ധർമപുരി (തമിഴ്‌നാട്) : ധർമപുരി മേഖലയിൽ ആറുവയസുകാരനെ കൊലപ്പെടുത്തിയ സംഭവത്തിൽ പതിനേഴുകാരനെ പിടികൂടി. കൃഷ്‌ണപുരം സ്വദേശിയായ കുട്ടിയാണ് കൊല്ലപ്പെട്ടത്. ധർമപുരിയിലെ കൃഷ്‌ണപുരത്തിനടുത്ത് പുംധിക്കരൈ പഞ്ചായത്തിന് കീഴിലുള്ള കാട്ടാമ്പട്ടി ഗ്രാമത്തിലാണ് സംഭവം.
കുട്ടിയെ കഴിഞ്ഞ 16-ാം തിയതി മുതൽ കാണാതായിരുന്നു. തുടർന്ന് മാതാപിതാക്കൾ പൊലീസിൽ പരാതി നൽകി. പരാതിയുടെ അടിസ്ഥാനത്തില്‍ നടത്തിയ അന്വേഷണത്തിലാണ് 17കാരനെ പൊലീസ് പിടികൂടിയത്. പ്രതിയായ കുട്ടിയും ആറുവയസുകാരനും ഒരുമിച്ച് കളിക്കുന്നത് പതിവായിരുന്നു. തുടർന്ന് 17കാരനെ പിടികൂടി നടത്തിയ ചോദ്യം ചെയ്യലിലാണ് പ്രതി കുറ്റം സമ്മതിച്ചത്.
സംഭവം ഇങ്ങനെ : കുട്ടി സ്ഥിരമായി വീടിന് സമീപത്തെ താമസക്കാരനായ 17കാരനുമായി കളിക്കാൻ പോകുമായിരുന്നു. സംഭവ ദിവസവും കുട്ടി പ്രതിയോടൊപ്പം കളിക്കാൻ പോയി. എന്നാൽ പ്രതി കുട്ടിയെ കാട്ടാമ്പട്ടിക്ക് സമീപം അരുന്തതിയാർ കോളനിയിൽ ഉപയോഗിക്കാതെ കിടന്നിരുന്ന അപ്പർ റിസർവോയർ ടാങ്കിനടുത്തേക്ക് കൂട്ടിക്കൊണ്ടുപോകുകയും അവിടെവച്ച് ലൈംഗികമായി പീഡിപ്പിക്കുകയും ചെയ്‌തു. തുടർന്ന് കുട്ടിയുടെ കൈയും കാലും കെട്ടി വാട്ടർടാങ്കിൽ മുക്കിക്കൊല്ലുകയുമായിരുന്നു. പീഡന വിവരം കുട്ടി പുറത്തുപറയുമെന്ന ഭയത്തിലാണ് പ്രതി കുട്ടിയെ കൊലപ്പെടുത്തിയത്.
തുടർന്ന് പൊലീസും ഫയർഫോഴ്‌സും സ്ഥലത്തെത്തി കുട്ടിയുടെ മൃതദേഹം പുറത്തെടുത്ത് പോസ്റ്റുമോർട്ടത്തിനായി ധർമപുരി സർക്കാർ മെഡിക്കൽ കോളജ് ആശുപത്രിയിലേക്ക് മാറ്റി. പോസ്റ്റുമോർട്ടത്തിന് ശേഷം കുട്ടിയുടെ മൃതദേഹം ഏറ്റുവാങ്ങാൻ കുട്ടിയുടെ മാതാപിതാക്കൾ വിസമ്മതിച്ചു. 17കാരൻ ഒറ്റയ്‌ക്ക് കുട്ടിയെ കൊലപ്പെടുത്തില്ലെന്നും സംഭവത്തിൽ മറ്റാർക്കൊക്കെയോ പങ്കുണ്ടെന്നുമാണ് ബന്ധുക്കളുടെ ആരോപണം. സംഭവത്തിൽ പങ്കുള്ള എല്ലാവരെയും പിടികൂടണമെന്നാവശ്യപ്പെട്ട് ധർമപുരി-തിരുപ്പത്തൂർ മെയിൻ റോഡിലെ കൃഷ്‌ണപുരം പൊലീസ് സ്റ്റേഷന് മുന്നിൽ നാട്ടുകാരും ബന്ധുക്കളും ചേർന്ന് കുത്തിയിരിപ്പ് സമരം ആരംഭിച്ചു.
