ന്യൂഡൽഹി: ആം ആദ്‌മി പാര്‍ട്ടി നേതാവ്‌ രാഘവ് ഛദ്ദയുടെ സസ്‌പെൻഷൻ പ്രമേയം അവസാനിച്ചു (rajya sabha restore suspension of raghav chadha). മാധ്യമങ്ങൾക്ക് മുന്നിൽ തെറ്റിദ്ധരിപ്പിക്കുന്ന വസ്‌തുതകൾ അവതരിപ്പിച്ചതിന് എഎപി എംപി രാഘവ് ഛദ്ദ കുറ്റക്കാരനാണെന്ന് രാജ്യസഭയുടെ പ്രിവിലേജസ് കമ്മിറ്റി കണ്ടെത്തിയതിനെ തുടര്‍ന്നായിരുന്നു നടപടി (RS panel holds Raghav Chadha guilty). ഓഗസ്റ്റ്‌ 11 നാണ്‌ രാജ്യസഭയില്‍ നിന്നും രാഘവ് ഛദ്ദയെ സസ്‌പെൻഡ്‌ ചെയ്‌തത്‌.
രാഘവ് ഛദ്ദയുടെ സസ്‌പെൻഷൻ പ്രമേയം അവസാനിപ്പിച്ച്‌ സഭാ നടപടികളിൽ പങ്കെടുക്കാൻ അനുവദിച്ചു. നിർദ്ദിഷ്‌ട തെരഞ്ഞെടുപ്പ്‌ പാനലിൽ അംഗങ്ങളുടെ സമ്മതമില്ലാതെ പേരുകൾ ചേർത്തതിനും ഛദ്ദ കുറ്റക്കാരനാണെന്ന് കണ്ടെത്തിയിരുന്നു. സസ്‌പെൻഷൻ അവസാനിപ്പിക്കാനുള്ള പ്രമേയം ബിജെപി അംഗം ജിവിഎൽ നരസിംഹ റാവു സഭയിൽ അവതരിപ്പിച്ചു.
പ്രമേയത്തിന് മുന്നോടിയായി, രാജ്യസഭാ ചെയർമാൻ ജഗ്‌ദീപ് ധൻഖർ കമ്മിറ്റി ആഴത്തിലുള്ള പരിശോധനയ്‌ക്കൊടുവില്‍ ആരോപണങ്ങളില്‍ രാഘവ് ഛദ്ദ കുറ്റക്കാരനാണെന്ന് കണ്ടെത്തിയതായി പറഞ്ഞു.
'അദ്ദേഹം മാധ്യമങ്ങൾക്ക് മുന്നിൽ തെറ്റിദ്ധരിപ്പിക്കുന്ന വസ്‌തുതകൾ ബോധപൂർവം അവതരിപ്പിച്ചു, കൗൺസിൽ നടപടികളെ തെറ്റായി വ്യാഖ്യാനിച്ചു, രാജ്യസഭാ ചെയർമാന്‍റെ അധികാരത്തെ അവഹേളിക്കുകയും ചെയ്‌തതായി റിപ്പോർട്ട് വായിച്ചുകൊണ്ട് രാജ്യസഭാ ചെയർമാൻ ധനഖർ പറഞ്ഞു. അംഗങ്ങളുടെ സമ്മതമില്ലാതെ നിർദിഷ്‌ട തെരഞ്ഞെടുപ്പ്‌ കമ്മിറ്റിയിൽ അംഗങ്ങളുടെ പേരുകൾ ചേർത്തെന്ന ആരോപണത്തിലും ഛദ്ദ കുറ്റക്കാരനാണെന്ന് കണ്ടെത്തിയതായും ചെയർമാൻ പറഞ്ഞു.
പ്രത്യേകാവകാശ ലംഘനത്തിന് കുറ്റക്കാരനാണെന്ന് ഈ സഭ കണ്ടെത്തി, കൂടാതെ അദ്ദേഹം ഇതുവരെ അനുഭവിച്ച സസ്‌പെൻഷൻ മതിയായ ശിക്ഷയായി കണക്കാക്കുകയും സസ്‌പെൻഷൻ നിർത്തുന്നത് സഭ പരിഗണിക്കുകയും ചെയ്യുന്നതായി നരസിംഹ റാവു പ്രമേയം അവതരിപ്പിച്ചു. പ്രമേയം അംഗീകരിച്ചതിന് ശേഷം, ഛദ്ദയ്ക്ക് ഇപ്പോൾ സഭാ നടപടികളിൽ പങ്കെടുക്കാമെന്ന് ധൻഖർ അറിയിച്ചു.
ബിജെപിക്കെതിരെ ആം ആദ്‌മി പാര്‍ട്ടി: ലോക്‌സഭ തെരഞ്ഞെടുപ്പിന് മുന്നോടിയായി അരവിന്ദ് കെജ്‌രിവാളും പിണറായി വിജയനും ഉള്‍പ്പടെ ഇന്ത്യ മുന്നണിയിലെ ഉന്നത നേതാക്കളുടെ അറസ്റ്റ് ഉണ്ടായേക്കാമെന്നറിയിച്ച് രാഘവ് ഛദ്ദ. ബിജെപിയുടെ പദ്ധതി പ്രകാരമുള്ള ഈ അറസ്‌റ്റുകളില്‍ ആദ്യമുണ്ടാവുക ഡല്‍ഹി മുഖ്യമന്ത്രി അരവിന്ദ് കെജ്‌രിവാളിന്‍റെയാവുമെന്നും അദ്ദേഹം ആരോപിച്ചു. 2014 മുതല്‍ അന്വേഷണ ഏജന്‍സികള്‍ രജിസ്‌റ്റര്‍ ചെയ്‌ത കേസുകളില്‍ 95 ശതമാനവും പ്രതിപക്ഷ നേതാക്കള്‍ക്കെതിരെയാണെന്നും അദ്ദേഹം കുറ്റപ്പെടുത്തി.
ഇന്ത്യ മുന്നണിയുടെ രൂപീകരണത്തോടെ ബിജെപി അങ്കലാപ്പിലാണ്. അതുകൊണ്ടുതന്നെ ഇന്ത്യ മുന്നണിയിലെ ഉന്നത നേതാക്കളെ ലക്ഷ്യം വച്ചുകൊണ്ട് അവര്‍ ഒരു പദ്ധതി തയ്യാറാക്കിയതായാണ് ഞങ്ങള്‍ ചില കേന്ദ്രങ്ങളില്‍ നിന്നും അറിഞ്ഞത്. ഈ പദ്ധതി പ്രകാരം ആദ്യ അറസ്റ്റ് മുഖ്യമന്ത്രി അരവിന്ദ് കെജ്‌രിവാളിന്‍റേതായിരിക്കുമെന്ന് രാഘവ് ഛദ്ദ വാര്‍ത്താസമ്മേളനത്തില്‍ പറഞ്ഞു.
