മുംബൈ : പുള്ളിപ്പുലിയുടെ ആക്രമണത്തില്‍ ഒന്നര വയസുകാരി കൊല്ലപ്പെട്ടു. മഹാരാഷ്‌ട്രയിലെ ഗോരേഗാവിലെ ആരെ കോളനിയിലെ വനമേഖലയില്‍ തിങ്കളാഴ്‌ചയാണ് നടുക്കുന്ന സംഭവം. രാവിലെ 6.30 ഓടെ അമ്മയ്‌ക്കൊപ്പം ക്ഷേത്രത്തിലേക്ക് പോകും വഴിയാണ് കുഞ്ഞിനെ പുള്ളിപ്പുലി ആക്രമിച്ചത്.
ആക്രമണത്തെ തുടര്‍ന്ന് കുഞ്ഞിനെ ഉടന്‍ തന്നെ ആശുപത്രിയിലെത്തിച്ചെങ്കിലും മരിക്കുകയായിരുന്നു. സംഭവത്തില്‍ കൂടുതല്‍ അന്വേഷണം നടത്തുമെന്ന് പൊലീസ് അറിയിച്ചു. അതേസമയം മേഖലയില്‍ രൂക്ഷമായ വന്യമൃഗശല്യം തടയാന്‍ നടപടികള്‍ ആരംഭിച്ചതായി വനം വകുപ്പ് ഉദ്യോഗസ്ഥര്‍ അറിയിച്ചു.
ജനവാസ മേഖലയിലെത്തുന്ന പുലിയെ നിരീക്ഷിക്കുന്നതിനായി മേഖലയില്‍ ക്യാമറകള്‍ സ്ഥാപിക്കുമെന്നും അധികൃതര്‍ വ്യക്തമാക്കി. സഞ്ജയ് ഗാന്ധി നാഷണൽ പാർക്കിന് സമീപമുള്ള ആരെ കോളനിയില്‍ ഇതിനകം നിരവധി പേര്‍ വന്യമൃഗ ശല്യത്തില്‍ കൊല്ലപ്പെട്ടിട്ടുണ്ട്.
പുള്ളിപ്പുലിയെ പിടികൂടും വരെ മേഖലയില്‍ കനത്ത കാവല്‍ ഏര്‍പ്പെടുത്തുമെന്നും വനംവകുപ്പ് അറിയിച്ചു.