ധർമപുരി ജില്ല പൊലീസ് സൂപ്രണ്ട് എൻ സ്റ്റീഫൻ ജെസുബത്തം, പാപ്പാരെട്ടിപ്പട്ടി എംഎൽഎ ഗോവിന്ദസ്വാമി എന്നിവർ സ്ഥലത്തെത്തി സമരക്കാരെ അനുനയിപ്പിക്കാൻ ശ്രമിച്ചു. എന്നാൽ, 'ഈ കൊലപാതകം പ്രതി ഒറ്റയ്‌ക്ക് ചെയ്‌തതല്ല, മറ്റാർക്കോ ഇതിൽ പങ്കുണ്ട്. അതിനാൽ കൃത്യമായ അന്വേഷണം നടത്തി അവർക്കെതിരെ നടപടിയെടുക്കണം' എന്നാണ് സമരക്കാർ പറയുന്നത്. ഇതേത്തുടർന്ന് സമരക്കാരെ പൊലീസ് സ്റ്റേഷനിലെത്തിച്ച് എസ്‌പിയുടെ നേതൃത്വത്തിൽ വീണ്ടും ചർച്ച നടത്തി. തുടർന്ന് കുട്ടിയുടെ മൃതദേഹം ഏറ്റുവാങ്ങാമെന്ന് ബന്ധുക്കൾ സമ്മതിക്കുകയായിരുന്നു.
എൽകെജി വിദ്യാർഥിനിയെ പീഡിപ്പിച്ച കേസിൽ പ്രതിക്ക് 45 വർഷം തടവ് : കഴിഞ്ഞ ദിവസം പത്തനംതിട്ടയിൽ പോക്സോ കേസിലെ പ്രതിക്ക് 45 വർഷം കഠിന തടവും രണ്ടര ലക്ഷം രൂപ പിഴയും കോടതി ശിക്ഷ വിധിച്ചിരുന്നു. അടൂർ ഫാസ്റ്റ് ട്രാക്ക് സ്പെഷ്യൽ കോടതിയാണ് ശിക്ഷ വിധിച്ചത്. അടൂർ പറക്കോട് സ്വദേശി സുധീഷാണ് കേസിലെ പ്രതി. കുട്ടിയുടെ മാതാപിതാക്കളാണ് രണ്ടും മൂന്നും പ്രതികള്‍. ഒന്നാം പ്രതി കുട്ടിയെ ഉപദ്രവിച്ച വിവരം യഥാസമയം പൊലീസിൽ അറിയിച്ചില്ല എന്നത് ആയിരുന്നു മാതാപിതാക്കൾക്കെതിരെയുള്ള കുറ്റം.
2019 നവംബറിലാണ് കേസിനാസ്‌പദമായ സംഭവം. മാതാപിതാക്കൾ വീട്ടിലില്ലാതിരുന്ന സമയം വീട്ടിൽ വച്ചാണ് ഇയാൾ കുട്ടിയെ പീഡിപ്പിച്ചത്. അടൂർ എസ് എച്ച് ഒ ആയിരുന്ന ടി ഡി പ്രജീഷാണ് കേസ് രജിസ്റ്റർ ചെയ്‌ത്‌ അന്വേഷണം നടത്തിയത്. രണ്ടാം പ്രതിയായ പിതാവിനെ ആറ് മാസം ശിക്ഷിച്ച് ജയിലിൽ കിടന്ന കാലാവധി വകവച്ചും മാതാവിനെ ശാസിച്ചും കോടതി വിട്ടയക്കുകയായിരുന്നു.
More read : Pocso case| എൽകെജി വിദ്യാർഥിനിയെ പീഡിപ്പിച്ച കേസിൽ പ്രതിക്ക് 45 വർഷം കഠിന തടവും രണ്ടര ലക്ഷം രൂപ പിഴയും
