണം ഒരു മാസത്തിനകം ആരംഭിക്കുമെന്ന് പ്രസിഡന്‍റ് അറിയിച്ചു. നവീകരണത്തിനായി വാരാണസിയിലെ മലയാളികളുടെ ഏഴംഗ സമിതിയും രൂപീകരിച്ചു.
പുതുക്കിയ എസ്‌റ്റിമേറ്റിന്‍റെ അടിസ്ഥാനത്തില്‍ ഒരുമാസത്തിനുള്ളില്‍ പുതുക്കിയ നവീകരണ പദ്ധതി ആരംഭിക്കുമെന്നും ദേവസ്വം ബോര്‍ഡ് പ്രസിഡന്‍റ് വാര്‍ത്താക്കുറിപ്പില്‍ വ്യക്തമാക്കി.
