ന്യൂഡല്‍ഹി: ലഡാക്കിലെ ചൈനയുടെ കടന്ന് കയറ്റവുമായി ബന്ധപ്പെട്ട് കേന്ദ്രത്തിനെതിരെ ആഞ്ഞടിച്ച് കോണ്‍ഗ്രസ് നേതാവ് രാഹുല്‍ ഗാന്ധി. ട്വിറ്ററിലൂടെയായിരുന്നു കോണ്‍ഗ്രസ് നേതാവിന്‍റെ വിമര്‍ശനം. 'മിസ്റ്റര്‍ 56 ഇഞ്ച് ചൈനയെ ഭയക്കുന്നു', രാഹുല്‍ ഗാന്ധി ട്വിറ്ററില്‍ കുറിച്ചു. ചൈനയുമായുള്ള അതിര്‍ത്തി തര്‍ക്കം സംബന്ധിച്ച ന്യൂസ് റിപ്പോര്‍ട്ടുകളുടെ വീഡിയോ ക്ലിപ്പും രാഹുല്‍ ഗാന്ധി ട്വിറ്ററില്‍ പങ്കു വച്ചു.
കഴിഞ്ഞ വർഷം മെയ് 5ന് കിഴക്കൻ ലഡാക്കിൽ പൊട്ടിപ്പുറപ്പെട്ട ഇന്ത്യ-ചൈന സൈനിക സംഘർഷത്തെക്കുറിച്ചുള്ള വാർത്തകളാണ് വീഡിയോയിലുള്ളത്. ഇന്ത്യന്‍ അതിര്‍ത്തിയില്‍ ചൈന വ്യോമ താവളങ്ങള്‍ തുറന്നുവെന്ന ന്യൂസ് റിപ്പോര്‍ട്ടും വീഡിയോയില്‍ കാണാം.
നേരത്തെ ലഡാക്കിലെ ടെംചോക്കില്‍ ചൈനയുടെ നുഴഞ്ഞുകയറ്റത്തിന്‍റെ റിപ്പോര്‍ട്ടുകള്‍ വന്നതിന് പിന്നാലെ കേന്ദ്രത്തിനെ രൂക്ഷമായി വിമര്‍ശിച്ച് രാഹുല്‍ ഗാന്ധി രംഗത്തെത്തിയിരുന്നു. ചൈനയെ എങ്ങനെ കൈകാര്യം ചെയ്യണമെന്ന് കേന്ദ്ര സര്‍ക്കാരിന് ഒരു ധാരണയുമില്ലെന്നും കേന്ദ്രത്തിന്‍റെ അവഗണന കൂടുതല്‍ പ്രശ്‌നങ്ങള്‍ സൃഷ്‌ടിക്കുകയൊള്ളുവെന്നുമായിരുന്നു രാഹുല്‍ ഗാന്ധിയുടെ വിമര്‍ശനം.
