മുംബൈ: അടിസ്ഥാന പലിശ നിരക്കുകളില്‍ മാറ്റം വരുത്താതെ റിസര്‍വ് ബാങ്ക്. റിപ്പോ നാല് ശതമാനമായും റിവേഴ്‌സ്‌ റിപ്പോ 3.35 ശതമാനമായും തുടരും. വാണിജ്യ ബാങ്കുകള്‍ക്ക് റിസര്‍വ് ബാങ്ക് നല്‍കുന്ന ഹ്രസ്വകാല വായ്പയുടെ പലിശ നിരക്കാണ് റിപ്പോ. വാണിജ്യ ബാങ്കുകള്‍ റിസര്‍വ് ബാങ്കില്‍ പണം നിക്ഷേപിക്കുമ്പോള്‍ റിസര്‍വ് ബാങ്ക് നല്‍കുന്ന പലിശയാണ് റിവേഴ്‌സ്‌ റിപ്പോ.
തുടര്‍ച്ചയായ പത്താം തവണയാണ് അടിസ്ഥാന പലിശ നിരക്കുകളില്‍ മാറ്റം വരുത്താതെയുള്ള റിസര്‍വ് ബാങ്ക് മോണിറ്ററി പൊളിസി കമ്മിറ്റിയുടെ (Monetary Policy Committee) തീരുമാനം. റിപ്പോ നിരക്കുകളില്‍ അവസാനമായി മാറ്റം വരുത്തിയത് 2020 മെയ് 22നാണ്. സമ്പദ് വ്യവസ്ഥയില്‍ ഉപഭോഗം വര്‍ധിക്കാനായി ചരിത്രത്തിലെ ഏറ്റവും കുറഞ്ഞ റിപ്പോനിരക്ക് അന്ന് ആര്‍ബിഐ നിശ്ചയിക്കുകയായിരുന്നു.
2022-23 സാമ്പത്തിക വര്‍ഷത്തേക്കുള്ള കേന്ദ്ര ബജറ്റ് അവതരണത്തിന് ശേഷമുള്ള മോണിറ്ററി പോളിസി കമ്മfറ്റിയുടെ ആദ്യ യോഗമാണ് ഇന്ന് നടന്നത്. രണ്ട് മാസം കൂടുമ്പോഴാണ് മോണിറ്ററി പോളിസി കമ്മിറ്റി യോഗം ചേര്‍ന്ന് അടിസ്ഥാന പലിശ നിരക്കുകള്‍ പ്രഖ്യാപിക്കുക. സാമ്പത്തിക വളര്‍ച്ചയ്ക്ക് സഹായകമാവാന്‍ വേണ്ടി മോണിറ്ററി പോളിസി കമ്മിറ്റിയിലെ എല്ലാവരും അടിസ്ഥാന പലിശ നിരക്കുകളില്‍ മാറ്റം വരുത്തേണ്ട എന്ന തീരുമാനം അംഗീകരിക്കുകയായിരുന്നുവെന്ന് റിസര്‍വ് ബാങ്ക് ഗവര്‍ണര്‍ ശക്തികാന്ത ദാസ് പറഞ്ഞു.
മോണിറ്ററി പോളിസിയുടെ അധ്യക്ഷന്‍ ആര്‍ബിഐ ഗവര്‍ണറാണ്. നടപ്പു സാമ്പത്തിക വര്‍ഷം വളര്‍ച്ചാ നിരക്ക് 9.2 ശതമാനവും പണപ്പെരുപ്പം 5.3 ശതമാനവുമായിരിക്കുമെന്ന് റിസര്‍വ് ബാങ്ക് കണക്കാക്കുന്നു. റീട്ടെയില്‍ വിലക്കയറ്റം (Retail inflation) അഞ്ച് മാസത്തിലെ ഏറ്റവും ഉയര്‍ന്ന 5.59 ശതമാനത്തില്‍ ഈ കഴിഞ്ഞ ഡിസംബറില്‍ എത്തിയിരുന്നു. കഴിഞ്ഞ നവംബറില്‍ ഇത് 4.91 ശതമാനമായിരുന്നു.
