എക്കാലത്തെയും തെലുഗു ബ്ലോക്ക്ബസ്‌റ്റർ ചിത്രം 'ഇസ്‌മാര്‍ട്ട് ശങ്കർ' (iSmart shankar) തിയേറ്ററുകളിൽ എത്തിയിട്ട് നാല് വർഷങ്ങൾ പൂര്‍ത്തിയാകുന്ന വേളയില്‍ റാം പൊതിനേനിയും സംവിധായകൻ പുരി ജഗന്നാഥും വീണ്ടും ഒന്നിക്കുകയാണ്. 'ഡബിൾ ഇസ്‌മാർട്ട്' എന്ന് പേരിട്ടിരിക്കുന്ന സിനിമയ്‌ക്ക് വേണ്ടിയാണ് ഇരുവരും വീണ്ടും ഒന്നിച്ചെത്തുന്നത്. 'ഇസ്‌മാര്‍ട്ട് ശങ്കറി'ന്‍റെ രണ്ടാം ഭാഗമാണ് 'ഡബിൾ ഇസ്‌മാർട്ട്'.
സിനിമയുടെ ചിത്രീകരണം അടുത്തിടെ മുംബൈയിൽ ആരംഭിച്ചിരുന്നു. ഒരു ഗംഭീര ആക്ഷൻ സീക്വൻസിലൂടെയാണ് ചിത്രീകരണം ആരംഭിച്ചത്. സിനിമയ്‌ക്ക് വേണ്ടി ഒരു സ്‌റ്റൈലിഷ് മേക്കോവറാണ് റാം പൊതിനേനി നടത്തിയിരിക്കുന്നത്. പുരി കണക്‌ട്‌സിന്‍റെ ബാനറിൽ പുരി ജഗനാഥും ചാർമി കൗറും ചേർന്നാണ് സിനിമയുടെ നിർമാണം.
ഇപ്പോഴിതാ സിനിമയെ കുറിച്ചുള്ള പുതിയ അപ്‌ഡേറ്റ് പുറത്തുവിട്ടിരിക്കുകയാണ് അണിയറപ്രവര്‍ത്തകര്‍. ചിത്രത്തില്‍ ബോളിവുഡ് താരം സഞ്ജയ് ദത്തും സുപ്രധാന വേഷത്തില്‍ എത്തുന്നുണ്ട്. ഒരു മുഴുനീള കഥാപാത്രത്തെയാണ് ചിത്രത്തില്‍ താരം അവതരിപ്പിക്കുന്നത്. ആദ്യ ഷെഡ്യുളിൽ തന്നെ താരം ജോയിൻ ചെയ്‌തിരുന്നു. 'ഡബിൾ ഇസ്‌മാർട്ട് ശങ്കറി'ല്‍ ബിഗ് ബുൾ എന്ന കഥാപാത്രത്തെയാണ് സഞ്ജയ് ദത്ത് അവതരിപ്പിക്കുക. സിനിമയിലെ സഞ്ജയ് ദത്തിന്‍റെ ഫസ്റ്റ് ലുക്ക് പോസ്‌റ്റർ പുറത്തുവിട്ടിരിക്കുകയാണ് നിര്‍മാതാക്കള്‍. താരത്തിന്‍റെ ജന്മദിനത്തോടനുബന്ധിച്ചാണ് നിര്‍മാതാക്കള്‍ ഫസ്റ്റ് ലുക്ക് പുറത്തുവിട്ടിരിക്കുന്നത്.
തീർത്തും വ്യത്യസ്‌തമായ ഗെറ്റപ്പിലാണ് ഫസ്റ്റ് ലുക്കില്‍ സഞ്ജയ് ദത്ത് പ്രത്യക്ഷപ്പെട്ടിരിക്കുന്നത്. തോക്കിന്‍ മുനയില്‍ നില്‍ക്കുന്ന സഞ്ജയ് ദത്ത് സിഗരറ്റ് വലിച്ച് കൊണ്ട് നില്‍ക്കുന്നതാണ് ഫസ്റ്റ് ലുക്കില്‍. കയ്യില്‍ വലിയ വിലപിടിപ്പുള്ള വാച്ചും മോതിരവും കമ്മലും അണിഞ്ഞ്, മുഖത്ത് ടാറ്റു അടിച്ചും തീര്‍ത്തും വ്യത്യസ്‌തമായ ലുക്കാണ് ഫസ്റ്റ് ലുക്കില്‍ താരത്തിന്. ഒരു ശക്തമായ കഥാപാത്രത്തെയാണ് ചിത്രത്തില്‍ സഞ്ജയ് ദത്ത് അവതരിപ്പിക്കുന്നത് എന്നാണ് ഫസ്റ്റ് ലുക്ക് നല്‍കുന്ന സൂചന.
ഇതുവരെ കാണാത്ത ഒരു വ്യത്യസ്‌ത വേഷത്തിലാകും സംവിധായകൻ പുരി ജഗഗന്നാഥ്‌ സഞ്ജയ് ദത്തിനെ ചിത്രത്തില്‍ അവതരിപ്പിക്കുക എന്നതില്‍ സംശയമില്ല. റാമും സഞ്ജയ് ദത്തും ഒന്നിച്ച് എത്തുന്നതോടെ ആരാധകരുടെ ആഘോഷങ്ങള്‍ക്കും അതിരുണ്ടാകില്ല. വൻ ബജറ്റിലായാണ് ചിത്രം ഒരുങ്ങുന്നത്.
ഹോളിവുഡ് ഛായാഗ്രാഹകൻ ഗിയാനി ഗിയാനെല്ലിയാണ് സിനിമയുടെ ഛായാഗ്രഹണം നിര്‍വഹിക്കുക. കീചയാണ് സ്‌റ്റണ്ട് ഡയറക്‌ടര്‍. സിനിമയിലെ മറ്റ് താരങ്ങളുടെയും അണിയറപ്രവർത്തകരുടെയും വിവരങ്ങള്‍ ഉടൻ തന്നെ പുറത്തുവിടുമെന്നാണ് സൂചന.
2024 മാർച്ച് എട്ടിന് മഹാശിവരാത്രിയോടനുബന്ധിച്ചാണ് ചിത്രം തിയേറ്ററുകളില്‍ എത്തുക. ഒരേസമയം മലയാളം, ഹിന്ദി, തമിഴ്, തെലുഗ്, കന്നഡ എന്നീ ഭാഷകളിൽ ചിത്രം റിലീസിനെത്തും.
വിജയ് ദേവരകൊണ്ടയെ നായകനാക്കി ഒരുക്കിയ പാന്‍ ഇന്ത്യന്‍ ചിത്രം 'ലൈഗര്‍' ആയിരുന്നു പുരി ജഗനാഥ് ഏറ്റവും ഒടുവിലായി സംവിധാനം ചെയ്‌ത ചിത്രം. പ്രഖ്യാപനം മുതല്‍ വന്‍ ഹൈപ്പുകളോടെ തിയേറ്ററുകളില്‍ എത്തിയ ചിത്രത്തിന് പ്രതീക്ഷിച്ച പോലെ മികച്ച കലക്ഷന്‍ നേടാന്‍ കഴിഞ്ഞിരുന്നില്ല. എന്നാല്‍ തന്‍റെ പുതിയ സിനിമയില്‍ പ്രതീക്ഷ അര്‍പ്പിച്ചിരിക്കുകയാണ് സംവിധായകന്‍.
Also Read: 'ഡബിൾ ഐ സ്‌മാർട്ട്' ; ലൈഗറിന് ശേഷമുള്ള പുരി ജഗന്നാഥ് ചിത്രം ഉടന്‍
