Mullaperiyar dam: മുല്ലപ്പെരിയാർ സുരക്ഷ പുനഃപരിശോധിക്കേണ്ടതില്ല: മന്ത്രി ദുരൈമുരുകൻ

പണി പൂർത്തിയായ ശേഷം ഏതെങ്കിലും തരത്തിലുള്ള പരിശോധന നടത്തണം എന്നതൊഴിച്ചാൽ നിലവിൽ അണക്കെട്ടിന്‍റെ ബലം പുനഃപരിശോധിക്കേണ്ട ആവശ്യമില്ലെന്ന് തമിഴ്‌നാട് ജലവിഭവ മന്ത്രി ദുരൈമുരുകൻ

ന്യൂഡൽഹി: മുല്ലപ്പെരിയാർ അണക്കെട്ടിന്‍റെ സുരക്ഷ പുനഃപരിശോധിക്കണമെന്നാവശ്യപ്പെട്ട് കേരളത്തിൽ നിന്നുള്ള വ്യക്തികൾ സമർപ്പിച്ച ഹർജിയിൽ നിലപാട് വ്യക്തമാക്കി തമിഴ്‌നാട് ജലവിഭവ മന്ത്രി ദുരൈമുരുകൻ. അണക്കെട്ടിന്‍റെ ഉയരം 152 അടിയായി ഉയർത്താൻ സുപ്രീം കോടതി അനുവദിച്ച സാഹചര്യത്തിൽ പണി പൂർത്തിയായ ശേഷം മാത്രമേ ഏതെങ്കിലും തരത്തിലുള്ള പരിശോധന നടത്തേണ്ടതുള്ളൂവെന്നും അദ്ദേഹം പ്രസ്‌താവനയിൽ പറഞ്ഞു.

പണി പൂർത്തിയായ ശേഷം ഏതെങ്കിലും തരത്തിലുള്ള പരിശോധന നടത്തണം എന്നതൊഴിച്ചാൽ നിലവിൽ അണക്കെട്ടിന്‍റെ ബലം പുനഃപരിശോധിക്കേണ്ട ആവശ്യമില്ല. അണക്കെട്ടിലെ സീപേജ്, ലൈം ലീച്ചിങ് എന്നിവ അനുവദനീയമായ അളവിലും വളരെ താഴെയാണ്. അതിനാൽ അണക്കെട്ടിന്‍റെ സുരക്ഷ ഒരുതരത്തിലും പുനഃപരിശോധിക്കേണ്ടതില്ലെന്നാണ് തമിഴ്‌നാട് സർക്കാരിന്‍റെ നിലപാട്. തമിഴ്‌നാടിന്‍റെ അവകാശങ്ങളും കർഷകരുടെ ക്ഷേമവും സംരക്ഷിക്കാൻ സർക്കാർ എല്ലാ ശ്രമങ്ങളും നടത്തുമെന്നും മന്ത്രി വ്യക്തമാക്കി.

മുല്ലപ്പെരിയാർ ഡാമിന്‍റെ റൂൾ കർവ്, ഗേറ്റ് ഓപ്പറേഷൻ ഷെഡ്യൂൾ, ഡാമിന്‍റെ ഇൻസ്ട്രുമെന്‍റേഷൻ, ഡാം സുരക്ഷ എന്നിവ സംബന്ധിച്ച് കേരളത്തിൽ നിന്നുള്ള നാല് വ്യക്തികൾ 2020ലും 2021ലും സുപ്രീം കോടതിയിൽ റിട്ട് ഹർജികൾ നൽകിയിട്ടുണ്ട്. ഇതിനെ എതിർത്തുകൊണ്ട് തമിഴ്‌നാട് സർക്കാരും തടസ ഹർജി നൽകിയിരുന്നു. 2021 ഫെബ്രുവരി 15ന് കേസുകൾ വിചാരണയ്ക്ക് വന്നപ്പോൾ, ഫെബ്രുവരി നാലിനകം സത്യവാങ്മൂലം സമർപ്പിക്കാൻ ഹർജിക്കാരോട് ഉത്തരവിട്ട കോടതി കേസ് പരിഗണിക്കുന്നത് ഫെബ്രുവരി മൂന്നാം വാരത്തിലേക്ക് മാറ്റി.

മുല്ലപ്പെരിയാർ മേൽനോട്ട സമിതിയെയും കേന്ദ്ര ജലവിഭവ മന്ത്രാലയത്തെയും പ്രതികളാക്കിയാണ് തമിഴ്‌നാട്, കേരള സർക്കാരുകൾ ഹർജി സമർപ്പിച്ചത്. 2021 ഫെബ്രുവരി 6, ഏപ്രിൽ 20, നവംബർ 16, ഡിസംബർ 14 തീയതികളിൽ തമിഴ്‌നാട് സർക്കാർ സുപ്രീം കോടതിയിൽ മറുപടി ഹർജികൾ സമർപ്പിച്ചു. 2021 ഏപ്രിലോടെ മുല്ലപ്പെരിയാർ മേൽനോട്ട സമിതിയും കേന്ദ്ര ജലവിഭവ ബോർഡും മറുപടി ഹർജികൾ സമർപ്പിച്ചു.

മുല്ലപ്പെരിയാർ അണക്കെട്ടിന്‍റെ ഉയരം 152 അടിയായി ഉയർത്താൻ അനുവദിച്ചുകൊണ്ട് 2006 ഫെബ്രുവരി 27, 2014 മെയ് 7 തീയതികളിലാണ് സുപ്രീം കോടതി വിധികൾ പുറപ്പെടുവിച്ചത്. അണക്കെട്ട് എല്ലാ അർത്ഥത്തിലും സുരക്ഷിതമാണെന്നും ശേഷിക്കുന്ന ബലപ്പെടുത്തൽ, അറ്റകുറ്റപ്പണികൾ എന്നിവ നിശ്ചിത കാലയളവിനുള്ളിൽ നടത്തണമെന്നും കോടതി നിർദേശിച്ചിരുന്നു.

എന്നാൽ കേരള സർക്കാർ ഇതിനെ എതിർക്കുന്നത് തുടരുകയാണ്. മേൽനോട്ട സമിതി 14 തവണ മുല്ലപ്പെരിയാർ അണക്കെട്ട് സന്ദർശിച്ച് സുരക്ഷിതമാണെന്ന് വ്യക്തമാക്കിയിട്ടുണ്ട്. എന്നാൽ മുല്ലപ്പെരിയാർ അണക്കെട്ട് സുരക്ഷ പുനഃപരിശോധിക്കണമെന്നും ഇത് മുൻവിധിക്ക് വിരുദ്ധമാണെന്നും മറുപടി ഹർജിയിൽ പരാമർശിച്ചിരുന്നു. ഇത് സംബന്ധിച്ച നിലപാടാണ് തമിഴ്‌നാട് ജലവിഭവ മന്ത്രി അറിയിച്ചിരിക്കുന്നത്.