ഭക്ഷ്യവസ്തുക്കളുടെ വില ഉയര്‍ന്നതാണ് റീട്ടെയില്‍ വിലക്കയറ്റം വര്‍ധിക്കാന്‍ കാരണമായത്. പ്രതിവര്‍ഷ പണപ്പെരുപ്പം (annual inflation) ഒരു നിശ്ചിത പരിധിയില്‍ നിലനിര്‍ത്താനുള്ള ബാധ്യത മോണിറ്ററി പോളിസി കമ്മിറ്റിക്കുണ്ട്. പ്രതിവര്‍ഷ പണപ്പെരുപ്പം ആറ് ശതമാനത്തില്‍ കൂടുതലോ രണ്ട് ശതമാനത്തില്‍ കുറവോ ആവാന്‍ പാടില്ല.
2022-23 സാമ്പത്തിക വര്‍ഷത്തിലെ നോമിനല്‍ ജിഡിപി വളര്‍ച്ചാ നിരക്ക് 11.1 ശതമാനമാകുമെന്നാണ് കേന്ദ്ര ബജറ്റില്‍ കണക്കാക്കിയത്. പണപ്പെരുപ്പം കിഴിക്കാതെയുള്ള ജിഡിപിയെയാണ് നോമിനല്‍ ജിഡിപി(മൊത്ത ആഭ്യന്തര ഉല്‍പ്പാദനം) എന്ന് വിളിക്കുന്നത്. പണപ്പെരുപ്പത്തില്‍ അമിത ആശങ്കവെക്കാതെ സാമ്പത്തിക വളര്‍ച്ചയെ സഹായിക്കുന്ന നയം തുടരുകയാണ് ആര്‍ബിഐ.
റിപ്പോ നിരക്കുകള്‍ കുറഞ്ഞിരിക്കുമ്പോള്‍ ബാങ്കുവായ്പ പലിശയും കുറയാനുള്ള സാഹചര്യമുണ്ടാകുന്നു. ഇത് സമ്പദ് വ്യവസ്ഥയിലെ ഉപഭോഗം വര്‍ധിക്കുന്നതിലേക്ക് നയിക്കുകയും സാമ്പത്തിക വളര്‍ച്ച ത്വരിതപ്പെടുത്തുകയും ചെയ്യുന്നു.
എന്നാല്‍ ഇതിന്‍റെ മറ്റൊരുവശം സമ്പദ് വ്യവസ്ഥയില്‍ ആവശ്യകത വര്‍ധിക്കുമ്പോള്‍ വിലക്കയറ്റം കൂടാനുള്ള സാധ്യതയാണ്. വിലക്കയറ്റം ഒരു പരിധിക്കപ്പുറത്തേക്ക് കൂടുന്നത് സമ്പദ് വ്യവസ്ഥയ്ക്ക് പ്രതികൂലമാണ്. അതുകൊണ്ട്തന്നെ വിപണിയില്‍ പണലഭ്യത കൂടുന്നതിനനുസരിച്ച് ഉല്‍പ്പന്നങ്ങളുടെ വിതരണവും സുഗമമാകേണ്ടത് പണപ്പെരുപ്പം പിടിച്ചു നിര്‍ത്തുന്നതിന് പ്രധാനമാണ്.
മൂലധന ചിലവുകള്‍ വര്‍ധിപ്പിച്ച് സാമ്പത്തിക വളര്‍ച്ച കൈവരിക്കാനാണ് കേന്ദ്ര സര്‍ക്കാര്‍ ശ്രമം. 2022-23 സാമ്പത്തിക വര്‍ഷത്തിലെ മൂലധന ചിലവ് 35.4 ശതമാനമായാണ് കേന്ദ്രസര്‍ക്കാര്‍ വര്‍ധിപ്പിച്ചത്. കേന്ദ്ര ബജറ്റില്‍ ഇതിനായി നീക്കിവച്ചത് 7.5 ലക്ഷം കോടി രൂപയാണ്.
കൊവിഡ് സൃഷ്ടിച്ച സാമ്പത്തിക മാന്ദ്യത്തില്‍ നിന്ന് കരകയറാനാണ് ഇതിലൂടെ ലക്ഷ്യം വെക്കുന്നത്. കെട്ടിടങ്ങള്‍, റോഡുകള്‍ തുടങ്ങിയ ആസ്തികള്‍ സൃഷ്ടിക്കുന്ന ചിലവുകളെയാണ് മൂലധന ചിലവുകള്‍ എന്ന് പറയുന്നത്.
ALSO READ: ഇന്ത്യന്‍ ഓഹരി വിപണി ഉയര്‍ന്നു
